KRISMAS RUAIṬHEH

Mahmuaka Chhakchhuak

Dec. 1, 2021

 

CoviD hrilengin kum 2020 chhunga kan hunpui pawimawh tak tak min tihbuai a, kohhran ngei pawhin krismas ruai kan theh theih tawh loh hnuin kumin 2021 ah chuan Krismas ruai theh theih leh theih loh chungchangah ngaihtuahna kan hmang mek niin a hriat a. Chutih laiin Nov. 30, 2021 nia Kolasib Bawrhsap hoa thukhawm chuan Hrilengin ziaawm lam a pan zel thu sawiin inkaihhruaina (SoP)ah chuan mitthi vuina, khawhar lenpuina leh lungphunnaa zai chungchangah mitthi lawina kohhran leh an awmna branch YMA te’n tha an tih angin kalpui turin an rel a, krismas leh Kumthar vuakvetah kohhran committee-in rem an tih chuan ruai buatsaih an phal a ni. He thu hi thu lawmawm tak a niin hriat pawh a nuam hle mai. Zoram hmun dangahte hian hetianga tih hi a ni ve ang em tih erawh hriat ni chiah lo mahsela Kolasib District lamah chuan kohhran committee thu thu a nihna chen a awm tawhin zalen khat chuan an zalen ta a ni phawt mai.

Kohhran hoin a huhoa ruai kan theh thin hi kan chin tanna tak hriat har tak ni tawh mahsela Krismas kan hman tanna erawh kum 1904 a niin Lunglei zosap pahnihte hoa Aizawla hman a ni. He hunah hian vawk pathum lei a niin talh a ni a, zaikhawmna nen hun hman a ni a, hei vang hian krismas hman tanna atang hian ruai pawh hi theh tan ni awm tak a ni. Heta tang hian kan la ching chho ta zel ni pawhin a hriat a, Pathian zarah harsatna lian tak tak awm thinin buaina te han awm bawk thin mahsela ka hriat sual loh chuan kum 2020 Krismas hunah chiah kha krismas ruai kan la theh theihloh hun a ni awm e. Hei kuminah chuan hrileng pawhin kiam lam a pan zel niin a hriat a, hetianga boruak a awm zel chuan krismas ruai pawh theh thei tur khawpin min kian san mai thei a ni.

Tuna SoP kan neih ang phei hi chuan zaikhawm phal loh ala nih bawk si avangin kohhran hote pawhin ruai lo theh thei teh reng pawh ni ila zaikhawmna telloa ruai theh chu a ho viau thung lawng maw le. Inkhawmnna hmunah thusawi kan ngaithla ang a, inkhawm banah mahni In theuha hawngin ruai theh hun tia kohhranin darbi a tuk hunah kan pankhawm leh ringawt ang a, Dispo plate hmang tein emaw kan ei a nih phei chuan mahni Ina ei nen a danglamna a tam lua lo mai thei. Kohhran hoin fatu an ruatte hmangin kan ei tur min siam sak chu a danglamna awmchhun a ni mai awm a sin. Chutih lai erawh chuan krismas ruai theh leh theh loh hi kan tangkaipuina leh hlawkpuina hi sawi tur a tam lem lo viauin a hriat a. Chutih chung erawh chuan a tuihang hawp mi tan chuan bel lian hmanga chhum chu alo tui zawk deuh nge nge turah ngai ila, a manhla viau thei thung ang.

Krismas ruai ṭheh hi kum 1904 lai atanga kan lo chin chhoh niah ngai ila, kohhran tinte pawh hian kan la ching chho zelin hnam nuna bet tlat ang maia kan neih tawh pawh a ni hial awm zawk e. Amaherawhchu kohhran hoin hetia ruai kan theh hi enge hlawkna ni ang tih hi ngaihtuahnaah a awm thung a, mahni puar leh fanna atan mai chauh hian a ni zawk lawng maw le a tih theih awm e. Ka sawihnawm lam erawh a ni hauh lo nain kan ruai thehna atana sum leh pai kan thawhkhawm tam tham takte hi ramthim/ ramthar lama rawngbawlna atan pe zawk ila chunglam malsawmna hi kan dawng zawkin kohhran ngei pawhin thlarau lamah malsawmna tam tak hi kan dawn phah zawk lawng maw le? Kan tih than leh kum tam tak kalphunga kan lo neih tawh a nih vanga kalphung thlak chu harsa ti kan awm ngei ang tih chu hriatsa a ni nain kohhran a nih ang ngeiin thlarau lam malsawmna kan dawnna tur leh rawngbawlna zau zawk lam chu kan hawi dawn lawm ni? Tute emaw chuan hrehawm lo tiin lo hrethiam chiah lo pawh awm mahsela hriatthiam loh tur a awm kher awm lo e.    

Kristian ram kan nihnaah ngei pawha belhchian kan dawl loh dan hi thui tak sawi tur a awm a, khawvel kristian tam tak zingah hian Mizote kristian ang hi an awm ve kher pawhin a rinawm loh. Kristianna chi rawn theh tute pawh an demawm thei hial dawn alawm tih turin kan kristianna hian belchian a dawl loin kan sakhaw rawngbawltu thenkhatte phei chuan ringlotute pawhin an tih duh ngai hauh loh tur ti duh hialte an ni a. Pawnlang chauha ringtu tha kan nihna leh chhungril nun tak nei hauh loa nitin hun kan hmanna zawng zawngte atang hian harchhuak thei hlauh ila thil lawmawm ber a ni thei hial awm e. Heti chunga mahni inhmu duh miah lo ringtu kan la nih zel phei chuan kan hmalam hun hi a thim viau ngei ang.

Krista hnungzuitute kha chuan hrehawm pawisa loin chhel takin an zui thin a nih laiin keini thung chuan nuam tak leh puar tak chunga zui kan tum emaw tih turin kumtin khel loa ruai theh kan han tum ringawt pawh hi a dik chiah em aw tih tur a ni. Krismas ruai theh tia kan puar leh fanna atan hian sum leh pai tam tak a luangral lo thei si loh avangin chhungkaw tin atanga thawhkhawm hmanga buatsaih a ni thin bawk siin kan sum leh pai luanralna hi a tisa viau pawhin a sawi theih awm e. Hetianga han ngaihtuah chian chuan kumin krismas ruai theh hi lo theihin lo theh theih ta chiah loh pawh ni ila kohhran lam chuan ramthim/ ramthar lama rawngbawlna atan hian kan sum leh paite hi thehchhuah hlauh zawk ila chunglam malsawmna hi kan dawng zawk lawng maw. A nih loh vek pawhin kohhran zinga chhungkaw harsa leh chhumchhia zawkte hnenah hian sem ral ta hlauh zawk ila enge in ngaih ve dan ni le?