L. KEIVOM THLAN TLAWH THU

Mahmuaka Chhakchhuak

Feb. 5, 2023 

 

Pipu sulhnu humhalhna lama pawl lian tak INTACH hruaitute chuan kei ber kher chu Delhi lama pawl aiawha kal tura ruat pahnih zinga pakhat ni ve tura min han thlang hi ka lawm hle mai a, hriattirna ka dawn rual rualin ka inbuatsaih nghal a, Pathian zara tluang taka kan kal thei a nih chuan duhthawh takin hun hman tum ila a tha ang tiin ka inbuatsaih nghal bawk a ni. 

Tichuan, Thlawhna Ticket buaipuiin Jan. 8, 2023 (Pathianni) chawhnu dar hnih chu thlen kim hun atana ruahman a nih avangin tlai ai chuan tiin a hma ni, Inrinni chu kal hun tur atana ruahman a ni a, ruahmanna ang takin Pathianin min hruai a, buaina leh harsatna engmah nei loin Lengpui Airport atang chuan Jan. 7, 2023 (Inrinni)ah IndiGo thlawhnain Kolkata pan a niin chawhma lam dar 11;15 ah chuan thlawk chhuak tanin tluang takin chhun dar 12;35-ah Netaji Subhas Chandra Bose Airport, Kolkata kan thleng a. Kan thlawhna IndoGo hi mi 186 leng a niin kei chu Seat 10D-ah thuin tukverh bulah ka thu a, tukverh hi a lian lem lo viau nain ka bih deuh reng a, ka thutpuite lah chu reiloteah an mut a chhuah mai avang chuan an chhing nghal deuh mai bawk a, kei erawh ngaihtuahna tam tak nen fiah takin ka meng kar thung a. Kolkata-ah hian rei ang reng tak chawlin tlai lam dar 4;08-ah IndiGo thlawhna bawk chuan chhuak lehin Delhi lam kan pan leh a, dar 6;59 PM-ah chiah Airport tumhmun chu kan thlawhna ke chuan rapin kan tum leh a.

Delhi khawpuiah chuan ni nga chhung vel chu thil dang ngaihtuah thei hauh loin kan thil tih turah chuan kan insawrbing a, India ram chhunga state hrang hrang atanga kalkhawm kan niin kan zavai chuan hmun khatah kan thleng khawm a, chhung leh zanah pawh hunawl reng reng nei loin kan tul a ni. Nilainiah kan hun hman a zawh avangin zan erawh a ngaiah la riak lehin Ninganiah chuan breakfast ei zawh veleh hian kan awmna hmun (Residential Resort) chu chhuahsanin Kishangard lam ka pan a, bawm tawt tak ata chhuaka inngaiin ka thaw a veng ta hle mai a, ka duh ang zawnga awm thei tawh turah inngaiin a hmasa ber atan Delhi khawpuia ka hmelhriat awmte tlawhna atan hun ka hmang hmasa a. Ka innghahna hmun Kishangard atang hian L. Keivom thlan awmna hmun, Borari hi a hla ang reng hle mai a, 35 Kms vel laia hla a nih avangin kalpui tur remchang ka ngaihven reng a. Pathianin kan duhna min hriatpui ka ti lo thei lo a, Inrinni chhunah hian Rev. PB. Chawngtinliana, Delhi Pentecost Kohhran (NEI) Pastor hnen atangin Phone call ka dawng hlauh maiin Pathiannia Christian Cemetery, Borari hmuna hun an hman dawn thu min rawn hrilh a, telve turin min sawm nghal a, ka lawm kher mai.

Pathianni alo thlen chuan hma taka inpeihin Pastor te awmna hmun chu ka thleng phei a, zing lam dar 11;00 velah Bus lian tak hmangin Kohhran ho, mi 20 velte nen chuan Christian Cemetery awmna hmun Borari lam chu kan pan ho a. Kohhrante chuan kum 2022 January 15-nia boral ta puala hun hman a, a thlan ngeia hunserh hman an tum avangin chulam vek chu an thinlungah pawh a awm ngei bawkin a rinawm. Kei atan erawh chuan L. Keivom thlan ka tlawh theih dawn avanga lawmna chuan ka thinlung a luah hneh hle thung a, ngaihtuahna pawh a kal ding thei hle. Khua a tha hlein Ni a sa viau mai bawk a, tluang taka darkar khat aia rei mah kan tlan hnuah chuan kan thleng a, Bus atanga chhuk vatin keimah chuan Thlan awmna lam chu ka pan ding nghal a. Mitthi vui tum mekte pawh an lo awmin anni chu kal pelin L. Keivom thlan chu ka zawng a, ka hmuh lawk loh avang chuan a sir lama hunserh hmanna tur lam chu pan lehin Kohhran hun hmannaah chuan darkar khat chhung vel ka awm leh rih a. 

