ZPM HRUAITUTE HNENA THUCHAH

Mahmuaka Chhakchhuak

Dec. 13, 2021

 

Chibai ṭha ber kan han buk hmasa a che u.

 

Ram tana inthawhrimna avangin vawiin huna zoram hmuntina ZPM thli a tleh hi lawmawm kan tiin mithar lawmluh tur an awm reng hi chunglam malsawmna a nih ngei pawh kan ring a, in chanchin hi ngaihnawm kan tiin mahni awmhmunah kut kan lo beng ve thin a ni. Zoram politics ah mipui beidawng an tamin beiseina nei tawh reng reng lote pawh an beidawng hial titein fiamthuin an sawi a, chutiang karah chuan mipui beidawngte tana beiseina ni turin kum 2017 ah Pawl hrang hrang paruk infinkhawm hmanga Zoram People’s Movement (ZPM) in rawn din ta hi lawmna avanga kut beng an tam a sin. Amaherawhchu Politics chu khawvel thil ngang a niin ZPM ngei pawh chuan boruak chhiat chang leh that chang in nei lo thei lo a, tunah meuh chuan Pawl paruk zinga pahnihte chuan ZPM atanga inpuchhuak ang deuhin an han awm a, hetia ngaih mai chuan kawhmawhbawl chan te pawh an chang zawk em ni tih tur a nihna a awm tho bawk awm e.

Chutiang chung chuan ZPM chuan hmalam pan ve bek bek zelin pawnlam aṭanga beihna awm reng karah chhunglam aṭanga boruak engemaw hi sawi tur alo awm leh zauh thin bawk a. Pawn lam aṭanga beihna hi chu ṭanrualna ṭha tak nena beihlet a har miah loin hneh mai theih pawh a nihna lai a awm zawk a, chhunglam atanga boruak ṭha lo awm erawh hi chu hmehmih a har a ni ang a, hlet alo neih ve zel bawk avangin pawlin a tuar lo thei lo ṭhin a ni. Chuvangin ZPM chhungrilah hian Rawhtuina Mei paltlang lem lo a mahni ṭhahnemngaihna leh phurna aṭang ringawta chanvo sang tak chelhtute aṭang hian harsatna hi alo piang zawk em ni aw a tih theih ṭhin. Kalphung Thar pawh mipuiah han sawi viau ṭhin mahsela anmahni berah Kalphung Hlui zawk a lansarh miau si chuan mita khanchhuk awm ang maiin mit timimtu lian tak a ni lo thei ṭhin si lo a ni.

Hruaitu nih hi tlin a har a, chu mai bakah hruaitu nihna hian kentel a ngah bawk ṭhin avangin tu tan mai pawh hian cho ngawt chi a ni hauh lo. Politics lamah kher ni lo NGO leh Kohhran thleng pawh hian mi tam takte chuan hruaitu nih hi an chakin an han duh viau ṭhin tak naa mi ṭhenkhatte hi chu anmahni Inchhung khur pawh enkawl fel hleithei lo hi an lo ni ve tho mai ṭhin a, ‘India Hnam Pa’ tih khawpa hruaitu chhuanawm Mahatma Gandhi ngei pawh khan ama Inchhung enkawl chu har a tih thu a sawi hial kha. Hei vang hian hruaitu nih tling tur chuan mahni inchhung enkawl fel mi nih mai bakah Pathian kohmi an nih pawh a ngai bawk awm e. Tunlaiah ngat phei chuan sum leh pai nei ve deuh loh phei chuan thawm a neih tak tak theih loh an tih hi a dik thei viauin a rinawm a. Chutih laiin sum leh pai hmachhuan erawh a dik chuang hauh lo a, sum leh pai avanga hruaitu nih tum phei chu sum senthlawnna awlsam tak hi a ni thei bawk ang.

