KUM 1972 -A MIZORAM SORKAR HMASA BER KHA

-

(Assembly Golden Jubilee Pualin)

Mahmuaka Chhakchhuak

May 12, 2022

 

Mizoram Legislative Assembly kum 50-na, Golden Jubilee chu Assembly House-ah lawmna hun buatsaih a niin hemi pual hian May 10, 2022 (Thawhlehni) ah khan Assembly Session neih a ni nghe nghe. He special session-ah Assam Assembly Speaker Biswajit Daimary chu sawm a niin thusawina hun a nei a, a ni bakah hian MNF Legislature Party aiawhin Deputy Chief Minister Pu Tawnluia, ZPM Legislature Party aiawhin Lalduhoma, Congress Legislature Party aiawhin Nihar Kanti Chakma leh BJP member Dr. BD. Chakma te chuan thusawina an nei a, hemi zawhah hian Governor Dr. Hari Babu Kambhampati chuan Assembly Annexed building tuala Golden Jubilee puala Lungphun hawnna a nei bawk.

Kum 50 liam ta, kum 1972 ah khan Mizoram Union Territory-a hlankai thar chu January 21 niin hawn alo ni tawh a, a hmun atan A.R. Lammual a ni. UT thar hawnna nei tur hian India Prime Minister Indira Gandhi chu Delhi atangin a rawn chho a, Arunachal Pradesh rawn tlawh hmasain Itanagar-ah U.T hawnna a nei a. Chawhnu lamah Meghalaya tlawh lehin Shillong khawpuiah Meghalaya State a hawng leh a, a tuk chawhmaah Imphal khawpuiah Manipur State thar a hawng lehin Mizoram lam panin a rawn kal leh a, chawhnu dar 1;30 ah Helicopter-in A.R. Lammualah a rawn tum a ni. Prime Minister hian Helicopter tha chi paruk lai a rawn hmang a, Aizawl khawpui chung zawng an rawn thlawh thlen veleh Helicopter palite chu a sang zawngin an invawrh chho a, mu tiat velin an lang ta tihah chhim leh hmar, chhak leh thlang zawngin an inthen darh a, chumi hnuah an thlawk kual lehin pahnihte chuan AR. Lammual an pan dingin muangchanga hel kual hmasain an rawn tum ta a ni. Indira Gandhi chuan Helicopter atangin sipai motor hmangin Lammual chhim lama dawhsan lam chu a pan leh a, chuta tang chuan Mizoram UT a hlankai a nih thu chu a puang ta a. He a thusawi hi Pu K.L. Rochama’n a lehlin sak nghe nghe.

Heta Mizoram UT-a hlankai a nih a, hawnna hun hmannaah hian Indira Gandhi thusawi zawhah Union Home Minister K.C. Pant chuan MNF tang, Case rip taka an charge ‘GR 212/66 US IPC 121 ’Waging war against the state’ an tih, sorkar dodal-a chete thubuai, khai hlum emaw, dam chhung lungin tan emaw-a hrem theihte chu an Case hlihsak a nih thu a rawn puang bawk a, mipui lam atangin kutbeng thawm pawh a ring kher mai. Hetih lai hian MNF mi 400 chuang laite chu man an niin Case rip tak an nei a, an tan Mizoram kohhran hrang hrang mai bakah Political Party hrang hrangte pawhin an theihtawp an chhuah vek a, sorkar lam pawhin Silchar Ukil hlun Shri Chowdhury chu a rawih sak bawk. He an Case hlihsakna thupuan hi Mizoram UT lawmna atana present ropui leh lawmawm tak a ni a, Kohhran ho tawngtaina rah a ni kan ti thei bawk ang.

Mizoram chu UT kan lo nih takah chuan April 18, 1972 ah sorkar thar siam tura inthlanna neih alo ni a, MLA bial hi 30 chauh la awmin chungahte chuan Mizo Union, Congress, Mizo Labour Party (MLP) leh Socialist Party bakah Independent atang tein mi 58 laiin an chuh bawk a. Candidate zawng zawng hi mi 155 niin heng zingah hian hmeichhia 4 an awm bawk a ni. Socialist Party hian bial 13 ah Candidate an siam nain seat khat mah an la loin an dahkham pawh an chawi vek a ni. Hetih lai hian Mizoramah vote awm zawng zawng 156,901 niin vote tla zawng zawng hi 114,386 a ni a, vote pawm zawng zawng zat hi 111,358 a ni. Vote tla percentage hi 72.90% a ni bawk. Hetiang hian bial tina thlan tlinnte chu an tlinna bial nen han tarlang ila;

