MARTIN LUTHER 95 THESIS

1. Kan Lalpa leh hotu Isua krista’n  “ sim rawh u” a tih khan simna chuan ringtu nun pumpui a huap tur  thu a sawi a ni.

2. Chu Thu chu puithiam buatsaih thin, penance sacrament (sual puanna leh ngaihdamna) hi kawh tir tur a ni lo.

3. Chhungril lam nun simna thu a sawina mai pawh a ni lo; simna hian pawn lam hmuh theiha taksa tihhrehawmna chi hrang hrang a hrinchhuah loh chuan engmah sawtna a nei chuang lo.

4. Mahni inhuatna (chhungril lam simna tak tak chu) a awm chhung chu penance pawh a awm reng ang; chu chu vanram kawtchhuah thlen thlengin a awm zel ang.

5. Sual hremna hi ama duhthua Pope-in a tuksak emaw, Kohhran danin a phut chin emaw chauh lo chu, ngaihdam theihna thuneihna hi Pope-in a nei lo a, duh pawh a duh bawk hek lo.

6. Pope hian sual ngaihdam theihna tura thuneihna a nei lo a, a tih theih chin chu Pathian ngaihdamna puanchhuah leh lo tuihnih chauh hi a ni mai. Heng bak pela thil a tih pawhin sual thiam loh channa chu a ngaidam a ni chuang lo ang.

7. Pathian aiawha ding, puithiam te hmaa engti kawng maha inti hnuai lo te chu Pathian pawhin tu sual mah a ngaidam lo.

8. Penance hi nungdama awm te chung ah chauh lek tur a ni a, thi tawh te chung ah hman tur a ni lo.

9. Thihna chungchang ah leh tul bikna dang avanga danin a huap chin baka Thlarau Thianghlimin Pope kaltlanga hna a thawk hi kan tan a tha a ni.

10. Hnukchat mek te tana purgatory hmuna penance tiamsak tu puithiam te hian aa tak leh dik lo takin thil an ti a ni.

11. Kohhranin a tuk penance te purgatory penance-a thlak tu chuan, chu buh leh chi chu bishop te muthilh laia a theh a ni ngei ang.

12. Tun hma kha chuan Kohhran penance hi ngaihdamna chan hnu- ah an tuk ngai lo a, simna dik lantir nan  hma lam ah an tuk zawk thin.

13. Thi mek te chuan an thihna in an bat an tlak kim tawh a; Kohhran dan ah pawh an thi tawh a ni – he thuneihna atanga an fihlim tawh avangin.

14. Thi mekin thlarau lam hriselna emaw, hmangaihna emaw a tlakchham chuan hlauin a khur anga, a tlakchhamna a nasat ang zelin a hlauhna pawh a zual ang.

15. He hlauh avanga khurhna hi purgatory penance thlen hma hauh pawhin mihring tan a tawk khat hle tawh a ni – purgatory ah a kiam hlek dawn chauh a ni si.

16. Hremhmun te, purgatory te, vanram te danglamna chu beidawnna te, beidawn thelhna te, engthawlna te nen a intluk vel thial a ni.

17. Purgatory-a thlarau awm te tan hlauhna a kiam ang hu tawk hmangaihna a pung dawn a ni.

18. Purgatory-a thlarau awm ten thatna an hmu loin hmangaihna an chang ve lo ang tih hi Pathian lehkha thu emaw kawng dang atangin emaw sawi har tak a ni a, finfiah theih pawh a ni lo.

19. Purgatory-a thlarau awm te chuan chhandam nih inhriatna an nei vek ang tih lanna a awm lo – keinin chianga kan ngaih ang ngawt chuan.

20. Amahin hremna a tuk kha amah Pope vekin a hlihsak thei chauh a, mahse hremna zawng zawng ngaihdamna thu erawh chu a hrethiam lo a ni.

21. Chuvangin Pope indulgence kaltlangin miin hremna atangin zalenna an hmu thei a ni tih hrilhtute hian thil dik lo an hril a ni.

22. Purgatory-a thlarau awmte sualna hi a ngaidam thei lo; chu sual hremna chu kohhran dan anga an dam laia an chan tur a ni zawk.

23. Hremna tur hlihsak leh theihna pumhlum hi miin a chang dawn a nih chuan mi fel famkim chauhin a chang ang; mahse chutiang mi chu tlemte tak tak an ni ang.

24. Chuvang chuan hremna zawng zawng laka fihlimna engkhaw lawiloa tiam tute hian mi tam ber te chu an bum  a ni.

25. Purgatory chunga Pope thuneihna ang hi chu pastor leh kohhran hotu zawng zawng te hian an bial chhung ah chuan an nei theuh a ni.

