ṬHANGTHAR POLITICIAN CHHUANAWM

Mahmuaka Chhakchhuak

March 28, 2022

 

Feb. 18, 2021 niah chuan Aizawl Municipal Corporation (AMC) Councillor thlanna chu result puan a niin MNF Party Official Candidate 11-te chuan hnehna an chang a, Congress Party Official Candidate 2-te chuan hnehna chang bawkin a vawi khatna atan ZPM Party pawh chuan seat 6 an la bawk a ni. Heng zingah hian hmeichhe seat 7 awmin Ward – 9 ah erawh B. Lalawmpuii chuan a khingpui mipate chu khumin hnehna a chang bawk a, hei vang hian hmeichhe seat pasarih chauh a awm nain hmeichhiate hi mi pariat (8) an tling ta a ni. Heng Ward 19-a thlantlinte zingah hian a bik takin hmeichhe ho phei chu mithar deuh vek an niin pakhat emaw chauh hi mithar a ni lo a. Chung mitharte chu kum naupang tak tak an la ni zui bawkin Christina Roluahpuii phei hi kum 28 mi niin a naupang ber nghe nghe.

Heng hmeichhe zingah hian Ward- 16 naa thlan tlin thar R. Lalawmpuii hi kum 1981 Jan. 13 a piang niin Bethlehem Vengthlanga cheng a ni a. Ramhlun North Primary School aṭangin zirna bul a tanin Bethlehem Vengthlang-ah in leh lo nei a an khawsak hnuin Bethlehem Vengthlang M/E School – I-ah zirna chhawnzawm lehin, Central H/S (College Veng) aṭangin Cl-X ṭha taka a zawh hnu-ah MICE (Venghlui) aṭangin Cl-XII (Arts) a zo leh bawk. Chumi hnuah chuan Govt. Aizawl College aṭangin BA (Pol. Sc) zo lehin kum 2004 khan ṭha takin MA Pol. Sc (International Politics & Civics) hi University of Mumbai, Santacruz Campus aṭangin a zo leh a ni. MA a zawh veleh hian Springdale School, Bethlehem Vengthlangah hun rei vak lo a thawk a, chumi chu bansan lehin Doordarshan Kendra, Aizawl-ah lut chho lehin, Commercial Cell-ah Resource Person hna a chelh mek a ni. Office lama a thawhpuite chuan “A chhangchhiat berh vanglai tak pawhin office kal a ṭhulh ngai mang lo” an ti hial thin. Kum 2009 ah khan pasal neiin tunah hian fa pathum neiin mipa pahnih leh hmeichhia pakhat an ni a, an fa naupang ber pawh hian kuminah hian kum 9 a tling ve chiah a. 

ZPM Party hruaitute chuan kum 2021 ah khan AMC inthlan alo awm dawn avang chuan Candidate atan sawmin an han rim a, huphurh tak chungin an sawmna chu tihlawhtlingin theihtawp chhuahin an han campaign chho lauh lauh a, vanneihna changin heti hian Councillor atan thlantlin a han ni ta hlauh mai hi Politics lama a rahbi rah hmasak berna niin hei hi atan Politics zin kawng a zawh tanna pawh a ni. Politics platform-ah ala ding ngai lo a, naupan tet atanga kohhran ngheng tlat mi a nih angin kohhran lamah erawh tangkai taka inhmang mi a ni mai a, khawtlang lamah pawh a theihtawpin inhmang mahsela chuti taka Politics rim nam lamah chuan ala kal ngai bik lo. Nimahsela Councillor meuh a han nih takah chuan a zei lo viau dawn emaw tih laiin a thiltihna leh tawngkamte reng reng chu chanchinbu phek hmalam awhtu a lo ni ta zel maiin vawiinniah chuan Councillor zingah hming langsar berte zingah alo awm thei ta hial mai hi ama inzirna leh inpumpekna vang kan ti lo thei lo ang.