1.    Tuipang                    – Hiphei          Independent

2.    Sangau                     – K Sang Chhum Independent

3.    Saiha                     – Sapliana          Independent

4.    Chawngte            - Satya Prio Dewan          Congress

5.    Demagiri             - Hari Kristo Chakma         Congress

6.    Buarpui                        - P.B. Nikhuma     Mizo Union

7.    Lunglei                      - K.L. Rochama      Mizo Union

8.    South Vanlaiphai            - Saitlawma                Mizo Union

9.    Hnahthial                       - L.P. Thangzika     Mizo Union

10. North Vanlaiphai             -  R. Dotinala               Mizo Union

11. Khawbung                       - F. Hrangvela        Mizo Union

12. Champhai                        -  Lalhlira                          Mizo Union

13. Khawzawl               - Vanlalhruaia              Mizo Union

14. Ratu                         - R.D. Sangkhuma     Mizo Union

15. Suangpuilawn   -    H. Thansanga               Mizo Union

16. Saitual                     – Khawtinkhuma     Mizo Union

17. Tlungvel                       - Hrangaia               Mizo Union

18. Khawhai                       -   J. Thanghuma Congress

19. Lungpho                       -  C. Lalruata               Mizo Union

20. Serchhip                       - Vaivenga                Mizo Union

21. Phuldungsei             -  Lalkunga                    Congress

22. Sateek                       - R Zoliana               Mizo Union

23. Aizawl South            - J. Lalsangzuala     Congress

24. Aizawl Centre               - Lalrinliana               Mizo Union

25. Aizawl North               - R. Thangliana     Mizo Union

26. Kawnpui                      - Ch. Saprawnga              Mizo Union

27. Kolasib                        - Ch. Chhunga        Mizo Union

28. Sairang                       -  Joe Ngurdawla    Mizo Union

29. Mamit                         - C. Chawngkunga      Mizo Union

30. Rengdil                         - Zalawma                    Congress

 

Seat lak dan;      Mizo Union  – 21

                    Congress – 6

                    Independent - 3

Anni bakah hian Nominated Seat-ah Saptawni, Kapoor Chand Thakuri leh Lalhmingthanga te an awm bawk.

Hetia Mizo Union chuan sorkarna an han chan a, sorkar thar form-na an han neih dawn takah chuan Chief Minister turin Pu Ch. Chhunga leh Pu Ch. Saprawnga te chu a tu zawk nge ni ang tiin an pahnihah chuan mit a fu thup mai a. Pu Chhunga chuan Politics-ah pa ang hrima a lo neih tawh Pu Rawnga chu insorkarna lama ‘experience’ pawh nei tha zawk leh hun rei tak Chief Executive Member pawh lo ni tawh a niin MP hial pawh alo nih tawh bawk avangin ni ngei turin a rawt a. Pu Rawnga lah chuan ‘kei chu CEM ka lo ni tawh a, Pu Chhunga hian heti khawp hian Party pawh alo hruai puitling tawh a, chanvo lamah nise a tlawmngai ber leh inthlan nikhuaah a bial chhe lai ber a chang ziah bawk a, chuvangin ani hi CM a ni tur a ni’ a tih ve tlat bawk avang chuan Pu Ch. Chhunga chu lungrual takin Chief Minister atan an thlang chhuak ta a.

Tichuan, Hetiang hian sorkar thar form a ni bawk a;

Chief Minister            - Ch. Chhunga

Cabinet Ministers       – Khawtinkhuma, R. Thangliana leh Vaivenga

Deputy Minister        - P.B. Nikhuma

Speaker                 - H. Thansanga

Deputy Speaker       - Hiphei


NOTE: Kum 2024 alo thlen leh meuhah chuan heng kan ram hruaitu thlanchhuah hmasak berte zingah hian mi pasarih chiahin min la dampui a, chungte chu; K. Sang Chhum, KL. Rochama, R. Dotinaia, Dr. H. Thansanga, Lalkunga, C. Chawngkunga leh Sapliana. 


