KAN MIT VAI CHU A NI SI LO!

Mahmuaka Chhakchhuak

April 9, 2023

 

Pu C. Lalremsiama (Pu Mapuia), Jt. Director Horticulture Department chu April 8, 2023 chawhnu lam dar 12;30 velah Aizawl lam atanga Sairang ram chhung, Buichali Lei thlen phei hma lawkah hian kawngthlangah tlanliamin a thlanga Tlawng luiah chuan a motor chawpa pilin tlai lam dar nga velah a ruang hi lakchhuah a nih thu Social Media-ah kan hmu a, a pawi hle mai. Pu Muanpuia, Director, Horticulture Department pawh be nghalin Pu Mapuia ngei chu a nih thu min hrilh nawnin a ruang a rawn zui chhoh mek thu a sawi a. Department lam tan pawh channa nasa tak ava ni rua em!

Pu Mapuia hi Khawzawlah alo awm ve tawhin kan chenna In chhak lawkah hian anni pawh a awm ve bawk avangin pawnlang deuh tak chuan kan inhre ve a. Pa fel tak leh mi pawi sawi lo mi tak a nih avang hian a awmna hmun apiangah pawh mi ngainat a hlawh a. Hetianga a han boral tak thutah chuan amah nena kan thil tawn hi fiah taka ka la hriat avangin ka han sawi ve hrim hrim teh ang – Rev. Rosanga Kawlni chu Khawzawl bialtu Pastor niin a hnung ka zui tam em em thin a, chutianga Khawzawla a awm lai chuan a pa, Serchhip Damdawiina enkawl mek chu Aug. 5, 2008 ni hian a boral a. Pastor-te chhungkua chu a boral hma hian Serchhip an lo thleng tawh thung a, Khawzawl atanga Pastor te chhungkua tawiawm tura kal tur an awm si lo a, a vuinaah tal chuan va kal ve ta che tia kan pain a tih avang chuan keimahin Serchhip chu ka pan ta a. Khawzawl atangin Seling thleng Bus-ah chuangin Seling atangin Serchhip lam pan tur motor-ah chuang lehin a vuina chu ka va nang hman a. Zanah pawh chuan la chamin a tukah chuan Khawzawl lama haw tumin Seling lam chu ka pan leh a, chawhnu her tawhah hian Seling chu thlengin motor dang ka chang leh a. Hetia Khawzawl lam kal tur motor ka chan lai hian Pu Mapuia hi Aizawl atanga Champhai pan tumin Car sen (Alto niin ka hria) hian amah chauhin a rawn tlan a, ka lo phar a, ka hmel a hmuh chuan dingin a kiangah min thut tir a, kan titi nghal mawlh mawlh a.

Tluang taka tlanin Dulte thlen hma lawkah hian zunram thiarin kan ding zawk a, helai hmun hi Dulte hoin Horticulture tanpuinaa Balhla hmun an siamna hmun a niin kan kal lai vel pawh hian Balhla kung tha tak tak a ding teuh bawk a. Pa thenkhat lo awm chuan Pu Mapuia chu an lo hmelhriat avangin an lo bia a, ka hriat sual loh chuan Pu Mapuia hian anni chu a hau niin ka hria a, Department atangin kan theih ang angin kan pui che u a, nangni lahin in thawk tha peih mang bawk si lo tih lam hian a hau niin ka hre ta. Kei lah chuan ngawi rengin an inbia chu ka lo ngaithla a, chung Dulte paho pawh chuan a thil sawi chu dik an ti nge ni an then tha hlawm bawk a. Tichuan, tluang taka tlan zelin Kawlkulh kan thleng a, thingpui pawh in khawmuang loin kan tlan zel a, hetia Kawlkulh kan pelh fel tawh, Tuichang lui kan thlen hma siah hian thil mak danglam tak kan hmu a.