Tun hnai lawkah khan kan Politician tam takte tawngkam ang lo deuhin tawngkam pakhat a rawn nei a. Chu chu – Politics hi Thil tha ti tura intihsiakna hmun a ni tih hi a ni a. He tawngkam hi a tawi hle mai nain thu a sawi thui hle thung a, Politician tam takte tan ngei pawh chona lian tak a ni nghal thei bawk. Tun hma lam atang tawhin kan zoram Politics boruak hi alo chhe tawh hle thin a, Politics inbeihna tawngkam bungraw hriam tak tak pawh hriattur alo awm tawh thin. Chutiang hri chu tunlaia kan Politician-te ngei pawhin bansan hleithei bik loin tunah phei chuan tawngkam mai duh tawk tawh loin FIR te hial pawh a ri ta fo mai bawk hi a zia lo hle mai. Then leh rualte ngei ngei pawh Politics avangin kan lo inhmelmak zawh phah bawk a, thisen zawmpui kan unaute nen ngei ngei pawh kan inhmuhmawh phah ta hial mai. Chutiang avangte chuan Politiciante chauh niloin kan chhung leh khatte thlengin boruak tha lo tak tak a awm phah bawk zelin kan Party an nih loh chuan tih tawngkam te hial kan hre ta a nih hi.    

Chutiang karah chuan kum naupang tein R. Lalawmpuii chuan Politics huang a rawn luhchilh ve ta a, hmeichhia a nih bawk avang hian a ruh a no deuh anga a tuar zo lo mai ang aw tia kan lo thlir mek laiin zoram khawvela hriat reng tawh turin Politics hi thil tha intihsiakna tur hmun a ni tiin a politics thinlung put hmang chu mipui hriat turin a rawn puangchhuak ta daih mai hi ama tan chauh a ni lo a, politician dang zawng zawng tan pawha chona lian tak a ni nghalin ram mipuite tan ngei pawh rah duhawm tak chhuah ngei ngeina turin a politics rahbi chu a rawn rap tan ta. Heti chuan a bial mipuite tan a ngaihthatthlak ngawih ngawih mai a, hna a thawk tak tak dawn tih pawh a hriatin tute emaw angin a sahmim hnawhpuarna atan mai chuan Politics kalkawng hi a zawh lo hrim hrim ang tih pawh a chiang nghal bawk. Kumina Punjab MLA inthlana thil thar kan hmuh tam tak zingah hmeichhiain seat 13 lai mai an la thei hi thil danglam tak a ni a, chutiang bawk chuan AMC-a hmeichhe seat 6 awma seat 7-a hmeichhe tlingte hnathawh leh tawngkam kan han hriatte ngei pawh hi thil danglam tak a ni kan ti lo thei lo ang. Punjab Assembly House chhunga hmeichhe Kum 27 mite, kum 31 mite leh kum 37 mite rual ho an han thu tawh tur phei hi khawvel mit a fu lo thei lo a ni.

Kan ramah ngei pawh hmeichhe thiltihtheih tak takte hi sawi tur tam tak kan hria ang a, Politics lamah ngei pawh sawi tur an lo awm zauh zauh tawh bawk. Vawiin hun thlenga chawlloa an hming lam rik tur an la awm hi thil lawmawm tak a ni a, tuna Councillor hmeichhiate ngei pawh hian Assembly House chhunga thu thei ngei turin tan han la zel sela a duhawm hle bawk ang. Mizo mipui tam takte hian ram rawngbawltu zinga hmel thar awm hi kan lawm a, kan lawm satliah a ni lo a, ram rawngbawltu tam takte ang lo taka hnathawk mi an rawn awm thar hi kan thla a muang bawk a ni. Ram mipuite nat ruala na ve nghal tur ram rawngbawltu mi tlemte kan neih zinga anni ‘hmeichhe awmnem zawk’ tia sawi tur an han tel hi chhuanawm tak an niin nakin lawkah kawng dang lo zawhin emaw vanduaina lo tawk palh ta hlauh pawh ni sela an tawngkam leh an sulhnute erawh hi chu kan la sawi ri fo ngei bawk ang.