Pu Rawna DAVIDA

Mahmuaka Chhakchhuak

June 14, 2022

 

May 30, 2022 niah chuan Mizo Writters Association (MWA) chuan kum 2021 chhunga lehkhabu lehlin tha ber lawmman semna an nei a, chutah chuan Pu R. Lalrawna lehkhabu lehlin DAVIDA chu pakhatnaa thlan a niin lawmman hlan a ni. He lehkhabu hi Frank G. Slaughter ziak niin Pu T. Lalhnema, Khatla a awm chuan Pu Rawna hi pein ‘Lehkhabu tha tak a ni a, nangin mizo tawngin letling la a tha ang’ tiin a pe a. Tichuan Pu Rawna hian kum 2020 chhunga inkharkhip kan neihah khan a letling a, a chanve vel a letling tawh tihah chuan inkharkhip an rawn phelh leh deuh hlek bawk nen hna an han neih leh chuan a chawlhsan leh rih a. 2021 April thla velah inkharkhip a han nih leh khan a lehlin lai chu chhunzawm lehin heti hian a zavaiin a letling thei ta a. Pen leh lehkhapuan nena letling a ni a, chumi hnuah Computer-ah khung lehin amah bawkin siamthat ngai lai chu a siamtha leh vek bawk a, heti hian a buin a rawn chhuak thei ta a.

Pu Rawna hian phek 521 laia chhah DAVIDA lehkhabu hi naupangte a nih laia Davida chanchin lo hrilh thin tawh tu a pa Aikima, Aug 19, 2000 a boral santu hriatrengna atana a tih a ni a. A pa hi heti maia a hriatrengna tur thil buatsaih mai hi a ni lo tih erawh mi tam takin kan hre kher awm lo e. Kum 1943 – 1946 velah khan Pu Aikima hian Pathianthu hriatna turin Bible pawh a kimin ala awm lo a, ziak leh chhiar pawh thiam tawk tawkin Davida thawnthu ngaihnawm taka a fate a hrilh thei kha Pu Rawna ngei hian mak a tih thu a sawi hial a ni. Chu a naupang laia apa thawnthu hrilh chu a puitlin hnu thleng pawhin ala vawng reng a, ala theihnghilh reng reng loh avang chuan tuna a lehlin lai ngei pawhin apa hi a hrechhuak fo reng bawk a. Hei vang hian apa puala buatsaih a nihna pawh hi inhmeh a ti a, awm a ti hliah hliah bawk. Chu chauh ala ni lo a, he lehkhabu hi copies 1000 lai buatsaih nimahsela Pu Rawna hian apa hnen atan a thlawna Davida chanchin a dawng angin he lehkhabu hi a thlawn bawkin mi 100 chuang fe hnenah a sem nghe nghe a. A bik takin an lawina kohhran upate chu a sem vek a, a duhsak zawng midangte hnenah pawh engemawzat a semchhuak bawk a ni.

Kan hriat theuh angin Pu Rawna hi sorkar hnathawk tawh niin kum 2003 kumtirah khan a pension a, Gilzom Offset neitu a ni bawkin nitinin lehkha chhutna khawl lamah hun a hmang thin a, vawiin thleng hian a nitin hna ber ala ni. Thu leh hla lama tui a nih reng reng bawk avang hian mizo tawngin lehkhabu 15 lai a ziak tawh a, lehkhabu hi 14 lai a letling tawh bawk a ni. Heng bakah hian Matric zirlaia English prose te, B.A zirlai leh PU English prose te pawh lehlin ala nei cheu. Lehkhabu puahkhawm (compile) pawh bu hnih nei tawhin chungte chu vawiin thlenga lehkhabu chiar hlawh tak an ni ve ve a. JF-a Love Letter tih leh Bible Thlirna tihte hi an ni. Heng mai bakah hian mizo thu leh hla lama sulsutu pawimawh tak leh magazine tangkai leh pawimawh em em mai MEICHHER Chanchinbu hi ama irawm chhuak leh a hmalakna avanga lo piang a tih ngam bawk. Meichher hi kum 1975 October thla atang chauha a hming niin a hming hmasa hi Zoram Eng tih a ni a, March 1975 atanga tihchhuah a niin vawi li (4) lai chu Zoram Eng hming hian an lo tichhuak hman a ni.

