MIZORAMA CIRCLE INTERPRETER KAN NEIH TAN DAN
Mahmuaka Chhakchhuak
Sept. 13, 2023
Bawrhsap J. Shakespeare I.A chuan Kum 1902 atanga hman tan turin Mizoram pum chu Circle Administration sawm pahniha thenin Circle tinah Circle Interpreter pakhat leh an thachhang dawltu tur Circle Chaprasi (CS) pakhat zelin a dah bawk a. Bawrhsap chuan thuneihna sang tak pein kan Lalte thuneihna tawp hnuah pawh khawtlanga ram leh hnam humhalh turin an ni chu a ruatin Lalte chuan khawtlangah rorelna fawng chelh bawk mahsela heng C.I te chuan Bawrhsap hnenah an ngaihdan an thlen thin a ni. Chung C.I hmasa berte chu April 1, 1902-ah Bawrhsap chuan hetiangte hi a ruat a; Pasina, Romana, Darsata, Thangchhingpuia, Khuanga, Suaka II, Thangnghinga, Chawngkunga, Siamliana, Taikhuma, Buala Tlau leh Taikhuma Paihte te an ni. Anni hi Rs. 25/- te Rs. 20/- leh 15/-, 10/- hlawhte an ni hlawm. Anni chuan Bawrhsap aiawhin Mizoram chhung hmun hrang hrangah an zin chhuak thin a, khawtlangah Lalin rorelna nei bawk mahsela C.I te chu Bawrhsap thu kal lam leh haw lam kengtu ber an ni thin. Chutiangah chuan mipuite ngei pawhin C.I chu tlawnin an Lalte chu an hlauh loh phah telh telh bawk a, C.I thenkhatte chuan Lal te aiin an lo inti thu mah zawk bawk thin a. Mizo Lalte chuan an awp chin khawtlangah thuin an awp chin khua chu tha takin awm mahsela C.I te chuan khaw khat chauh awp loa khaw dangte pawh an awp avangin puakphur nen an zin thin a, an puakphurh tur chu Bawrhsap thuin Lalte chuan an lo ruahman sak thina ni. (1)
Bawrhsap an danglam angin an rorel dan pawh a danglam ve zel bawk a, Shakepeare hunlaia C.I te chu rorelna khawlah Lal te kal khumin a leklam viau thin a, Mc Call hunah erawh chuan C.I bial tin atangin Mizote’n an aiawh an thlang ang a, rorelnaah an rawn kal thin ang tiin C.I te chu Lal dawr turin a ti ve thung a. Kum 1941 Oct. 13 – 14-a Thenzawla Conference rorelna an neih pawhin chung C.I-te chu rorelna a neihpui a ni. Hetih hunlai hian Mizoram pumah Lal 390 vel an awm a. Kum 1946 Jan. 14-ah (C. Vanlal Ruaia chuan January 16, 1946 tiin a ziak thung 141) A.R. Lammualah chuan Aizawl bial 13 aiawh C.I thlanna neih a niin Lunglei bial 7 aiawh pawh July 7, 1946-ah thlan a ni bawk a, Aizawl bial aiawh thlanna hi Lammualah neih a niin Lal aiawh leh Hnamchawm aiawhte mi 13 ve vete chu hetiang hian thlan chhuah an ni; (2)
Circle No Lal aiawh Khua Hnamchawm
aiawh Khua
I Lalsailova Kelsih Dahrawka Dawrpui
II Khawkunga Bukpui H.
Kapthianga Chaltlang
IIIA Lamlira Hmuizawl Thangzika Sawleng
IIIB Lal
India Khawruhlian Khenkhama Phuaibuang
IVA Awksarala Phullen Ranga Saitual
IVB Lalzidinga Ngopa Vaitlaia Khawdungsei
V Vanhnuaithanga Kelkang Manliana Zotlang
VI Suakhnuna Lungpho Lalchhawnzova Chalrang
VII Tlanglianchhuma Hualtu Liantudaia Baktawng
VIII Saihnuna Mualcheng P. Saitawna Vanlaiphai
IX Lalthawvenga Sailam Lalzuia Sialsuk
X Ngurzachhinga Khawrihnim Lalbuaia Lungleng
XI Lalbuanga Tukkalh Pastor
Zahlira Tukkalh
Hetiang bawk hian Lunglei bial lam C.I pawh Civil Sub-Division Officer hoin July 7, 1946-ah chuan neih a ni. Hengte hi bial aiawh thlanchhuahte chu an ni; (3)
Circle No Lal aiawh Khua Hnamchawm
aiawh Khua
XII Lalthangdula Buarpui Rokawnga Vanhne
XIII Lalbuana Thingsai Pastor Khuanga Thiltlang
XIV Taikhuma Pukpui R.
Dengthuama Pukpui
XV Thangkunga Lungtian Aithura Muallianpui
XVI Aichhuma Tawipui Ch.
Saprawnga Theiriat
XVII Suakhnuna Sirte P.
Rohmingliana Ztr Tlabung
XVIII Chhunmunga Serkawr Laithuama Tuipang
Hetianga Aizawl bial 13 aiawh C.I thlanna neih a nih a, Lunglei bial 7 aiawh pawh thlan a ni bawk takah chuan Bawrhsap Mac Donald chuan Lal thenkhatte banin an aiawh pawh hetiang hian a dah nghal bawk a; Saitulera, Kawnpui Lal chu banin a aiah Subader Khawma Burma Regiment a dah a. Hluanzakhama, Mimbung Lal pawh chu banin a aiah Jamadar Burma Regiment. Dolura, Kawlkulh Lal aiah a fapa Saidaia a dah leh a. Saithuama, Hnahlan Lal aiah a fapa Johana a dah bawkinPhuaibuang Lal ban lehin a aiah Darthuama Jamader, Burma Regiment a dah leh bawk a ni. (4)
Hei hi Mizorama kan khawtlang aiawhtu kan
neih hmasak berte an ni a, thil chhinchhiah tlak tak a ni awm e.
References:
(1) C. Vanlal Ruaia, Pipute Rammutna {A
Socia- Cultural & Political Innovation of the Mizo} pages 131, 132.
(2) Chaltuahkhuma, Political History of
Mizoram, page 49 & H. Vanthuama MIZORAM Politics Chanchin {1952 hmalam}
page 15
(3) Chaltuahkhuma, Political History of
Mizoram, page 49 &R. Zamawia, Zofate Zinkawngah Zalenna mei a mit tur a ni
lo pages 67, 68
(4) Chaltuahkhuma,Political History of
Mizoram, page 49
Comments