26. Pope in chahbi thiltihtheihna ni loa ( chutiang chu neih pawh a nei lo) dilsakna lam zawka ngaihdamna a hlan thin hi chu a ti tha a ni.

27. Pawisa bawma tangka nawi an thlak rik raka thlarau pawh purgatory atanga zuang chhuak nawlh tur anga sawitute hian anmahni phuahchawp ( hominem praedicant ) an sawi mai mai a ni.

28. Pawisa nawi a tlak rik rak hian duhamna leh sum chaka tuihalna a pung ting a; amaherawhchu, Kohhran dilsakna (suffragium) erawh chu Pathian duhzawngah chauh a innghat a ni.

29. Purgatory-a awm zawng zawng te hian chhandama awm an duh ngei a ni tih tunge sawi thei? ( S. Severinus leh S. Paschal thawnthu kha hrereng ila).

30. Inchhirin an sim takzet em tih hi a tu amahin an chiang lo; ngaihdamna kim an chang em tih hria phei chu an tlem lehzual ang.

31. Indulgence leitu sim tak tak an vang hle ang, an vang takzet ang.

32. Ngaihdamna lehkha avanga chhandam ni ngeia inringte chu an zirtir tute nen lam kumkhuain thiam loh changin an awm ang.

33. Pope ngaihdamna te hi Pathian Thilpek sawi hleih theih loh mihring leh Pathian inremna chu a ni titute lak ah hian fimkhur hle tur a ni.

34. Chutiang ngaihdamna chuan mihring siam chawp penance sacrament lungawina chauh a thlen a ni.

35. Sual avanga thinlung lungchhiaa inchhirna hi chhandamna emaw indulgence emaw chan nan a tul lo ve titute chuan Kristian thurin ziktluak lo an hril a ni.

36. Thinlung lungchhiaa sim takzet chuan ngaihdamna lehkha tel lo pawhin a sual leh hremna ata ngaihdamna kim a hmu a ni.

37. Kristian dik tak, nungdama la awm emaw thi tawh emaw pawhin Pathian thilpek Krista leh Kohhran zar zo atan ngaihdamna lehkha a tul hran hauh lo.

38. Amaherawhchu Pope ngaihdamna leh malsawmsakna te hi Pathian ngaihdamna puanchhuahna an nih avangin ngaihnep mai tur a ni lo.

39. Theologian thiam ber ber te tan pawh an thuhrilhna ah indulgence phalral em em leh simna tak tak sawirem hi thil harsa tak tur chu a ni.

40. Lungchhiaa inchhir tak tak te chuan penance chu an zawng a, hmangaihna in an pawm hmiah mai; amaherawhchu heng indulgence te hi chuan tuar tur tihnepsakin a huattir zawk a; chu chu a thawh dan chu a ni.

41. Apostol ngaihdamna thu hi fimkhur taka hril tur a ni; chutilo chu miten hmangaihna hnathawh te aiin an ngai pawimawh zawk hlauh dah ange.

42. A leia lei ngaihdamna leh zahngaihna hnathawh intluka ngaih hi Pope tum dan a ni lo tih Kristian te chu zirtir tur a ni.

43. Rethei hnena thilpek emaw tlachham hnena puktir emaw hi ngaihdamna te lei ai chuan a hlu zawk a ni tih hi Kristian te chu zirtir tur a ni.

44. Hmangaihna thil hi tih a nih chuan hmangaihna a tipung a, thatna kawng ah mi a ti thang thin; ngaihdamna lei erawh chuan mi a ti thang lo a, a tuar tur a tinep deuh chauh a ni.

45. Miin a unau tanpui ngai tanpui duh loin ngaihdamna lehkha lei si sela Pope ngaihdamna chan a hnekin Pathian thinurna a tawng baw zawk ang.

46. Miin a chuang aliam hman tur pawisa a nei a nih si loh chuan an chhungkaw mamawh atan an sum tur a ni; engti kawng mahin ngaihdamna lehkha lei nan an hmang tur a ni lo tih hi Kristian te chu zirtir tur a ni.

47. Ngaihdamna lei hi duhthua tih a ni a, thupek a ni lo, tih hi Kristian te chu zirtir tur a ni.

48. Pope-in ngaihdamna lehkha a tihchhuah hian a lei tute pawisa ai chuan Pope tawngtaisakna an mamawh zawk a, chu chu Pope pawhin a duh dan a ni tih hi Kristian te chu zirtir tur a ni.

49. Pope ngaihdamna hi rinpuia hman a nih lem loh chuan a tangkai ve tho a, amaherawhchu Pathian tihna hloh phahna tur a nih chuan a hlauhawm thei hle tih hi Kristian te chu zirtir tur a ni.

