THIL HAR BER MAI CHU

Mahmuaka Chhakchhuak

Nov. 23, 2021

 

Min hmangaih tute hmangaih let hi thil harsa ni pawhin a hriat loh a, tupawh mai hian min hmangaih tute hi kan haiin a rinawm loh a, kan hmangaih thei mai bawkin a hriat. Chutiang bawkin khawngaihna pawh kan lantir thei mai thiin mi tam takte phei hi chuan langsar takin khawngaih thilpek kan pein kan lantir thin a nih bawk hi. Hmangaihna leh Khawngaihna hi thil inhnaih tak bawk a niin Hmangaihna chuan phutlet a neiin Khawngaihna chuan phutlet a nei lo thung a, chuvangin Hmangaihna aiin Khawngaihna hi Pathian ngei pawhin alo dah pawimawh daih zawk ni pawhin a hriat.

Zoram mai niloin khawvel sorkar hausa leh thiltithei ber berte ngei pawh Hripuiin min han nuaiin mitinin hri kan buaipui a, a bik takin Zoramah phei chuan kan ze dik tak min phawrhsak ta hlauh thung a nih hi. Mitin leh pawl hrang hrangin an pek theihna turin sorkar berin sum bawm hung chhuak a. Chu chu Hripui beihletna atan pawha kan sum bawm lian ber leh neih chhun nia hriat a ni. Ram hruaitute leh sorkar hnathawkte mai bakah mimal leh pawl ang pawhin chu sum bawmah chuan sum an chhung lut ruih ruih a, kan mizo nunphung atanga thlir phei chuan thil lawmawm tak a niin thil chhinchhiah tlak tak pawh a ni. Nimahsela chu sum bawma sum awmte chu Hripui beihletna atana hman tura pekkhawm a nih laiin kan sorkar ber chuan kum 2020-ah khan sorkar bungraw leina atan Cheng Nuaih 537 aia tam a han hmang mauh mai pek a nih kha. Chutih mek laiin kan Hripui leng lah chuan hmuntin min luhchhuah a, rem tikni awm loin a zual zel rih zawk bawk si a.

Pawl hrang hrangte lah chuan veng lehlam daihahte chuan thilpek an lo pe a, anmahni aia dinhmun hniam leh dinhmun chhe zawka an hriatte hnenahte thilpek an pe hi a lawmawm. Nimahsela hmangaihna leh khawngaihna thilpekah erawh chuan chhiar a harin thenkhatte hi chuan social media lama lang tur kherin an han pe thin bawk si. Thawktute thlabi hlawh pawh pe thei lote chuan midang hnenah luanchhuah an han tum ta tlat mai thin hi he Hripuiin kan zia a phawrhlan zinga thil tha lo ber a ni hial mai awm mang e. Thlan pawnlam hnawih var ang mai chauhin kan pawn lam hi chu a mawiin hmuh pawh a nuam thin a, chutih mek lai chuan kan chhung lam erawh ruang tawih rimchhe awmna hmun ang maiin a rimchhe thung bawk si hi kan zoram kristian tam takte nunphung niin tun Hripui lengin kan mize dik tak a rawn phawrhlan a ni.

Eng ber nge kan mawhpuh ang tih pawh hriatthiam har takin zoram kristiante nunah hian thilmak tak tak hriat tur leh hmuh tur a awm a. Heti taka lemchanna hmun ni si lo a lem kan chang ta reng mai hi a mak a, a pawi a, a nghawng a tha lo bawk a ni. Tupawh mai hian pawnlama lemchan kan tum em ni tih tur maiin chhunglam thinghlimna leh mawina lam ngaihtuah lek loin pawnlama lan dan ringawt kan thlir ta thin hian ze nghet lo min neih tirin hmuhnawm ti taka lemchangte kan thlir thin angin kan nun chu lemchanna hmunah min hung ta a nih si hi. ‘Ka pu’ tih maia Officer-te kan biak thin pawh ‘Sir’ kan han ti zawk tlat mai hi inbawlna pakhat a ni tih a dawngtu lam hian an hre thei reng reng ngai lo hi a lehlamah chuan a lawmawm zawk awm e. Ram changkang zawk leh hnam changkang zawkte chuan ‘Sir’ tih hi mi ropui leh chhuanawm te nihna atana an pek bik a nih laiin keini chuan dawhkan kianga Chair vir theia thu tawh phawtte chu ‘Sir’ kan han tum ta thin a ni si a. Kan sakhaw rawngbawltu zinga thenkhatte ngei pawhin ‘Sir’ tih kher hi zuk phut a maw le!

Hetiang hi vawiin huna kan nihna tam tak zinga thenkhatte chu a ni tlat si a, heng bak pawh hi sawi tur a tam a, nitinin thilmak tak tak hmuh tur leh hriattur lah a awm thar reng bawk a nih hi. Kan Politiciante zinga Vantirhkoh ang maia thinghlim famkim tum an awm a, thil tereuhte thleng pawha insawi fihlim tum an awm thin ni awm a han hriat phei hi chuan engtin hian nge mawh ram hruai hi an tum ang aw tih ngaihtuah tham tak a ni hial awm e. American President hming dai tawh ngai lo tur Lincoln-a’n ‘Ka hlim chu kawi teng tung mahsela ka dinngil phawt chuan pawi ka ti lo’ a tihte hi awmze thuk tak nei a ni a sin.  Kan Politiciante zinga thenkhatin thubuai an neih changa thiam an chang zel mai leh thiam loh chang an la awm thei ngai reng reng lote hi ngaihtuah tham tak a ni bawk awm e. Chutih laiin ram leh hnam hmangaihna avanga chhungkaw retheih phah lah sawi tur an vang pharh maiin an mawm tual tual em ni tih tur an la ni zawk zel thung bawk siin, Concrete Building an sa khir uai uai a, hmun thenkhata Concrete Building sakte lah chu a neitu hriat chian chiah lohte a han ni bawk te hi kristian ramah hian a mak tih loh rual chi a ni lo.

Mipui lam lahin ram hruaitu atan mi tha leh dik aiin an zar kan zo theih turte hi kan han thlang tling thin bawkin Party-ah te kan han ruh em em mai bawkte hi ram ropui min thlenpui lohna chhan tur zinga langsar pawl a ni thei maiin a rinawm. Kan ngaihtuahna chuan Switzerland of the East thlirin ngaihtuah phah mah ila a tak ramah thung chuan a hlat lam kawng kan zawh char char zawk emaw tih mai tur kan ni si. Ram hruaituin hnathawh that leh ram mipuite tana ngaihtuahna hman aia popular lam a buaipui zawk chhung hi chuan kan naktuk hun hi thlir ngam pawh a ni kher lo ang a, lemchanna hmun dawhsan ang maia ram rawngbawlna hmun hi ngai an lo awm phei chuan kan ram hi ngaihtuahawm tak a ni ang a, a chhunga mipuite hmalam hun hi ngaihtuah ngam pawh a ni lo hial mai awm mang e. Chuvangin ram leh hnam hmangaihna avangin ngaihtuahna lo hman ve chang pawh hian lung bang sut ang maia sut tlang har thil tam takte avangin tha a zuai leh mai thinin kan beidawn hial thin bawk a. A harsa lai ber mai hi sut tlang ngai lai tak chu a ni bawk si a.