CHIN TAWK NEIH

Mahmuaka Chhakchhuak

Oct. 14, 2022

 

YOUTUBE NGAIHTHLAK:

Zankhat chu kan nu hian a mut dawnin YouTube-a naupang khawngaihthlak chanchin hi a ngaithla a, he thil hi tunlaia social media lama lar tak pawh a ni awm e. A khawngaih zia chu a sawi mawlh mawlh a, ka la ngaihthlak ve loh avang chuan min han hrilh a. Amaherawhchu kei chuan chutiang thu leh hla chu ngaithla fo lo turin ka lo hrilh zawk a, a chhan pawh chutiang thu dengkhawng ti mai ang, thu danglam leh thil thleng zen zen loh a nihna chuan mitin thinlung a thawng a, thinlungah vawn reng a awl bawk avangin leh kan tan hlawkna engmah a awm bawk si loh avangin leh tangkaipuina engmah a awm bawk si loh avang chuan ngaihthlak fo loh chu tha zawkin ka hria a ni.

Social media lama kan thalaite hawi harh zia chu kan hria ang a, YouTube Channel siamtute bengvar zia pawh kan hria ang. Ngaihthlak manhla tak a nih rual hian kan nunphung tibuai a, kan thinlunga cham reng tlak lo thil tam tak a lo awm tak avang hian a ngaithlatute lam hian chin tawk kan neih thiam a ngai dawn hle mai. Hmeichhe awm nem leh chhia leh tha la thliar hrang thiam tak tak lo te tana thu awmkhauh pui pui leh thu thindeng tak tak an ngaihthlak hian an thinlungah an vawng reng thin bawk si avangin zan an mut that theih loh phahin thil dangah an hnufum phah thei tih hi psychologist nih kher loh pawhin a hriat theih a ni. Chuvangin Cell Phone changkang kan nei a, Internet lam alo that bawk si chuan YouTube lamah zai leh film lam chauh pawh niloin thu ngaihnawm tak tak ngaihthlak tur alo tam tak bawk si avang hian a chin tawk kan thliar thiam a tha hle. Engkim hriat tumna hi rualpawlna leh hawihhawmna a ni kher lo a, hriat atana tha thu tam tak pawh kan ngaihthlak peih loh laia hriat reng tlak loh thu ngaihtlak fo hi kan nun tibuaitu mai mai a ni.

Rilru thianghlim leh chhia leh tha pawh la thliar hrang thiam lo tak takin thu rumra tak tak an han ngaihthlak hian an nun a nghawng nasa thei em em a, thenkhatte phei chuan an chauh phah hial thin. Hei hi thil pawi tak a ni a, thenkhatte phei chuan chaw an ei tui loh phahin an zirlaiah harsatna an lo tawh phah thin bawk. YouTube chauh a ni lo a, Facebook, WhatsApp, IG leh Tweeter lamte thleng pawhin a chin tawk kan insiam a ngai. Ni khata darkar thum vel Cell Phone hum a, hetiang buaipui kan nih phei chuan kan hnathawh leh thiltih lamah kan hnufum phah ngei ngei ang. Nu leh pa te ngei pawhin kan fate Cell Phone kan khawih tir a nih pawhin a chin tawk siam sak a, hun bik tuk sak pawh a tha viauin a rinawm.

POLITICS;

Ram veina avangin Politics kan ngaihven hi kan tih tur dik tak pawh a nih laiin Party Politics-a kan buai ta lutuk hi chu a nih tur bak a nih theihna lai a awm. A hun leh hmun pawh a awm a, nimahsela mi tam zawkte hi chuan a hun leh hmun pawh kan thliar hrang thiam ta meuh lo chu a nih hi. Hetiang avang hian thil danga kan rualpawlna leh kan tih tur tam takah daidanna min siam phah a, sap tawng takin ‘Groupism’ a thlen phah a, chu chuan intih bingna mai bakah midang ngaih theih lohna a thleng thuai bawk a ni.

Ka phak ang tawka ka chhuiin kum 1987 hmalama Mizoram Politics kha ala thianghlim viauin a hriat. A thianghlim tih avang hian a zavai phei chuan a ni hauh lo a, a tam zawkah chuan tun lai hun ai hian thianghlim tak a ni tihna a ni. Politician-te khan NGO (Non Government Organization) te kha an la ngai pawimawh em em a, an thu leh hla kha an dodal ngai meuh thin lo. NGO lam ngei pawhin a ni lo baksak takin Politician-te kha an nek/ nawr ngai hek lo a, an nek a, an nawr tawhna chin chu thil awm tak a ni tlangpui thin. Chutiang thilah chuan mimalin hamthatna lak tumna a awm ngai lo tlangpui bawk a, a bik takin MZP thawm kha mipui lam chuan kan thlawp thin leh bengkhawn ber a ni awm e. Kohhran Hruaitute thu leh hla pawh kha tupawh maiin kan zawm a ni mai a, Politician-te tan ngei pawh Kohhran Hruaitute thu leh hla kha chu hnial chi a ni meuh awm lo e.  

Tunah erawh chuan kan ram Politics kalphungah lungawih a har a, Politics chhunga politics boruak tha lo tak tak lo awm ta hi a pawi a ni ber mai. Mipui tana thahnemngai tak kan hruaitu fel leh tha tak takte ngei pawhin NGO hi Politics rahbi hmasa ang maia ngaih theih turin tunah chuan a lo awm ta hi a nih dan tur a ni chiah loin a hriat a. A chin tawk an neih ngai loh avang hian mi thenkhatte chuan NGO atangin Politics Field-ah an lut chho a, a vannei deuh chuan dinhmun sang tak tak te pawh an changin an chelh bawk a, a tam zawkte erawh chuan an tluan pui lo em ni tih turin Politics boruak chuan a chiah zawp leh mai thin bawk. Ram veina avangin Politics Field-ah kan lut dawn a nih pawhin mahni theihna chin kan hriat chian hmasak a, kan thlen tumna chin pawh kan hriat hmasak ngei a tha. Tum mumal kan neih loh a, kan theihna chin pawh kan hriat loh chuan luangno ang maiin thli thawtna lam apiangah kan thle kan thle mai ang. 

Tunlaia kan Politician tam takte hi chu Party Office-ah an ri luih luih a, amahni leh anmahni insawi phur chawpin leh Party dang sawichhiain nileng lengin an thukhawm a, chhungkaw tana hlawkna a awm lo mai pawh ni loin anmahni ngei pawhin an hlawkpui loh tur thu tam tak sawi chu an phur viau thin. Politics boruakah chuan Party dangte that lohna chu kan sawi ngei tur pawh a ni a, amaherawhchu an thawhrah dawng a, seng tur ber tur mipui tana thatna leh hnemhnanpuina awm bawk si lo tuipui hi kan Politician tam takte hian sim tawh sela a tha ngawt mai. Ram leh hnam tana innghahna tlak tur ruhrel ngaihtuahin hun hmang thin sela, tun aia tha zawka mipui tana ram inrelbawlna a kal theihna turin ngaihtuahna hmang thin zawk fo sela a duhawm a ni. kan Party ni lo, Party dangte hi an sual vek lo a, an fel vek bik hek lo. Kan Party an nih loh avanga chin tawk nei lek loa kan sawichhe chiam chiam thin erawh tu tan pawh hlawkna awm tak tak hian a rinawm loh. Mi pawi sawina mai a ni a, a thlirtu leh lo chhiartu tana mi maksak nihna mai chauh a ni.