KA PATHIAN

Mahmuaka Chhakchhuak

27/12/2017

Ka Pathian chu vanah a awm an ti ṭhin a, kei chuan hmuntinah a awm ka ti. Amah chu eng ang hmelpu nge erawh ka hre lo nain a hmel chhe lo a nih ka ring a, a mitmeng pawh  engkim hmu tlang thei vek tur ang hialin a fim kak ka ring bawk a ni. a kiangah chuan mitin an tlangnel ka ring a, tlangnel bawrh bawrha ngampa tur erawh chuan a tawng tui tama, fiamthu phei chu a uar vak erawh ka ring lem chuang lo. Engkim a tihtheih ka ring nain kan dil leh beisei ang vek erawh chuan a hlawhtlin tir vek ka ring lo. A chhan chu a rorelnaah min telh ve ngai tlat loh vangin. 

Ka Pathian chuan kan nimin hun a hria a, kan vawiin hun a hre bawk a, kan naktuk hun hman tur thlengin a hre lawk veka, kan thil tih tha leh tha lo pawh a hmuh hmaih chuang ngai lo. Nimahsela chuti chung chuan kan duhthlanna a nghah zawk fo avangin mi a thunun nghal lem lo fo thin. A nelawm em em rualin a zahawm a, a thusawia a rinawm avangin belhtlak a ni a, belh ngam loh tur khawp erawh chuan a hlauhawm si loh. Rilru thianghlim leh mi dikte tan chuan a nelawm em em a, thinlung sual leh kawhmawh bawlte tan pawh sima a lam pan theih turin a inhawng reng bawk a ni. Chuti chung erawh chuan midangte angin a bum ve theih tlat thung si loh.

Ka Pathian chuan amah hnaih turin mitin min sawm a, a lam pan turin min duh reng a, mahse keini erawh chuan  hlat tak tak ngam si loin kan hnaih ngam bawk chuang ṭhin si lo a, tuilirapin hun kan hmang reng zawk a nih hi. Manganna kan tawhin Amah chu kan au a, diklo taka sum lakluhna hun a awmin Amah chu kan theihnghilh leh a, kan damlohin A hnenah damna kan dil a, kan dam a, Amah aia kohhran mitmei veng zawkin rawngbawlna kan nei leh a, Eirukna leh kut tling loa lakluh  vangin In ropui leh nuam tak kan nei a, a chhungah ‘Kei leh ka chhungte chuan Lalpa rawng chauh a ni kan bawl dawn‘ tih thu tar kan hreh leh chuang hauh lo a, Bible lah chu kan dah langsar em em a, kan chhiar peih leh chuang si lo!

Ka Pathian chuan kan thiltih ang zelin lawmman min pe ṭhin a, nimahsela kan phu tawk lawmman kan hmuhin kan lawm chuang lo a, langsar taka rawngbawlna kan neih laiin A ni chuan pindan chhunga Amah betu chu a ngaithla zawk si. Rawngbawlna hi incheina atan kan hmang a, kohhrana nihna leh chanvo hi in chawimawina atan kan hmang ta zawk si a, chumi rah chu kan senga hei kan kristian percentage pawh a sang zawng niloa a hniam zawnga a ṭhan tak daih zel hi! Kohhran tin hian hmuh theih loh, vana kan Pathian mittlung tak hian rawngbawlna nei theuh ila chuan India rama HIV hrik pai tam ber kan ni hauh lo anga, Missionary Nuaih khat tirh hi Politician pakhat ṭawngkam mai niloin a takin kan tir thei ngei ang. 

Ka Pathian chuan he kan ram hi a hmangaih a, a mi chengte mil ang zela ram hi awm tur nisela chuan thlaler ram ang mai neih pawh kan phu hial awm e tih tur a nih laiin khawi lai hmun maiah pawh hian thlai a ṭha duh em em vek mai a, kawmthlangah zawng luruhro pawh paih ila a rawn vak chho leh theih hial ang tih tur khawpin kan ram leilung hi a ṭha a, khaw kar kawngah te lah hian kawi tinah tui in tur awm vek ang hial khawpin tui intlak lah kan hniar hnar bawk a, ruahtui lah chu hnianghnar takin kan dawng reng bawk nen. A chhunga chengte hian kan zir ngang siloa hmun danga thawn chhuah tur thlai tharchhuah engmah pawh tun hun thlengin engmah kan la nei lo tluang zel chu a ni a, kut hnathawktute nge ram hruaitute zawk demawm ta ang? 

Ka Pathian hian he kan Ram hi hei aia hmasawn tur hian rahbi min la rah tir hi ka ring tlat a, chumi hun nghak chuan nitin ring ka fán a, a hmanrua atan tute nge a hman ang? Engtik hunah nge chu hun chu a thlen ang? tiin chhanna hriat mai theihloh zawhna ka inzawt reng a, beisei nei takin ka thlir reng a, A mi thianghlim mi tlemte te ṭawngṭaina hi a thlawnin a awmtir ka ring si lo. 

Ka Pathian, ka Pathian engah nge min kalsan tia beidawng taka kan auh hun hi thleng mawlh suh se.