HUN HMASA LAMA MIZO NUN – IX

Mahmuaka Chhakchhuak

March 25, 2022

 

Kan pi leh pute hunlaia an thil chin thin tha deuh pakhat chu chhungkaw bil thil sawina atan leh fate zinga zing ngai an awma inzilhna hun atana chaw ei lai hun an hmang thin hi a ni awm e. Chaw ei hi chhungkaw bila ei a ni deuh ber a, mikhual an awmin leh midang eipui an neih erawh chuan chhungkua nen an zavaiin an kil tlang mai thin a. Tunlai hunah erawh chuan chutiang chu a ni tawh chiah loin mizo zingah pawh chaw eia han insawm hian hmundanga ei chhuah mai zawkte ching an lo awm ve ta a. A that leh that loh lam chu sawi thiam har tak a ni ang a, a awlsamna leh remchanna lama thiam taka sawi an awm a nih pawhin chhungkuaa kilho chu a tluk kher chuang lo ang. Chhungkuaa chaw eiho hi thil hlu tak a niin chhungkaw inhmangaihna atan pawha thil pawimawh tak a ni.

Hun hmasa lamah khan kan pi leh pute chuan chaw kilho hi an lo ngai pawimawh thin hle mai tih a hriat a, chhungkaw puipa, pa emaw nuin emaw chhungkaw thil pawimawh an sawina hun remchang tak a nih mai bakah fate zingah zilh ngai an awm pawha an inzilhna hun a niin pawnlama awmdan mawi chitin reng an sawina hun leh hmun a nih avang hian chaw ei lai hun hian thawm dang a awm ngai loh avangin midang tan chimbuai a rem ngai lo a. Tin, chaw ei lai hi ‘hmelchhiat lai hun’ tih a nih bawk avangin inleng neih a rem vak lo bawka ngaih a ni. Chung hunlaia an chaw eina ber thleng atan chuan Thlanvawng thleng hi an hman thin a, thlanvawng thing hi a khawih a nawm mai bakah a ro hnuin a zang bik deuh bawka an hman uar ber a ni awm e. Chutiang thlengah chuan chaw khawrhin a laiah chawhmeh an bun leh maiin chhungkuaa kilho thin a ni. Tin, chhungkaw zinga hnathawka chhuak an awm a, ram lamah chaw an ei nghal dawn te a nih loh chuan In lama lo awm te’n chaw hi an eisan ngai lo a, rei tak thleng pawhin an lo nghak hram hram thin. An rawn haw har viau a nih phei chuan naupang lam chuan an lo ei maiin nu ber emaw pa ber emaw tal chuan rei tak thleng pawh an lo la nghak zel a, chanchin engmah an hriat loh phei chuan an nghei mai thin a ni.

Hetiang hi kan pi leh pute nunzia a ni a, chhungkaw inhmangaihna pawh an nei lian hle thin a ni. Chaw ei dawnin luhkapui atangin an in au luah luah thin a, a tlangpuiin chaw ei hun hi a in angin hetiang hunah hian laklawh tak thil a nih loh chuan tu tan pawh haw ngei ngei tura ngaih a ni. Chhungkaw ruala chaw ei duh lo hi misual zia anga ngaih a ni thin bawk a, fapa tlangval tawhte tan pawh midang ruala kil hram hram a ni thin. Zan mut reh hnua chaw ei chingte phei chu chhan dang lian tak a awm a nih loh chuan chhungkua pawhin an hauh bur hi an ni duh viau thin a, chutiang mi te chu khawtlang angah pawh chhawrnaawm tak hi an ni duh viau bawk. Hmeichhia phei chu eirawngbawltu ber an nih bakah ei siamtu an niin seng feltu an ni bawk a, inchhungah a buai berah an tang thin. 

