TUM CHUAN KAWNG A AWM

Mahmuaka Chhakchhuak

Aug. 30, 2021

 

Nu chhul atanga piangchhuak theuhte hi kan lo inang lo thei hle mai zawng a nih hi. Mizo chhulchhuak zingah ngei pawh hian mi chhuanawm tak tak sawi tur kan hre hlawm ngei ang a, vawiin thlenga kan zinga la awmah chuan Rev. Vanlalbela te hi mi chhuanawm zinga sawi hmaih chi rual an ni lo ang. A chhanchu a hringnun zinkawnga harsatna a paltlang zawng zawng hi ngaihnawm thamin a ropui a, midang tana entawn tlak khawpin nun a hmang a ni. Amah avang hian ‘tum chuan kawng a awm’ tih hi thu mai a nih loh zia a hriat theih a, amah avang hian Pathian rinchhana kal tan hlawhtlinna a awm tih hi a chiang a ni. Mi pakhat, James Madison chu Father of the Constitution, Father of the Bill of Rights tihte a koh a ni hial a. Amah hi March 16, 1751 a piang niin kum 1809 – 1817 chhung khan President of the United States a ni nghe nghe. George Washington khan President hmasa ber a nih khan a thusawi tur (Inaugural Address) a ziah tir a, chu a thusawi chu US Congress  (an Parliament pahnih sawi kawpna) khan tha an tih em avangin a chhanletna chu amah bawk an ziah tir leh hial a ni. Hetiang mihring hi khawvelah hian an tam kher awm lo e.

Khawchhak lam Philippinnes ramah khian President danglam tak an nei bawk a, a hming chu Rodrigo Roa Duterte a ni a, kum 1945 a piang a ni. Philippines khawpui lian pathumna chu Davao City niin tunah phei chuan mihring 1,776,949 (2020 census) lai an cheng tawh nghe nghe a. He Khawpui hi tunhma lamah chuan ‘Tualthahna khawpui’ tih khawpa tawp leh rapthlak a ni. Nimahsela Duterte hian kum 22 chhunga Davao khawpui a enkawl khan Philippines ram chhunga khawpui muanawm berah a chhuah thei a. Asia chhim chhak biala khawpui ralmuang ber pakhat tia sawi a ni hial bawk a, hei chauh hi la ni loin khawvel khawpui him 4-naah a ni hial thei a ni.  Duterte hian Davao khawpui siamthat a tumnaah hian tihtakzetin a bei a, ruihhlo zuar luite chu tihhlum pawh a hnial lo a, chutih rualin ruihhlo sim duhte chu Rehabilitation and Treatment Centre ah a dah zel bawk a. Tihtakzeta ruihhlo sim duhtute hnenah hian thlatin Peso 2,000 (India pawisain Rs. 7280 vel)a pe thin bawk. Hetiang taka a thawh avang hian kum 2014 khan World Mayor Prize pek an tum a, a ni lah chuan dawng duh loin ‘Chawimawina ka dawn chhan tur a awm lo, ka hna ka thawk mai a ni’ zuk tia maw le.

Davao City-ah hian thupek khauh tak tak an chhuah reng a, zing dar 1-8 inkarah zu lei, zu hralh leh in khap tihte, mipui punkhawmna hmuna zu in loh tur tihte, zan dar 10;00 hnu lama kum naupang zawkte nu leh pa telloa pawnchhuah khapte, motor tlan chak bituk leh thupek dang tam takte chu khauh takin an kengkawh a. Amah Duterte ho chuan an bawhzui chak bawk avangin khawpui chhungah dan bawhchhiatna a tlem phah a, mipui nunaute tan ngei pawh khawpui muanawm alo nih phah tain tunah phei chuan khawvela khawpui muanawm berte zinga chhiar tel alo ni ta hial a ni. Duterte hi kum 2016 khan Philippines ram President atan lakluh a ni a, lakluh a ni la lai hian inchibai khawmuang loin Cabinet meeting a ko nghalin Rampumah lungawi lo apiangin an lungawi lohna thu thlenna tur – Complaint Box Office chu chhun zan zawma hawn turin an rel thlu nghal a. Heng bakah hian amah leh Cabinet Minister-te pawh mi naran chan ve loh duhsakna engmah pe ve lo tura Civil Aviation Authority hriattir tihte leh thil dang pawimawh tak takte chu Cabinet meetingah hian an rel thlu nghal a ni.

Hetianga kan han sawi chiam nachhan chu tum chuan kawng a awm tih a taka kan hriat theihna atan a ni. Kan thenawm lawk Bihar State Chief Minister Nitish Kumar ngei pawhin kum tam tak Lalooa’n alo sawp chhiat vek tawh chu tunah chuan State dangte tana entawn tlak khawpin a rawn vawrh chho thei tlat te hian tum chuan kawng a awm tih a takin a rawn ti lang chiang bawk a. Nitish Kumar hi 24 November 2005 atang khan vawiin thlengin a la CM ta char char a. A khawsak zia hi han zir chian deuh chuan thil dang zawng aia lang sar em em chu TRANSPARENCY kan tih mai, sawrkar lang tlang hi a ni. A sorkar-in a thil tih reng reng mipui te’n an hriat zung zung theih nan RTI Act pangngai mai nilovin e-RTI system, Jankari Scheme a tih chuan mi rin leh support a hlawh em em a. Mipuite sum leh pai a ni a, a hmanna an hre ve bawk tur ani a ti hem mai a ni awm e. Tin, NREGS kan tih, keini lamah chuan kan VC emaw ruling party local hotute an in kawh nuaih nuaih-na ang chi ah pawh e-NREGS a ti leh ngat a. Mirethei bik te chuan fair takin an chanai leh thawh chhuah an chalai tur a ni a ti leh mauh mai. Mi hausa leh hausa in ei tawn chu thu hran a ni a, an sual vang pawh nilova, an background a chhiat avanga BPL, mi rethei ho hian a special a ngaihven an phu a ni a ti teu mai. Kan ram lama kan sorkar VIP ve tura anga ngaih, kan BPL enkawl dan nen chuan tehkhin peih chi pawh a nih hmel loh. Thil pakhat a hmalakna ropui leh em em mai chu mi rethei lo nei mite tana sorkar Bank ah loan lak phalsakin, sorkar kha guarantor-ah tangin uluk takin sorkar officer te’n an enkawl pui bawk a. Anni hi chuan an tum avangin kawng an hre zel bawk a, an hlawhtlinpui bawk a ni.

Kan ram ngei pawh hian anni ang hian hmasawnna kawngah kan kal ve theiin anni aia chungnung leh sang zawkah kan awm thei chiang. Nimahsela system fuh tawh lo laklawhah kan tang a, talchhuah tumin hmalakna tak tak a awm bawk si lo a nih hi. Sukna ngaiah kan su ka su ringawt a, ram hruaitute an tha tual tualin an In leh lo a ropui tual tual a, pawl hrang hrangin nawrhna nasa tak nena an beih chauhin an hamthatna an hmu thei emaw tih mai tur a ni bawk a, a thlawna thil sem hmangin mipuite lah min ti lungawi leh mai thin bawk si a nih hi. Hawh teh u, insawifiah ngai fo lo turte hian hnathawk ila, innghahna tlak tur hian kan ram hruaitute ngei pawh hian mipuite hi min hruai bawk teh u. Tangrualna nen he ram hi hmangaihna takin enkawl ila, sorkar hruaitu leh mipui inkarah awl awm lo turin thawhhona tha tak nen kan ram leh hnam tan hian ke i pen ang u hmiang.  Chaurau ek thaiin mi hnungah kan kal rei tawh bawk e.