ZPM hruaitu zingah Kohhran rawngbawlmi tak tak leh Kohhran tana mi ṭangkai tak takte an han awm ṭhin kha thla alo muan tehlul nen an ni kha vawiin thleng hian a langsar pawlah ṭang reng thei sela ZPM pawh hian hma a sawn lehzual a rinawm nain anni rawngbawltute kha an thawm a rehin an ni aia langsar zawk an lo awm leh ṭhin hian Party dangte nena thuhmun renga ngaihna a awm lo thei ṭhin lo. Heti a nih hi chuan enge ZPM danglam bikna ni ang a, enge ZPM chu mipuiin kan ngainatna chhan bik tur ni ang tih hi zawhna lian tak awm thei nghal chu a ni.  Chu mai bakah chuan engkim bulṭan ngai chunga ram vei chu hautak deuh mai a niin Unit din thar ngai bawk, Block din thar ngai bawk chunga Headquarter ber hruaitu remfel alo ngai ṭhin bawk hi chu hautak hmel tak a ni. Chuti chung chuan ZPM Party ah hian beisei nei mi tam tak an la awm tlat thoin mithar lawmluh tur hi an la awm reng tho hi a chhan hre chiang chiah lo mah ila, engemaw chu a awm a ni ngei mai.

Pawl chakna tur chuan midang ngaihdan lak thiamte a ngaih ṭhin tehlul nen ZPM ah chuan inti fing tak tak hi an tam niin pawnlam mite chuan an sawi ṭhin a, chutih laiin mahni ngaihdan anga kal ngauh ngauh pawh an lo la awm nia hriat a ni zel bawk nen. Hetianga sawi neuh neuh awm hi a reh vat loh chuan anmahnia beisei nei tam takte hi a hnar ngeiin a rinawm a, anmahni inhmuh aiin an chhe daih zawk thei a ni. Phungpuinu ngei pawhin amah chu mawi a intih tehlul nen khan midangin mawi an lo ti hauh lo mai ang kha ZPM Party pawh hian an chan a nih theih avangin rilru zau tak pu thei hram se. Tin, senior tawh intih vanga bial vil ve ngawtte, green signal hmu intih emaw avanga din tum ngawtte leh hruaitu zinga inhre pawh hauh loa bial lo invil thuah awm anga sawi hi tak tak ni lo hram bawk sela, tak tak a nih chuan ZPM Party hian a chhiat phah hlauh thei a ni. Kalphung Thar nena kal tur an nihna hre reng ṭhin sela kan duh a ni.   

Party hruaitu ber – President ber hi Party dang anga thawm a nei lo lutuk hi a nih dan tur a ni lo. Kohhran Upa a nih lehnghal bawk avang hian lansarh tir hram hram hi thil pawimawh tak a nih laiin a ni aia langsar leh thil tithei zawk hi an awm nia sawi a han awm pawh hi mipui hriatthiam tura siam rem vat a ṭha ngei bawk ang. President ber chuan thuneihna pawh kengkawhin thu leh hla pawh nei tam ber ngei rawh se. Chutih lai chuan Vice President pali ngawt mai a neih bakah Leader ala awm zelin Working President ala awm zel bawk hi keini lo ngaih danah chuan a ṭulna awmin kan hre lo a, Pawlin a ṭhat phahna tur hi kan hrethiam pha chiah lo a ni. Kan hriat phak chinah Political Party hruaituah hetianga hruaitu lawk tam hi an awm kan la hre ngai lo a, pawlin chak phahna atana a hmang a nih erawh chuan a ṭha viau ngei ang.

A tawp berah chuan ZPM hi nimin lawka din a niin heti khawpin member chhiar tham an lo awm ta hi tute emaw thawhrah ringawt hi a ni lo tih hre reng ula kan duh a, Ram leh hnam hmangaih tak tak tute hi hmun tinah an awmin anni chuan nangmahniah beisei an neih vang a ni tih pawh hi hre tel bawk ula kan duh a ni. Chuvang chuan chapo hman inni lo a, bansan ngai bansanin, inngaihtlawmna nena hun hmang reng turin kan duh bawk a che uin, in ṭawngkam chhuak chu chi a al, khawngaihna tel ni zel bawk rawh se.