50. Indulgence zuartu te’n mipuite an tihkawnkaw zia hi Pope hian hria sela chuan a beram te vun leh tisa leh ruh te hmanga St. Petera biak In sak ai chuan halral vek pawh a duh zawk ang tih hi Kristian te chu zirtir tur a  ni.

51. Ngaihdamna lehkha zuartu te’n sum leh pai an rawk sak mi rethei hnen ah hian a tihtur a nih ang takin Pope hian a sum leh pai a pe duh hial ang. Chutiang atan chuan a tul a nih leh St. Peter Biak In pawh a hralh duh hial ta ve ang tih hi Kristian te chu zirtir tur a ni.

52. Indulgence lehkha neih avanga chhandam nih inrinnna hi thil lo thlawn mai a ni; a tirhkoh te leh amah Pope meuh pawh hian an thlarau hial pawh dahkham mah se a sawngsawhlawt chuang lo ang.

53. Biak In danga Pathian thutak hril si lo a indulgence sawi mawi tu te hi Kriata leh a mite hmelma an ni.

54. Sermon engah pawh Pathian thu aia ngaihdamna lehkha sawi tam zawk emaw inzat renga sawi thin te hian Pathian thu ah pawi an khawih a ni.

55. Hetiang hi Pope thil tum a ni ngei tur a ni; Thil pawimawh pawh nilo ngaihdamna an zawrh hi vawi khat dar thinrik leh kawng zawh thlur khat leh pawmpuina tum khat nen chawimawi tur ni ta sela Chanchintha, thil pawimawh ber mai hi chu vawi za dar thinrik leh thlur zaa kawng zawh leh lawmpuina vawi za nena hril tur a ni ang.

56. Kohhran sum, Pope indulgence hralhna tling khawm te hi engtia hman tur nge tih sawi a awm lo a, Krista mite hian hriat pawh an hre ve lo.

57. Sem darh a ni ngai lo a, ngaihdamna zuar tute’n an khawn khawm mai a nih avangin lei ro hlu a tling lo a ni tih erawh chu a chiang.

58. Chung chu Krista leh mi thianghlimte hnemhnanpui thil an ni lo; an ni chuan Pope puihna tel loin mihring chhung lam nunah khawngaihna hna thawkin pawn lam nun ah – kross te, thihna te, mitthi khuaa kalna te an thawk chhuak si a.

59. Mi thianghlim Lawrence-a chuan ‘ mi rethei hi Kohhran sum chu an ni e’ a ti a, mahse chutianga a sawi chuan a hun laia mite tawngkam chu a hmang ve mai a ni.

60. Krista thatnain a pek Kohhran chahbi te chu ro hlu te chu an ni tiin kan sawi a ni.

61. Hremna ngaihdamna leh tul bik thila ngaihdamna pe turin Pope thuneihna hi a tawk tih hi a chiang a ni.

62. Kohhran tlinna chu Pathian Khawngaihna leh ropuina Chanchintha thianghlim hi a ni.

63. Mahse a hmasa tur a hnung zawka dah a nih avangin a huatthlala mai chauh a ni si.

64. Indulgence ro hlu hian a hnuhnung ber chu hmasa bera a dah avangin a lar ta zek zawk chu a nih hi.

65. Chanchintha ro hlu te chu hmanlaia mi hausa ho an manna len te an ni

66. Indulgence ro hlu te erawh chu tunlaia mi hausate manna lente hi a  ni ta thung.

67. A sawimawi tute sawi dan chuan indulgence hi khawngaihna ropui ber a ni a; mahse heta ‘ropui ber’ tia sawi hi sum hmuhna tamna lam sawina chauh a ni.

68. Pathian khawngaihna leh Kross hmangaihna nena tehkhin ralah chuan thil holam tak a ni.

69. Bishop te leh hotute chuan Pope ngaihdamna zuartute chu zah takin an lo dawngsawng tur a ni.

70. Amaherawhchu bishop leh hotute chuan Pope thuchah aia anmahni ir-awm thuchhuak mai an hril nasat zawk loh nan an mit an lenin an beng pawh an chhi zau hle tur a ni ang.

71. Apostol ngaihdamna te hnialkalh zawnga sawi tu chu anchhedawng leh paihthlakin awm rawh se.

72. Amaherawhchu ngaihdamna zuartute fel lohna leh dodal ngamtu chu malsawmsakin awm rawh se.

73. Ngaihdamna zawrhna tikhawlotu laka Pope thikthu chhiat ang bawkin.

74. Pope chuan ngaihdamna lehkha tanchhan a hmangaihna thianghlim leh thutak tihbawrtban tum tute chu khauh lehzualin a hring duh a ni.

