HMELṬHATE HMELṬHATNA

Mahmuaka Chhakchhuak

June 22, 2021

 

September ni 7, 1976 chuan Paul leh Linda McCartney te nupa chuan kumtin a an neih thin in ‘Buddy Holly Party’ an buatsaih chu chhim turin Eric Clapton leh Pattie hi chu an insiam mawlh mawlh a. Chutia an insiam lai mek chuan Eric Clapton chuan ‘Wonderful Tonight’ hi Pattie Boyd-i insiam lai a nghah pahin a lo phuah mawlh mawlh bawk a, tichuan awlsam ang reng takin vawin thlenga hla chuai lo chu a rawn phuah chhuak ta a ni.

Suangtuahna mitthlain he hla a phuahlai hi han mitthla zui ila, Pattie chu darthlalang hmaah thawmhnaw tawngchham tak tak leh a fuke zawng zawng langkim thei dawn hial turin thawmhnaw chhing leh bul tak takte pawhin a inthuam mai thei a. A nih loh vek pawhin Underwear nen chauh emaw pawh a awm hial thei bawk awm e, chutianga hmanhmawh lo tak leh nalh thei ang ber tura a inchei lai chuan Eric Clapton chuan a kiangah lo thuin a nupui sakruang engkim mai chu fiah takin alo thlir a, a mit ala hle tih pawh a chiang reng a ni. Nupa an nih miau avangin Pattie ngei pawh chuan a zahpah vak kherin a rinawm loh a, chutianga alo thlir tih pawh chu a hre thoin a rinawm, nimahsela a inchei lai chu a thulh phah chuang lo a.

Tlar hmasa berah chuan ‘tlaine’m-ah chuan a ni chuan a thuamhnawte chu hlipin darthlalang hmaah chuan a sam buang sei hniang chu a khuihin a han suasam vel a. Chutia hmuhnawm ti taka ka thlir lai chu min hmuin ‘lungawihna tur enge maw hmuh i nei a ni maw’? a ti a, kei chuan ‘nei chiang e, zanin chu i hmuhnawm takzet a ni’ tiin ka chhang a’ tiin a han ziak a. Nupa pawh ni ila hetianga chiang hian kan nupuite pawh hi kan la hmu bik kher awm lo a sin. Eric Clapton chuan a nupui mawina hi a hmu fuh tlat a, hetiang khawpa mawi hian Pathian hian alo duang che a ni maw ti rilruin a awm mai mai thei ta ngang lo pawh a nih ngei a rinawm. Pattie hi chuti taka hmeltha chu lo ni bik chiah lo mahsela a hmalama hnute nalh taka lo pawng thiang chu zantin alo khawih sak ziah pawh nisela vawiin tlai anga chiang hian ala hmu ngei kher lo pawh a ni thei e. A dul, a mal pahnih sei tha tak leh ngo nalh leh mum tha takte leh a mawng bawr poh tha takte ngei pawh chu hnunglam atang leh hmalam mai bakah sir lam atang pawhin chiang takin a han thlir nawn sek ang a, lungawithlak hliah hliah hian a hria a ni ngei tur a ni.     

Kum 40 chuang liam tawh ami mah nisela he hla hi ala chul lo a, rock hla tha classic tling pha a sawi fo tawh tur hla mawi a ni. Pattie hi a vanglai chuan International model lar ber pawl, British hmeichhiate hmelthat zia khawvela phochhuaktu pakhat ni a sawi ngat a ni bawk a. Eric Clapton hi vannei a inti ngei pawhin a rinawm a, hetianga hmeichhe nalh leh pian zeiin a hmangaih hi phulo a intih hial pawh a rinawm. Engpawh nisela, he party naa an kal dawn tlai hi chuan a hlim dan tur hi suangtuah phak bak a ni ngei ang. Pattie ang hmeichhe nalh hi an awm lo a ni hauh lo a, an hunlai ngei pawh hian an awm ngeiin a rinawm a, nimahsela Eric Clapton hian hetia ‘Wonderful Tonight’ phuah phahna atana a han hman takah hi chuan a lar lehzual phah bawk reng a, ngaihven pawh a hlawh bawk reng a ni. Rosangliana (Zorock) ngei pawhin ‘Tha hang, ngaihnobei’ a phuah chhan Aizawl nula pakhat pawh kan ngaihven a ni lawm ni kha?

Zep thu a cheng lo, hmeichhe hmeltha hi hmuh an nuam ngang mai a, sakhaw rawngbawltute ngei pawh hian hmuh kan har an ti ngeiin a rinawm. Rev. Vanlalnghaka ngei pawh hian engtin emawni tak a sawi bawk em kha. An mitmeng, an hnar ngul leh an hmuite reng reng hi an inhmeh bik hliah hliahin a hriat a. Mipa chauh niloin khawvel hian hmuhnuam a ni ti tawp mai zawk ila a dik ber awm e. Nimahsela chutiang taka hmeltha pawh chuan chhungrilah chhiatna ruk engemaw tak an lo neih ve tho thin avang hian hmeltha tam takte hian fak an hlawh vek lo a, hmeltha tam takte hi sawi hnawm an ni fo thin a ni. A thente phei chuan an hmelthatna chu sual khura kalna atna hmanraw leklam berah te an han nei bawkin a thente chuan an hmelthatna chu hmingchhiat phahna atan an hmang bawkin vawiin thlenga la sawi sep pawh an awm hial bawk a nih hi. Hmeichhe hmeltha vanga mipa talbuai lah chu kutchang thleh nghauh nghauh tham an awm a. Ram roreltu lian leh ropui tak tak atanga chhiahhlawh tlangval leh sakhaw rawngbawltu thlengin kan bang chuang lo a nih hi. Napoleon leh Josephine te chanchin rengin khawvel a deng chhuak hneh a, Nehru leh Edwina Mountbatten affair te ngei pawh kha ngaihnawm tham a tling. Midangte pawh sawi tur an tam mai.   

Heti taka Pathianin alo duang bik hi mipa tan vanneihna nge vanduaina tih pawh hi hriatthiam hleihtheih a ni kherin a rinawm loh a, amaherawhchu chutih lai chuan mipa tel loin an awm thei chuang bik hauh si lo. Leilung piantirh ata inkawp tura khuanu duan kan ni miau si a. Hmelthain mit alak viau laiin hmeltha zawng zawng hi mipain an ngaizawng hauh chuang lo a, hmeltha apiang hi chawimawiin an awm hek lo. Hmelthatna hi hmachhuan tlak a ni lo a, hmelthatna phena nungchang mawina hi chawimawi tlak an nihna tak zawk chu a ni. Hmelthatna chu hmatheh atan chauha hmantlak a ni a, hmelthatna chu sumdawngin midang hmuh theih tura a bungraw phochhuah ang mai chauh hi a ni a, chumi phena an nungchang avang chuan chawimawi an phuin fak an hlawh thin zawk a ni.  Chu nungchang mawina chu khawvel awmchhunga chhilhbo hlen theih a ni si lo a. Chu ngei chu hmeltha tan leh hmeltha lem lote tan pawha midangte hriatrengna tlo tak tur zawk chu ni.