LIKE A MAN

Mahmuaka Chhakchhuak

March 11, 2022

 

Zan khat chu kan nu nen damlo tlawh turin kan inphur chhuak a, kalkawnga kan tlan lai chuan kan hmaah hian motor lian (Truck full load) hi hmanhmawh lo takin a tlan a, pelh mai kan han tuma alo remchang loh lehzel bawk si avang chuan a hnungah chuan muangchangin kan tlan ve ta zel a. Chutia kan tlan naah chuan kan lirthei eng chuan motor hnung lam chu fiah takin a chhunin a hnung banga inziak te pawh chu chiang takin kan chhiar thei a, chutah tak chuan a ni ka thinlunga cham reng thu pakhat inziak ka hmuh tak chu ni. Chu thu chu – NO AIRBEG’S WE DIED LIKE A MAN tih hi a ni a, a sap tawng dik leh dik loh lam chu sawi kher lo mah ila a thu awmzia chu a hriatthiam theih thoin ka hria a. Mizo tawng chuan kan lirthei hian vanduai thilthuah lo chesual palh ta pawh ni ila keini chuan inchhanchhuahna turin hmanrua engmah kan nei ve hauh lo mai a, chuvang chuan mipa takin kan thi tawp mai zawk ang e tihna a ni ber awm e.

Lawng liante chuan chetsual palh thulha inchhanchhuahna turin hmanrua an nei a, Thlawhna thenkhatte pawhin parachute an nei bawk awm e. Chutiang bawkin tunlaia lirthei thenkhatte pawhin insut palh thulha invenna atan Airbag nei an awm bawk an ti a. Nimahsela kan hmaa lirthei tlan Truck lian te hi chuan engmah hmanrua an nei lo a, lirthei dangte nena insut palh pawhin Airbag an nei lo a, chetsual palh pawhin invenna tur engmah an nei lo a, lirthei chetsual dan ang anga tawrh tawp mai chu an hmabak ni mai tur angin an inngai ta ringawt mai zawk a ni. Chuvang tak chuan Like A Man (Mipa takin) tih tawngkam an han hmang ta zawk mai hi tlawmngaihna tawngkam ang pawhin a ngaih theih ang a, beidawng tawngkam ang pawh a ni thei tho bawk ang a, chutih rual chuan a tawngkam hi a mawi hrim hrim bawk a ni. 

A dik chiah alawm, kan hmalam hun tur hi tumahin kan hre lo a, eng nge kan tawn tur hi hriatlawk theihna engmah kan nei hek lo. Hriatlawk theih niin pumpelh theih nisela chuan tumah hian lirtheia chetsual kan duh lo ang a, savawm inseh tir duh tur pawh kan awm kher lo ang. Nimahsela kan hriat miau si loh avangin vanduaina chi hriang hrang kan tawk a, damdawiinah kan awm phah hial bawkin thenkhatte phei chuan an nunna hlu tak an chan phah hial bawk a, a pawi ngawt mai. Nang leh kei ngei pawh hian naktukah hian eng nge kan tawn dawn a, eng nge kan hmabakah hian awm ang tih hi kan hre lawk hauh lo a, keimahni fel loh leh dik lohna vang ni kher lo pawhin harsatna tawk thei kan ni reng mai. Chutiang a nih avang chuan Like A Man (Mipa takin) tih hi kan sawi lawk ve theiin kan thinlungin a pawm thei em le? Truck full load khalhtute chuan kan lirthei hian vanduai thilthuah lo chesual palh ta pawh ni ila keini chuan inchhanchhuahna turin hmanrua engmah kan nei ve hauh lo mai a, chuvang chuan mipa takin kan thi tawp mai zawk ang e tiin lungawih taka thihna thleng pawha hmachhawn an huam a sin.  

E khai, ava han pawimawh kher em aw tirawh. Mipa takin tih tawngkam hi tlangval laia fianriala nula tawmpuina hmuna hman tur ringawt chu alo ni hauh lo mai a, Zu inkhawmna hmuna hman chi lah a ni hek lo. Inhnial buaina hmuna hman chi phei chu a ni lo lehzual a, heng zawng zawnga hman hi tunlai tawngkam takin a thing nghet tlat tawh zawk a ni. Pathianin Joba hnena ‘Mipa takin i puan veng la’ a tih ang deuh khan mipa taka awmna hmun tur hi chu alo awm ngei zawk a ni. Chungte chu kan hriat loh hi a tha hauh lo a, a hun leh hmun taka Mipa taka kan chet pawh alo ngai bawk awm e. Tunlai huna kan tlangval tam tak ruihhlo bawiha an tang angahte hian Mipa takin ka rui ve ngai lo ang te hi han ti thei hlawm ila nu leh pa tam takte hian ‘Halelui’ pek an va han chak dawn hlawm em aw tihte ka thinlungah a rawn awm nghal bawk a.

Ruihhloin kan thalai a tihchhiat tam tawh ziate leh ruihhlo avanga chhungkaw buai kan tam tawh dante ngaihtuah hi chuan tui taka mut hi a har tawh hle mai a, ruihhlo lah chu nitiin man tur alo awm reng bawkin thahnemtham tak taka man alo nih hlawm bawk thin avang hian kan la inchenchilh hnai leh mai tih pawh a hriat a, ruihhlo lam chu umbo chi rual a nih rih hmel loh avangin keimahni zawk hian a telloa awm theih tumin Ruihhlo avang hian Mipa takin ka buai ve lo ang tiin emaw Mipa takin Ruihhlo hi ka ti ve lo ang tih tawngkam hi kan hman uar a pawimawh ta hle mai. A theih phei chuan darthlalang hmaa ding chungin kan mit taka han in en chungin vawi sawm te hi nitin sawi ziah thei ila a sawt viauin a rinawm a sin.

Mahni inrintawkna hi neih har tak a ni a, midangin min rinngamna tur phei chuan harsa tak a ni lehzual. Chutiang chu nungchang tha pangngai tan pawha neih har tak a ni a, ruihhlo timi tan phei chuan thil theih loh hulhual a ni zawk awm e. Nimahsela mahni leh mahni inhneh tur erawh chuan midang aiin keimahni bawk hi a pawimawh ber kan nih zawk thin avangin Pathian ngei pawhin Joba hnenah khan Mipa takin tih tawngkam a hman chhan pawh kha zawhna khirh tak a zawh duh vang a ni. Chutiang chiah chuan keini ngei pawhin thil harsa leh khirh tak kan hmachhawn dawnah hian Mipa takin tih tawngkam hi hmang ta fo thin ila kan hmaa harsatna leh thil khirh tak awm hi kan hneh thei zawk ngeiin a rinawm. Khawvela hmuhnawm ber chu harsatna kara mi huaisen che vel hi a ni a, chumi thawnthu bawk chu a chhiar tute chuan ngaihnawm an ti bawk thin a ni. Miin Ruihhlo a tih chhan hi a ruih duh vang hrim hrim a ni thei a, a thinlung beidawnna vang pawh a ni thei. Thildang vang pawh a ni ang a, ruihhlo ti duh khawpa a awm tawh chuan amahah inrintawkna a nei tha tawk lo tih a chiang reng mai a, chuvang tak chuan Mipa takin tih tawngkam hman uar hi a pawimawh riau pawhin a hriat.

Ruihhlo lam chauh pawh ni loin kan thiltihna kawng hrang hrangahte ngei pawh hian Mipa takin tih tawngkam hi mahni infuihna atana kan hman uar a pawimawh hle mai a, a bik takin harsatna leh hrehawmnate hmachhawnna kawngah hian a pawimawh lehzual ngei ang.