PU HAUKHUMA HAUZEL NEN

Mahmuaka Chhakchhuak

Nov. 19, 2021

 

 

Pu Haukhuma Hauzel hi a chanchin ka lo hre tawh thinin Mizoram sorkarah dinhmun pawimawh tak tak alo chelh tawh thin tih pawh ka hria a, Chief Secretary a lo nih tawhna pawh ka hre lar viau bawk. Nimahsela chuti takin amah hi belhchian tumna ka lo la nei ngai chuang hauh lo a, tunhnaiah hian kan inbe zauh zauhin kan ngaih pawimawh thilte kan in share tawn thin hial a. Hmaichhanah erawh kan la inhmu hauh lo a, Nov. 18, 2021 niah khan amah zawkin min rawn be hlauh mai a, hmaichhan ngeia inkawm tumin a hun atan Nov. 19, 2021 chu ruahmanna kan siam tlang ta a. Amah lah CoviD hrilengin lo man vein engemaw chen an lo inkhungin tunah erawh an lo dam fel tawhin an damkawr hlim hlawt lai a ni a, inkawmna hun remchang min siam sak thei hi ka lawm hle a ni.

Amah hi tawngkam chuang bang hmang ngai lo leh sawi tur tak chauh sawi mai thin mi hi a ni a, tawngkam thiam tia sawi tur pawh a ni hran lo. IAS retired meuh a nih avangin a chanchin hriat chak tam tak ka neiin dilchhut takin ka zawtin tha takin min chhang zel a, retheihna tam tak alo paltlang tawh chanchin a sawi phei chuan mittui a kochhuak thei dawn hialin ngaihnawm takin a sawi a. Kei lahin inthlahrung lo takin zawhna chhan har hmel tak tak ka zawt bawk a. A nih leh Pu Lalhmingliana Saiawi chuan a service lai khan ‘Pathian hi ka tih a ni’ tiin kuttum lek vahin a sawi a, nang hian i service lai khan hetiang hian i sawi ve thei em? Tihte ka zawt khawl khawl a. Nimahsela a ni chuan ‘Pathian zarah kum 35 vel ka service lai khan sulhnu pawr ka neih ka hre lo a, hei tunah ka lo chawl tawh bawk a, an duh tawkin ka sulhnu kha chhui ta sela, ka tana hrehawm tur a awm ka ring lo. Sum thianghlim lo lak ka nei lo a, thuneihna hmanga dan bawhchhiatna ka neih ka hre lo bawk’ tiin a sawi a. A sawi laia a mit meng ka thlir reng bawk avang chuan dawt a sawi ka ring hauh lo.

A nih leh Mizoram Chief Secretary i nih lai khan Cabinet Meeting hmunah CM leh Minister zahawm tak tak kiangah i thuin Sorkar thil pawimawh ber ber in rel fo thin ang a, chutiang hmunah chuan i kianga mite chu Politician an nih avangin eng emaw deuh taka ngaihdan in an lohna neiin i thu ngawi reng nge i hnial ve zawk thin? Tiin ka zawt a. A ni chuan CS ka nih vangin ka thu ngawi reng ngai bik lo a, Anni chu Politics lam atanga Cabinet –a thu an niin kei chu Administration lam avanga Cabinet-a thu ka nih thung avangin ka nihna chu chiangin ka ngaihdan ka sawi hreh chuang hauh lo tiin a sawi a. A bik takin Mizoram tana hun pawimawh tak kan tawngin mautam tam lo thleng tura inbuatsaihna kan nei a. Kan CM, Pu Zoramthanga khan Mautam lo thleng mai tur beihletna atan Bamboo Flowering and Famine Combat Scheme (BAFFACOS) kha Centralah 270 Crore lai a dilchhuak a, kha thil kha keipawhin ka veiin a bik takin kan CM nen chuan thinlung zawng zawngin kan veiin ka hria. Cabinet Meetingah ngei pawh ka ngaihdan sawiin Urban Area (Aizawl khawpui huam chhung bik)a chengte retheihna leh Thingtlanga kuthnathawktute retheihna hi a inan loh avangin he Sum pawh hi Thingtlang lam atana hman nisela tiin ka ngaihdan ka sawi a, Minister leh CM ngei pawh chuan tha an ti nge ni an ngawi reng hlawm mai a, sawiselna leh hnialna a awm loh avang chuan tha an ti ni turah ka ngai a. Meeting zawh kan bang, Ina ka hawng chu ka inthlak fel hmain Minister pakhat chuan min rawn phone zui nghe nghe a ti a.

Chutiang taka kuthnathawktute puihna tur kan buaipui avang chuan kan nu (a nupui) ngei pawh chuan alo veipui ve bawkin tumkhat chu Imphal-a an awm lai hian min rawn phone a ‘Hei Manipur lamah chuan Buhfai a tam a, sem turin ka rawn hawn mai dwn em ni?’ a rawn ti a, kei chuan ‘Ni e, chutiang a  nih chuan rawn hawn ta che’ ka ti e a ti a. Kei lah chuan dilchhut takin Manipur atanga in nuin a rawn biak che chuan chuti ringawt chuan em ni i chhan tiin ka hriatchian duh avangin ka han zawt nawn leh kher a, a ni pawh chuan ‘Ni e, Truck remchang kal tur a awm avangin Buhfai rawn phurh a duh thu min rawn hrilh chu a tha alawm tiin ka chhang mai’ a ti a. Tichuan Truck chuan Buhfai chu Mizoram a rawn thleng tain Chief Secretary Bungalow (tuna Assembly Speaker chenna hmun) ah chuan dahin chhungkaw khat atan 5 Kgs ang zela semin a duh apiang tana lak theih turin Buhfai chu a thlawnin an sem ta a. Hei hi a hnu deuhah chuan keimahni chhungkua chauh chuan kan tlin loh mai dawn avangin a duh apiangin Buhfai leh pawisa angte pawha an rawn dah theihna turin a hmingah JOSEPHA BUHZEM kan vuahin Mizoram hmun hrang hrangah kan sem bawk thin tiin a sawi a.

JOSEPHA BUHZEM hi an chhungkua chuan an buaipui nasain a bik takin annu phei chu a phur lehzualin ama buaipui vek a ni ber zawk a. Mizoram hmun hrang hrangah lirthei hmangin an sem kual a, sorkar pawisa hmang miah loin an kalpui a ni. Hei hi thenkhatte chuan Pu Haukhuma chu sorkar hna atanga a chawlh hnuhah Politics lama kal a tum a ni maw tiin an lo sawi hman bawk a. Nimahsela a ni chuan chutiang engmah awm loin Mizoram hmun hrang hranga kuthnathawktute harsatna phuhrukna atana an theih ve tawk an lo ti ve mai chauh a ni tiin a sawi. A sawi ang ngei hian a chawlh hnuah pawh Politics lamah a rilru a pe lo char char a, tun hnaiah ZPM ah a lutin hetah ngei pawh hian nihna leh chanvo engmah beisei a nei loin Policy vanga awm mai chauh a nih thu min hrilh bawk a.

Heng bakah hian thil tam tak kan sawiin bengvarthlak tak tak thu min hrilh bawk a, tunah kum upa lam tawh nimahsela amah hringtu pa la dam thu a sawi bawkin vannei ka ti hle a ni.