PU BUANGA AWARD DAWNGTU Prof. RL. THANMAWIA

Mahmuaka Chhakchhuak

Oct. 13, 2022

 

Mizo Academy of Letters, Joint Hqtr. Lunglei buatsaiha kum 2000 atanga hlan thin PU BUANGA AWARD chu kumin, 2022-ah hian Prof. RL. Thanmawia hnenah hlan leh ta. He Award hian Trophy leh Certificate bakah Pawisa fai Rs. 10, 000/- a kengtel bawk a, a puala awmni khama hun hman a ni a, he hunah hian Khuallianah Pu C. Lalrinsanga, Minister chu hman a ni.    

He Award hi Mizo thu leh hlaa thawhhlawkte leh Mizo tawng hmasawnna tura tha leh zung lo hmang rim tawhtute hnenah chawimawina atan hlan a ni thin a, tum khatah mi pakhat hnenah hlan a ni thin. A tir lamah chuan kum nga danah hlan thin a niin kum 2015 atang erawh chuan kum thum danah hlan thin a niin tunah hian mi panga hnenah hlan alo ni tawh a ni. Chungte chu:

Lalsangzuali Sailo (Kum 2000-ah)

B. Lalthangliana  (Kum 2005-ah)

Prof. Laltluangliana Khiangte (2010-ah)

Lalthangfala Sailo (Kum 2015-ah)

RK. Lalhluna (Kum 2018-ah) te hi an ni.

Kum 2021 ah khan hlan leh tur a ni nain hripui leng avangin thulh a ni a, kumin, 2022-ah erawh Pathian zarah boruak alo ziaawm tak avangin PU BUANGA AWARD hi hlan theih a ni ta hlauh a, programme pawh tluang taka hman a ni. Top Ten atana hlanchhuahte chu;

C. Chhuanvawra

C. Laizawna

C. Lalnunchanga

Darchuailova Renthlei

Dr. Lalzuia Colney

J. Malsawma

Lalrammawia Ngente

Prof. RL. Thanmawia

R. Lalrawna

Rev. H. Killuaia 

Hengte hi aniin Alphabetical Order anga dah a ni a, heta tang hian Top Five thlan chhuah leh a niin chungte chu:

C. Chhuanvawra

Dr. Lalzuia Colney

J. Malsawma (Thanpuii Pa)

Prof. RL. Thanmawia

Lalrammawia Ngente te an ni.

Tichuan, Top Five atangin Top Three thlang chhuak lehin chungte chu;

J. Malsawma (Thanpuii Pa)

Prof. RL. Thanmawia

Lalrammawia Ngente te an ni.

Top Three atang hian Pu Buanga Award dawngtu tur ber thlan chhuah leh tur a nih avangin Board lam pawhin anmahni thua thu titlu loin Executive Committee-ah an thlen a, Executive Comtt chuan uluk taka an ngaihtuah hnuin ballot paper hmanga thlan a niin chutah chuan Prof. RL. Thanmawia chu thlanchhuah a ni.

Prof. RL. Thanmawia hi kum 1954-ah khan Darlak khua, In 30 khua lekah alo piang a. Naupan lai atangin kawng bumboh tak tak a zawh a, retheihna hi ka chaw a ni a, harsatna hi min cher puitlingtu pum a ni ti ngat tu a ni. A kawng sut tlangte hi a ngaihnawm a, mittui a kohchhuah mai bakah midang fuihna tana thu tha leh hlu tak a tling. Kum 1965-ah Pawl thum a zo a, an khaw thenawm Kawrthahah zirna chhunzawm tura a inbuatsaih laiin Mizoram buai avangin kum hnih chhung zirna a chawlhsan a. Chumi hnuah zirna chhunzawm lehin Kawrthahah hian chhungte pur buai loin inhlawhfa chungin lehkha a zir a, Kurtai leh Balhlate pawh a zuar fo a ni. Chumi hnuah chuan Pachhunga University College-a luh a tum a, College awmna hmun zawt chawpa a kalte kha tumruhna nasa tak nei lo mi tan chuan a har ngawt ang.