Ram alo changkan ang zelin kan nunphung tam takahte pawh hma kan sawn vein chhungkaw tinte pawhin hma kan sawn ve zel a. Chhungkaw bila hun hmanna hun pawh kan nei thei meuh thin lo. A then chu zing takah an chhuak a, a thenin zan tlai tak tak thleng hna an thawk bawk a, hetiang a nih avang hian chhungkaw bila chaw ei pawh a lo rem ta chiah thin lo a, kristian kan nihna ang ngei pawha chhung inkhawm neihna hun pawh remchang a tam ta lo viau thin mai. Nimahsela chhungkaw bila hun hman theihna tura remchang kan zawn thiam hi a tul hle mai a, nitina chhung Inkhawm nei duh tan phei chuan zan lamah emaw chauh hun a awm mai thei ang a. Chutiang a nih loh phei chuan Pathianni zingah tal emaw hun neih tum hram thin pawh a tha awm e. Kar tluana chhungkuain Pathian biak hona kan neih theih ngai loh chuan chhungkaw ngaihtuahawm tak kan ni tihna a ni thei a, a langin thil tha lo thleng kher lo mahsela chhunglam nunin Pathian alo mamawh tawh viau thei. Chutiang a nih avangin chhungkaw chaw ei dawnah talte hi chuan tawngtai hona neih hram hram pawh kan tum a tha ang.

Mi thenkhatte chuan an nu leh pa, kum upa zawkte hi a hranin a ei tir thin a, hei hi duhsakna lam hawia tih a nih loh chuan thil tha tak niin a lang lo. Chaw eina hmunah hian kum upa lamte chuan thangthar angin awmdan mawi an lo hre vak lo pawh a ni theiin chawhmeh tui hawpna atan pawh mi tam takin kan hman uar tak - bowl te pawh hi an lo hmang thiam kher lo pawh a ni ang. Chutiang pawh lo nisela nu leh pa an nihna avang hrim hrim pawhin thalaite chuan enliam mai kan zir zawk pawh a ngai awm e. Chawhmeh siam danglam kan duh a nih pawhin mahnia bowl-a siam danglam mai chinte pawh hi thil tha tak a ni thei a, chaweina hmuna inhuphurhna neih emaw rualkhai lo taka thil thin tih hi thil theihnghilh har tak a nih avangin midang tana ngaimawhawma awm loh hram hram tum hi chaw ei lai hi chuan a tha lehzual.

Chhungkaw thenkhatahte chuan chaw eina hmunah hian nu berin chaw bel a chang thin a, chhungkaw pa berin chawbel an chang ngai meuh lo. Mikhual emaw eipui dang an neihin an chaw thlengah chaw an nei tawh loh avang hian chaw lam hi a zahthlak thin avangin chaw bel changtu chuan chaw a khawrh vat thin tur a ni a, chawhmeh alo awm tawh lo a nih pawhin an suak leh vat thin tur a ni. Chaw eia insawm hi mizo induhsakna sang bera ngaih a nih avangin mikhual neih phei chuan chhungkuaa ei aia tuihnai zawk chaw hmeh tha an siam ngei ngei thin a, a bik takin tunhma lamah phei chuan Ar hi an talh uar ber a ni thin. Chaw ei dawna chhungkaw pa berin Ar a theh sauh sauh chuan an mikhual chu an duhsak hle tih a hriatthiam theih mai thin bawk a, a chang phei chuan pa berin an mikhual chu duhsak takin chaw eina hmunah a sa tui lai a suah sak bawk thin. Hetiang hian kan pi leh pute khan chaw eina hmun hi thil tam tak lantirna atan an lo hmangin tangkai takin an lo hmang thin a, mitin induhsakna a niin chaw eia insawm hi chuan lawm takin an pawm thin.

Kan tunlai hunah erawh hetiang zawng zawng hi alo remchang vek kher lo thei a, hei aia tha zawk pawh hi a awm thei awm e. A tir lama kan sawi tawh angin chaw eia insawm hi induhsakna a nih rualin tunlai hunah chuan hmun dangah midang mitmei veng loa ei chhuah mai chu alo remchang zawkin kan misawmte ngei tan pawh tlangnel takin alo awm theih zawk mai thei a. Hnathawhna avangin alo zir zawk pawh a ni thei. Tin, ei duh loh zawng inhmehpui hi a tu ve ve tan pawh hrehawm duh deuh a nih avangin ei duh zawng pawh alo thlan theih zawk ang a, puar leh tlai takin kan ei thei zawk pawhin a rinawm. Amaherawhchu chuti pawh lo nisela chhungkua nen ngeia chaw ei ho tluka hlu chu a awm kher chuang lo ang e.