BEI LA, BEI ZEL RAWH

Mahmuaka Chhakchhuak

Aug. 25, 2021

         

Mizote hi engkima in beisei chi kan niin ka hria a, mi pakhatah hian beisei kan nei tam mah mah deuha hriatna ka nei a ni.

Kan Kristianna avang hian kan rilru ngei pawh hian lang loa mawi leh tha kan duh ang bawkin alang pawha mawi leh tha kan duh bawk a, a tha reng mai. Nimahsela, a chin tawk erawh kan hriat ngaiin ka hria a. Zaithiam chanchin kan sawi a, thiam taka a zaina chu fak mai ila, fak duh lem lo pawhin fak lo mai sela, chuti niloin a mimal nun thleng thlengin kan sawi thin hi a dik dawn em ni? Fiamthu thiam pawhin fiamthu a thawh a, mipui a ti nui hluah hluah a, a lawmawm em em a ni. Chu chu atan chuan a duty a ni. Fiamthu thawh zel tura a inbuatsaih theihnan i fuih chak zel ang u.

Christina Ronaldo chu Footballer a ni a, thiam taka inkhelhna mual chhunga a chet khan a hmuhnawm a, a tan pawh malsawmna niin sum leh pai pawh a hmuh phahin a eizawnna ber pawh a ni. Kan mizo rilru atanga thlir chuan a nupui neih dan a kristian lo, a fa enkawl danah a khirh lutuk emaw tiin kan sawi belh leh thin hi anmahni (tuipui ral daiha awm mah nisela) tan hlawkna a awm loh mai bakah an hnual phah thei a. Chumai bakah chuan keimahni ngei pawhin kan rilru chhiat zia kan sawi chhuak tihna emaw a ni zawk thei a, awmzia a awm vak lo thei. Angelina Jolie pawh pasal chuti zah a nei tawh tih vanga kan khawtlang nun nena hmehbelin kan han sawichhe chiam chiam thin tak naa chu ai chuan a hnathawh ropui tak takte leh fate tana a inpekna leh a taksa ngei pawh a inenkawl uluknate chu fak sak zawk ila awmzia a awm zawk thei.

Thuziak mi pawhin thu a ziak a, a duh duh a ziak a, a thuziak chu kan pawm vek lo a nih pawhin a mimal nun thleng thlengin i sawi tawh lo ang u. Mimal hming han sawi lang ta ila, tlemlai khan Mafaa Hauhnar (Fam) sawiselna ka hria a, ‘ JF-a style a la, chuti khati tiin mi pakhat hian Facebook group pakhatah hian a rawn sawisel chiam mai a, mi tamtak te lah chuan an lo thlawp lehnghal a. Kan rilru puitling loh zia kan ti lang mai mai a ni. Mafaa hian tu style pawh lo la pawh nisela a mimal nun a ni mai a, kan sawisel phak a ni lo. Thuziak mi a nihna hi hriatsak ila, a thuziakah erawh enghelh leh pawm loh kan nei a nih leh sawisel mai ila a tawk.

Doctor pawhin a Doctor nihna chu tlin takin thawk sela fak a hlawh a ni mai. Doctor ni reng si a Kohhranah te leh engemaw teah hian beisei chintawk i nei thin ang u. Chutiang bawk chuan Kohhran rawngbawltu pawhin tha takin a rawngbawlna chu thawk sela fak a hlawh ang. Chutiang niloa fak hlawh beiseia a thawh chuan a rawngbawlna chu a tlin lo tihna a ni. A rawngbawlna chu ama tarlan fo pawh a tul lo, midangin an tarlan duh leh tarlang zawk mai rawh se. Hetianga midang fak leh chawimawi kan harsatna chhan ber hi kan itsik vang a ni tlangpui a, kan el lo a, kan er vang ti pawhin a sawi theih bawk awm e. Chu chuan midang beng a fah lo a, beng a ti thlep thin zawk a ni.

Kan hnathawh leh tuina kawng a in ang lo ang bawk hian kan inpawm thiam pawh a tul reng a, Doctor-te hian hna ropui tak an thawk a, an fakawm em em laiin tlakchham eng engemaw an lo nei ve thei tho. Khawtlang inrelbawlna lam emaw Motor khalh leh enkawl lamahte chuan an rawn tlak vek loh mai thei a ni. Chutiang chiah chuan nang leh kei pawhin kan eizawnna emaw kan tuina hi thahnemngai taka kan thawh a, midang tana malsawmna ni thei tura kan lanchhuah tir fo a pawimawh a ni. Indian Prime Minister hmasaber Nehru ngei pawh kha vawiin thlengin kan fakin kan la chawimawi a, chawimawi tlak a ni a, fak tlak pawh a ni narawh e. Chutih lai erawh chuan a mimal nunah erawh tlakbalna lai a nei ve tho a, kutziak ngeia mi nupui duhlai lehnghal Edwina Mountbatten hnena Love letter a thawn zawng zawngte kha tam tham deuh a sin. 9 Kgs laia rit a ni e an tih kha. Nimahsela a hnathawh ropui tak tak avangin vawiin thlenga chawimawi a hlawh zawk a nih hi.

Nang leh kei ngei pawh hian kan tui zawng leh nuam kan tih zawng hi thahnemngai taka kan tih mawlh mawlh a pawimawh ber a, midangin an tih ve loh avang emaw an sawisel avang emawa kan bansan mai a thiang hauh lo ang. Thuziak mi kan nih pawhin kan ziak mawlh mawlh mai ang a, midang tana chhiar nuam leh bengvarthlak mai bakah an thinlunga cham reng tura kan ziah pawh a tha. Ram leh hnam veina lam hawia kan ziak a nih pawhin midang tana hlawkpui leh tangkaipui theih tur hawia kan ziah a pawimawh a, a tha zawnga midangin an pawm theih tura kan ziah hram hram a tha a ni. Chuti ni loa mi huat tur zawnga kan ziah emaw, midang khei zawng hlira thu kan ziah thin chuan hmelma kan insiam thei a, mahni hmakhua kan ti thim zawk hial thei a ni. Tin, nangmah ang bawka thuziak mi an awm ve teuh tho avangin a ber anga inngaih hi thil tha lo tak a ni a, tawngkam chapo leh midang hnuaichhiah taka thuziak mi chuan rei an daih tak tak thei ngai lo bawk a ni.  Thuziak tur hian hunbi a awm kher lo a, pindan chhungrila inkhung kher pawh a ngai hek chuang lo. A lan hun apianga ziah mai kha a ni a, Sherlock Holmes thawnthu ziaktu ngei pawh hian thenkhatte hi chu Inkhel ena Pavilion-a a thut laia a ziakte a ni.

A pawimawh ber zawkah chuan eng ti mi pawh nila, eng hnathawk pawh nila, i thiltihah chuan midang hriat khawpa i tih kha a tha a, kha kha midangin i hming an hriatna ber a nih dawn avangin chawl loa i beih char char a pawimawh ber. Chumiah chuan hlawhtlinna a awm a, hlawkna a awm hunah phei chuan i hun hman chu a hlu sawt bawk ang a, i tuina kawng atang chuan sum leh pai tam tak ila la lut thei dawn bawk a ni. Bei la, bei zel mai rawh. 

 

(24/9/2017 Zing lam dar 1;50AM-a ka ziak tawh kha ka han chulmam deuh hlek a ni)