Principal Pu Rokamlova chuan sap tawngin alo be lui a, a ni lahin sap tawng a thiam si lo a, hrehawm tiin a tah te hial hial a chhuak a, nimahsela a tumruhna chu hriatpuiin Principal pawh chuan alo admit ta a. M.A zir turin Shillong a pan ve ringawt a, inghahna tura a beisei ber a U-te lah chu Aizawl lamah an rawn insawn chho daih bawk si a, a ni lahin thulh thei a ni tawh bawk silo chuan mi Inah awmna tur a hmu ta hlauh a, chhuat a nawt a, a insu a, eirawng a bawl bawk a, chutianga mi Ina awm chung chuan M.A a zir a, nimahsela a zir zawh hmain a awmnate chu Aizawl lamah bawk an insawn leh avangin awmna tur a nei ta lo! A thian pakhat nen chuan In an luah dun ta ngawt mai a, chutianga harsa taka ei tur dap pah reng chuan M.A chu tha takin a zir zo thei hram a ni.

Prof. RL. Thanmawia hian tumruhna nei lian lo hle sela chuan M.A hi a zir zawh theih a rinawm loh a, chutiang bawkin Mizo Literature-a Doctorate Degree nei hmasa ber pawh hi a ni hauh lo ang. A tumruhna hi Pathianin a hriatpui a, a tawpah chuan hlawhtlinna tlangah a hruai thleng a ni kan lo ti lo thei lo ang. Guide tur zawngin Professor hrang hrang a be hlawhchham a, mi pali a biak hlawhchham hnuah Prof. H.W. Sten chuan alo remtihsak ta hlauh mai a, a ni kaihhruaina hnuaiah chuan Thangchhuah Diar alo khim thei ta a ni. Lehkha thiam thei mi a nih avang hian atan zirlai harsa a tam lo a, an pawlah pakhatna a ni zar zar a, Mathematics leh Science Subject-ah phei chuan a chungnung hle a, full mark 100 ah 99 te a hmu thin. Pawl 9 a zir lai hian Pawl 8 leh Pawl 7 ah an zirtirtuten Mathematics leh Science Subject-ah zirtirna an lak tir thin hial a ni. Pawl 10 a zirlai pawhin hetiang bawk hian zirtirna an lak tir thin bawk. An zirtirtu Das-a chuan Mathematics-ah a chawh dik theih loh lai hi vawi thum lai a chawh dik sak tawh bawk nghe nghe a ni.

Pachhunga University College-a a zir lai hian Assembly House-ah a tul tul thawk chi – Watch & Watch Staff an tih ang hian a thawk a, kum tawp lamah Secretariat-ah LDC hna thawk lehin thla khatah Rs. 350/- a hlawh a, a zir zel theihna atan a inkhawl hram hram thin. M.A a zir zawh hnua a hna thawh chhoh dan chu hetiang hi a ni:

Lecturer, Department of Mizo, Govt. Aizawl College – 1981 – 1983

Lecturer, Pachhunga University College, Aizawl – 1983 – 1996

Reader, Pachhunga University College, Aizawl – 1996 – 2004

Associate Professor, Mizoram University – 2004 – 2008

Professor, Mizoram University – 2008

Controller of Examination, MZU – 2011 – 2016

Senior Professor, MZU – 2020 – July 2022

Eizawnna hna lamah hian a hun a hmang ral mai lo a, hetih chhung zawng pawh hian Prof. RL. Thanmawia hian thu leh hla lamah thangchhuah khawpin sulhnu a nei bawk a, Poet, Novelist, Essayist, Educationalist, Playwright, Critic leh Fiction Writer tia chhal ngam a ni. Essay leh Article hi 400 chuang a ziak tawh a, Hla 130, Play 5 bakah Mizo Folktales volume 7 zet a ziak a, volume 2 Hindi, volume khat English tea tihchhuah a ni. Chung bakah chuan Lehkhabu 31 zet a ziak tawh bawk a, a kutchhuak chi hrang hrang 29 zet chu Primary School atanga University thlengin Zirlai buah seng luh a ni. Heng a thu leh hlate avang hian kum 2012-ah khan India sorkar chuan chawimawina atan Padma Shri alo hlan tawh a, chhuanawm tak a ni. Kum 2005-ah pawh Mizo Biographical Foundation chuan Eminent Personalities Award alo hlan tawh bawkin Mizo Academy of Letters pawhin kum 2016-ah khan Academy Award alo hlan tawh bawk a ni. Tunah hian Ramhlun South ah chhungkuain an cheng a, Pathian zarah amah ngei pawh ala hrisel tha viau e.