Ni chu khawthlang lamah liam mai turin a her hle tawh mai a, hetih lai ber kher hian lirthei tlan lah a tlemin a reh em em mai bawk a. Keini pahnih pawh chu titi ngah tak kan nih lem loh avangin leh lirthei chuang chau tawh lam kan ni bawk nen chuan kan ngawih thei ang reng riau mai a. Ni lah chuan her liam mai chu a hreh hle ni tur a ni, a theihna zawng zawng hmangin eng ala chhuah hram hram a, keini tlanna kawngpui lam chu chhun tawh lo tawh mahsela kan vei lam tlang pang sir chu ala chhun fiah hle thung. Chutiang chuan Tuichang lui lam chu kan pan zel a, kawng kawi atanga kawng ngil thui deuh hlek bultanna kan thleng chiah tihah hla deuh takah Pa pakhat iptepui ak hi kan hma kawngsir veilamah chuan a kal a, Pu Mapuia chu lirthei khalhtu zawk a nih avangin kawng chhak lamah a thu a, kei chu vei lama thuin thlang lamah ka thu a ni. Kan hmaa Pa pakhat kal pawh chu fiah takin ka hmu a.   

A zawn kan thleng tep, feet sawm vel bak a ni tawh hauh lo ang tihah chuan a rawn lehhawi a, lirthei hmalam darthlalang atang chuan a hmel chu fiah takin a hmuh theih a. A hmel ka han ti tak naa keini hmel ang hi pu loin alo mam vek zawk a, ka ding lama thu leh lirthei khaltu zawk Pu Mapuia ngei pawh chuan a hmuh rual rual chuan ding deuh dawt pah hian ‘Ehe…’ a ti a. Nimahsela rang takin hma lam pan chuan kan tlan leh nghal vat a, mak kan ti dun hle mai. Mak kan tih thu chu kan sawi dun nghal mawlh mawlh a, mitvai khawhmuh chu a ni si lo a, chu mai bakah kan pahniha chiang taka kan hmuh a nih avang chuan hmuh sual palh a ni theiin kan ring si lo. Khua lah chu a thiang thain engkim mai chu fiah takin ala lang thei vek bawk a, sawi tawh angin Ni pawh la tla em loin kan awmna lai vel pawh kawngsira Laiking vak pawh fiah takin ala hmuh theih vek tho bawk si. Chutianga keini pahnihin hmai pangngai nilo hmai mam vek mai kan han hmu thut mai chu kan phu chiang kher mai. Kan tlan pel a, hmalam pana kan tlan lehnghal mai avang chuan engtin zel nge a awm tih erawh kan hre zui lem lo a, hnung lam atanga hmuh chuan Patling iptepui ak hian ramriah chawhmeh tur a zawng ni mai awm a nih laiin a hmel chu mihring hmel a ni hauh si lo a!

Tuichang lui chu kan thleng thla a, Khuailui kan thlen chhoh phei chuan kan sawi zui tawh lem lo a. Khuailui rama kum tam tak liam tawha kan lo chettlatna thinte chu mitthlaah a rawn lang uar uarin khua a har thar leh tawh zawkin keimah tak phei chu engmah dang ngaihtuah loin ka awm a. Tichuan, reiloteah Tuisen phai kan thleng chho a, Khawzawl pawh kan lut chho chu a ni mai a, Pu Mapuia pawh Office-ah thil pawimawh tih tur a neih avangin reivaklo la awm rih a, muangchanga a awmna hmun tak tak zawk Champhai lama la chhoh leh a tum a, Dinthar Canteen kawnah chuan ka chhuk san a. Kan thil hmuh erawh kum sawm leh panga hnuah pawh hian fiah takin ka mitthlaah ala cham reng a, mak kan la ti reng mai. Ramhuai a nih chuan Ramhuai hmu chu kan ni mai awm si a tihte ka thinlungah a rawn awm nghal bawk a.

Pu Mapuia nen hian chutianga inkawm thin kan ni hauh lo a, Pa Terema te kawt vela zing nilum ai laia kan inhmuh thin bak chu hetia a motora vawikhat ka chuan fuh hi kan inhmuh chhun chu a ni mai. Kan pahniha kan thil hmuh lah hi a ropui lo nasa mai si a, mak tak zawng a ni e. Ka tan chuan Pu Mapuia ka hriatrengna alo ni zel bawk nen sawi lo thei loa ka inngai ve a ni.