75. Pathian laka thil tisual te meuh pawh Pope chuan a ngaidam thei a ni titu chu – mi aa, phul liam ve mai mai a ni.

76. Thiam loh chantir tu sual tenau te pawh Pope ngaihdamna chuan a la kiang thei lo zawk a ni.

77. Peter-a ngei pawh tunah hian Pope lo nisela, heng aia khawngaihna thil sawt ropui zawk hi a pe thei chuang lo ang tia sawi chu amah Peter-a leh Pope sawichhiatna hi a ni.

78. Hetiang hian kan sawi zawk a ni; Pope tupawhin Peter-a ngei pawh chuan heng aia thil sawt ropui zawk hi an nei vek a; chung chu Chanchintha te, Thatna te, Rorel thiamna khawngaihna te, tihdamna te I Kor. 12-a mi ang te kha.

79. Pope ban lema chei Kross an zawrh te hi Krista Kross tluk thoa hlu an tih te hi Pathian sawichhiatna a ni.

80. Hetiang thu sawi darh phalsaktu bishop te hotu te leh theologian te hian insawi fel tur an la nei ang.

81. Hleihluak taka ngaihdamna hriltute avang hian sawichhiatna leh mite zawhna lak ah mithiam te tan pawh Pope dinhmun hi hum zawh a har hle dawn a nih hi.

82. Hetiang hian zawhna an zawt a ni; Biak In sakna atana thil ho mai mai atanga pawisa lo lut avang maha thlarau sang tam a chhanchhuah theih si chuan a chhan tha lehzual hmangaihna thianghlim leh thlarau mamawhna avangin engatinge purgatory chu a tihruah zawk mai loh?

83. Tlansate tan tawngtai a tul tawh si lo a, engatinge mitthi vuina leh thih chama mitthi puala thil tih ala tul cheu le? A nih leh engatinge chumi atana thil hlante chu Pope hian a pek kir mai loh?

84. A nih leh sakhaw mi lo leh seh hel tak ten sakhaw mi, Pathian pawl thin te chu ngaihsakin Pathian nen inpawlna duhawm an hmuh sak thei a nih si loh chuan chutih laia sakhaw mi tak thlarau duhawm tak bawk chu an mamawh ang takin sum seng lo leh thatna avanga an tlan chhuak thei si lo a nih chuan Pathian leh Pope laka inserhna pawh chu eng ang lek fang nge ni ta ang?

85. Simna dan te kha a hlui tawhin dan thi an ni tawh a, hman pawh an ni tawh lo a, engatinge chung dan peng neuh neuh te chu hman reng anga indulgence hmanga pawisaa lei tur ala nih fo?

86. Tuna Pope hausak zia hi millionaires hausa berte pawhin an tluk loh a ni a; ringtu sum tel lo pawh hian Pope chuan St Peter Biak In chu a sa mai thei lo em ni?

87. Inchhira simte chuan sual ngaihdamna an chan theih a hnu- eng ah nge Pope chuan an sualna ala ngaihdam ve cheu ni?

88. Ni khata vawi khat a tih thin hi Pope hian ni khat ah vawi za ti ta zawk sela, Kohhranin a hnemhnanpui ang emaw chu? Chu chu ringtu tana ngaihdamna leh malsawmna sem thu-ah tita bik ila?

89. Indulgence hralh chungchangah hian Pope-in tangka aia thlarau chhandamna a ngai pawimawh zawk a nih si chuan tun hma lama lehkha leh ngaihdamna an lo pek tawh te kha eng vanga titawp leh nge a nih le? A tangkai dan dang chuang awm lo tak?

90. Khitiang mi mawl zawk te zawhna khi fel taka chhang lo a Pope thuneihna chhunga palzutsak mai mai a nih chuan Kohhran leh Pope chu sawichhiat theihna kawng a inhhawng ta a ni ber a, Kristian te tan pawh a nguihthlak rawih ang le?

91. Pope duh dan leh rilru ang taka ngaihdamna hi hril nisela chu khing zawhna te khi chu chhan a har hauh lo anga, a zawh tur pawh a awm hek lo ang.

92. Muanna awm hauh lohna hmuna “ muanna muanna” tia Krista mite hnena sawi thin zawlnei te chu kal bo rawh se.

93. Kross awm lohna hmuna “ Kross Kross “ tia Krista mite hnena sawi thin zawlnei te chu lo insaseng tawh rawh se.

94. Krista an Lu chu hrehawmah pawh thihna ah pawh mitthi khaw thleng pawha rinawm taka zui zel turin Kristiante chu fuih tur a ni.

95. Muanna dik lo kawng zawh lo a hrehawm tam tak tuara van ram lut turin Kristiante chu inbuatsaih sauh sauh rawh se.