 

Comments

Post a Comment

Popular posts from this blog

CHIEF MINISTER HNENA LEHKHATHAWN

-
Mahmuaka Chhakchhuak June 15, 2025 Ka pu, chibai ka bûk a che.  Ram leh hnam hmasawnna tura ram i vei dan hi kan hre tam hauh lo nain kan hriat chinah ringawt pawh kan chhuang che a, a hun chhung sawi pawhin ram i veina chin hi a rei ta hle mai a, kum sawm li hial a tling tawh awm e. Hetiang taka ram i veina chu chunglamin a hriatpui che a nih ngei anga hei tunah chuan mawhphurhna lian tak ilo chelh ta a, i lakah beisei pawh kan nei sang hle. Khawvel ram hrang hrangte kan thlirin hruaitu pakhat avanga ramin hma a sawn theihzia kan hria a, hruaitu tha an neih avanga ramin hma a sawn dan sawi tur tam tak a awm. Singapore ram kan sawiin Lew Keun Yew hming sawi rik lohtheihloh a ni a, China sawiin Chairman Mao, Cuba sawiin Fidel Castro, chutiang zelin Bihar state hmasawnna pawh Chief Minister Nitish Kumar vang a ni tih tumahin kan hai lo ang. Kum 2005 atanga chawlh awm loa vawiin thlengin Bihar mipuiin an la mamawh a ni chek ang a, ram leh hnam tana a hnathawh avangin tum riat zet chu ...
Read more

TACHHIP ARSI ÊNG

-
Mahmuaka Chhakchhuak Oct. 26, 2025 Tachhip aṭanga Kaphleia’n eng mawi tak a rawn chhuah kan hria a, chu eng mawi tak chuan Zoram pum a enin vawiin thlengin chu eng chu kan la hmuin lawmna min rawn thlen a.   Chalchhingvunga Chhakchhuak leh Chuaizovi te fa hmingkoh Kaphleia kha kum 1910, January ni 10-ah Aizawl-Sialsuk kawnga Ṭhiak khuaah a piang a. An unau hi paruk an piang na a, pahnih erawh chu an sen laiin an boral hlauh a, dam puitling chho ta chu pali niin, Kaphleia hi mipa awmchhun a ni a, an upat dan indawtin: Kaphleia, Darringaii, Laldinthangi leh Hualziki te an ni a, tunah erawh chuan an unau zain mual an liam vek tawh a.  Kaphleia pa hi Dak la (mail runner) a ni a, Kaphleia te unau pian hma chuan Sialsuk bul Hauhuktar-ah an awm ṭhin a, heta ṭang hian Sialsuk ah chhungkuain an pem a, pa ber hna avangin Ṭhiak khuaah an pem leh a, he hmunah hian Kaphleiate unau za hi an piang vek nghe nghe. Tin, Ṭhiak aṭang hian a pa hna avang bawkin kum 1927 khan Tachhip-ah an pem...
Read more

Dr. HL. MALSAWMA NGHILHLOHNAN (A boral champha vawikhatna pualin)

-
Mahmuaka Chhakchhuak Jan. 22, 2024   Mizo zinga mi chhuanawm tak takte hi an damlaia ka hmuh hman tur reng ni si, hmuh hman loh ka nei nual a, mi hnunga kal tur hrim hrim ang maiin an boral hnuah anmahni ngaih thu hi ziah alo ngai ta zauh zauh mai. Dr. Lip kha Lunglei ka awm tak hnu hian biangbiakna hun ka zawng thin a, alo remchang lo zel a, a dam lo khan harsatna min siam a ni ber bawk a. A boral ta hlauh a, a ruang chungah mittui tlain thu ka va sawi ta hram a. L. Keivom ngei pawh a contact number te chu han nei mah ila ka be lem chuang lo a, hmaihmaa inhmuhna hun a awm remchang lo zel a, a boral hnuah a thlan chu thla ka va lakpui hram bawk a. Chutiang zelin Dr. HL. Malsawma ngei pawh a damlaiin an inahte pawh len awm tak a nih laiin ka leng chuang lo a, a boral hnuah erawh a chhungte nen inpawh takin kan awm tain a nupui nen phei chuan kan inbe chhunzawm ta fo bawk a. Nikhat phei chu nilengin a library-ah hun ka hmang a, mi chhuanawm tak a nihzia hi a boral hnuah ka hre ...
Read more