Kan Pastor chuan hunserh a hmangin hla pawh pahnih kan sa a, kan hunserh hman chhan ber mitthi chanchin sawi a ni bawkin a pasal lah chu mittui a tla reng bawkin khawngaihthlak tak a ni. Hunserh kan hman zawh velehah chuan L. Keivom thlan zawngin ka kalkual lehnghal a, hetia thlan zawn a ngaihna chhan hi hmun dang ang lo takin helai hmuna thlante hi in ang veka siam a niin thlan sang nga vel awmah hian thlan sawm vel emaw chauh chu danglam bik deuha siam a ni. Thlan tam berte chu lei chhunvum chunga chinai hnawih var hi a ni vekin thlan lungphun pawh in ang tlang veka siam a nih avangin a hre tawh tan pawh hriat sual palh awl tak tur a ni. Ka thiante pawh chuan min zawnpuiin minute 10 hnu velah chuan L. Keivom thlan ngei chu kan hmu ta a, thlan dang ang bawka tlawm taka lo awmin a thlanah chuan Pangpar (Artificial Flower) hi alo awm bawk a. Thlan hi Cement hmanga Kross anga duan a niin 2fts vel leka sang a ni a, chutah chuan Mr. LALTHLAMUONG KEIVOM, AGE – 79 Yrs. DIED ON – 28. 11. 2021 tih zawng hi alo inziak a. Ka duh aiin thuziak hi tlem ka ti a, ka beisei aiin an ziak ho mange ka tizet tak nain thlan dang zawng zawngah pawh chuan hetiang deuh veka ziak a ni tih ka han hre hnuhnawh lehnghal mai bawkin kei hi ka lo duham mai mai zawk a ni ka inti leh a. Amah, L. Keivom ngei pawh hian hetianga ziak hi a duhdan tak zawk pawh chu niin ka han ring bawkin mi chapo lo leh mi inngaitlawm tak mi a nih avangin thlan dang ang bawka ziak chu a duh dan tak a nih ka han ring leh bawk a.   

Tichuan, L. keivom thlan chu ka han selfie-pui a, vawi nga vel zet ka hmeh hnuah chuan ka Cell Phone aia Camera tha zawk leh fiah zawk a awm beiseiin midang Cell Phone chuan vawi thum vel ka han hmeh tir leh bawk a, chumi hnuah chuan muangchanga kalsanin Bus awmna hmun lam chu kan pan a, midang zawng zawng hnungah kalin L. Keivom thlan lam chu ka thlir deuh zauh zauh bawk a; Mihrang L. Keivom lei taksa chu heti hian helai hmunah an han zalh ta mai chu a ni a, a mak mange aw tih ka rilrua a awm rualin riang riauin ka han hria a. Thlan dang tam tak chhunga phum tawhte nen chuan an zavaiin an thlan theuh ata rawn tho leh mahsela L. Keivom chuan kawm tur a nei awm lo mai anga tiin khawhar deuh bik riau tur te hian ka han ngai bawk a. Chutianga phum bo mai tur chuan pamhmai ka ti takzet a, lei khur chhung thuk taka tawih ral mai tura a taksa han phum vang vang mai tawh tur chu inhmeh lo hlein ka hria.

Amah ngeiin a thianpa Prof. Siamkima nat thu a hriat a, thu dengkhawng tak a han dawn khan a mit sulh a, a nghawng dan pawh tawngkaa sawi fiah ngaihna awm lo a, sawi fiah tum chi pawh a nih loh thu a sawi a. Prof. Siamkima nen khan thil tih lai mek neiin hmachhawp an neih mekte pawh a sawiin chutianga an inbuatsaih lai meka lehkha hmanhmawh a han dawng ta thut mai chu a hrilhhai zia ZORAM KHAWVEL – 3 ah khan a ziak a ni. Hetiang chiah mai hian L. Keivom hian Zoram tan tihtur ala ngah a, hmabak a neihte hi sawi tur tam tak a awm bawk ang. Chungte chu tu in nge chhunzawm ta ang tih ngaihtuah chunga Bus chhunga ngawi renga ka thut lai chuan kan chhuk alo hun leh der tawh mai a, Bus atanga chhukin Biak In lama inkhawm turin kan zavai chuan kan kal lehnghal a, engemaw ti taka khawharna chuan min zem reng a.