Tuna DAVIDA tih lehkhabu a han tihchhuah thar hi chhiar pawh a hlawh hle a, ngai hlutu pawh an awm nualin chung zinga pakhat chu han tarlang ila. Rev. Dr. Lalhmangaiha niin Pu Rawna hnenah hian phek sarih (7) laiin feedback a pe nghe nghe. Chutah chuan heti hian a ziak a:

·       A letlingtu hian mizo tawng a thiam tha hle a ni. Lehlin tih pawh hriat harsa khawpin a tawngkam a tluang tha tak zet. Mi thiam leh mi ril kutchhuak tih a hriat hle.

·       A chhung thu ziak hi uluk taka endik tih a hriat a, tihsual hmuh tur a vang kher mai! Spelling mistake leh punctuation dik lo tlemte a awm tih chauh lo chu.

·       Mizo tawng upa leh tawngkauchheh nalh tak tak, entawn tlak a tam hle. Naupang leh thalai tan mizo tawng zir nan zirlaibua telh tlak hial niin ka hria.

·       Kum 72-a upa ka ni ve tawh a, mahse mizo tawng ka hriat ve loh a awm nual mai!

 Heng point bakah hian Tawng upa hmante hi 64 lai a rawn lachhuak lehin chungte a awmna phek number leh paragraph a rawn tarlang nghal zel bawk. Tawng mawi emaw thumal pawimawh tunlaia hman zen zen tawh loh hi 83 lai a rawn lachhuak bawkin chungte chu a awmna phek number leh paragraph a rawn tarlang nghal leh zel bawk a, tih sual thenkhat (printing mistake) hi 46 lai a rawn lachhuak leh bawkin chungte chu a awmna phek number leh paragraph mai bakah a dik zawk a rawn tarlang leh zel bawkin tawngkau chheh mawi si, naupang deuh taka awmze hriat harsa deuhte hi 34 lai a rawn lachhuak lehin chungte chu a awmna phek number leh paragraph a rawn tarlang tel nghal zel bawk. Hetiang hian Rev. Dr. Lalhmangaiha hian a chhiar mai mai lo tih a chiang reng a, hetianga feedback tha tak a pe hi a ziaktu tan pawh thil lawmawm ta a nih ngei a rinawm. 

Lunglei lam atangin Familia Fanai Laltansanga chuan lawmpuina thu thui taka ziakin Pu Rawna hi a rawn thawn bawk a, kawng hrang hranga Pu Rawna thawhhlawk dante leh thu leh hla lama sulhnu alo neih tawh dante a rawn ziak bawkin mizo thu leh hla tihausa tu a nih dan a rawn sawi a. Mizo thangthar thu leh hla lama tui mite a tihphur thiam dan pawh thiam takin a rawn sawi bawk. A dik chiah a ni. Pu Rawna hian zofate tan thu leh hla lamah sulhnu engemawzat alo neih tawhte hi thangtharte tan ngei pawha a ngaihnawm mai bakah tangkai tak tak a nih hlawm avang hian tu tan maha han hnualsuat hi a rem lo a ni. A Inah kal ila lehkhabu tha taka a vawn dante leh a enkawl dante hi entawn tlak a tling bawk a, chung zawng aimah chuan kum 82 mi a ni tawh chunga vawiin thlenga Gilzom Offset press-a lehkhabu chhuah tur ala edit peih zel hi entawn tlak a nihna ber zawk niin kei chuan ka hria.

Khaw’nge DAVIDA chu a bu chhung lam i han luhchilh tawh ila……