ENG CHAWHMEH NGE I SIAM THIN

Mahmuaka Chhakchhuak

Oct. 29, 2023

 

Mikhual i nei a, emaw mikhual i nei dawn a, eirawngbawl sak a ngaih bawk si avangin eng chawhmeh nge i siam sak ang tih lam hi ngaihtuah ngai lo tak tur a nih laiin keimahni ngei pawhin kan mikhualna hmunah hian kan hmeh duh loh zawng min lo hmehpui fo tawh avangin han sawi hrim hrim teh ang.

Tumkhat chu kohhran thilah kan zin a, Aizawl atangin Lunglei khawpuiah hian hmun pakhatah hun rei ang reng tak kan cham a, rawngbawlna kan nei a, Pathian malsawmna pawh kan dawng a, kan lawm hle a ni. Kohhrante  chuan chaweiah min sawm thin a, a lawmawm hle rualin kohhran hruaitu pakhatin chaweia min sawm a, min hmehpui chanchin hi han sawi lang ta ila. Keini mikhualte chu pathum kan niin chutianga min duhsaka chaweia min sawm chu kan lawm hle mai a, vannei pawh kan inti. Nimahsela chawei dawhkan kan han thut hual a, chaw han ei dawnah meuh chuan kan hmeh turte chu kan han thlir a, khuhhring lian takah hian vawksa hring chhum thau hmel tak hi an chhawp a, Antam hang an chhawp bawkin a sir khatah hian dil sangah, kutphah tiat tur ang vel hi khuhhriang te deuh hian an chhawp bawk a. Min duhsakna avanga chutiang chawhmeh an buatsaih chu a lawmawm em em rualin keini lamah chuan vawksa hring chhum chu kan ei ngawrh em avangin kan ei chak lutuk lo a, sangha pum chhum chu tlemte  nimahsela kan suak zing zawk tlat thung a.

Kan tana ei siamtute hi ka dem lam a ni lo a, chutianga vawksa hring thahnemtham tak kan tana an chhum hluah mai chu min duhsakna a ni tih pawh hai rual a ni lo. Sangha ai chuan vawksa chu chawhmeh pawh alo tling zawk bawk avangin kan tan chuan a lawmawm lutuk a ni. Nimahsela a ni zawna vawksa hring chhum han hmeh tlak tlak chuan hne chin alo awm a, kan tan chuan ei a chakawm lutuk loh avangin kan ei khat zawk sangha pum chhum chu kan ban ngun ta zawk a ni. Chutianga vawksa thleng aia sangha thleng lam kan ban ngun takah chuan Nu ber chuan fiamthu deuhin ‘Kan vawksa thleng chu ava riang ve aw, sangha thleng lamah fian a thleng zing zawk tlat mai a’ a ti hial a. Za lo takin kan nui mai tak nain anmahni lam leh keimahni pawhin tihsual kan neih ve ve a awm a, inhmelhriat tha leh inngamtlak tak kan nih tawh avangin chutianga chaw eia min sawm dawn chuan kan chawhmeh duh zawng min zawt hmasa mai ta sela, emaw keimahni pawh chuan kan ei chak zawng pawh sawi ta  mai ila a fuh mai thei.

Hetiang hian nangni pawhin intawn fo a rinawm. Mikhual thlengtu zawk kan nih pawhin chawhmeh siam danah hian kan mikhual turte ei duh zawng tur aiin keimahni ei duh zawng tur siam hi mi thenkhat chu kan awm tlat avangin chaweia kan sawmte hian kan beisei aiin an ei tlem thin niin a hriat thin. Tumkhat pawh nupa innei tharte hi ka parawl laiin chaweiah ka sawm a, an nu chuan hmarcha ro rawt chih hi Ajinomoto leh chi nen hian a han chawh pawlh vak mai a, midangin kan ei pui lem si loh avangin a ei bang zawng chu a hnuah kan paih leh ta ringawt a. Hemi ka han sawi chhan hi chu chutiang chu a lo duh viau a nih pawhin midang ei ve tur an awm leh awm loh hre hmasa ta sela emaw ama eikhawp chiahin siam ta mai sela a fuh dawn zawkin ei leh in lamah hian mahni lam chauh kan thlir thin hi a fuh lo tih kan hriatfiah theihna atan kan han sawi lang tel duh a. Ei leh in siam lamah hian kan pi leh pute hunlai atang tawha kan la chhawm zel thin tam tak a awm rualin tunlai hunah erawh a aia tha leh tui deuh zawka siam dante hi kan lo hriat tawh avangin chungte chu ei siamtu chuan rilruah kan hriat tel a tha thin bawk a ni.

Broiler – Ar hi vulh kan tamin mikhual neihna hmunah chuan chawhmeh atana kan siam tam pawl tak pawh a ni awm e. Kan chawei-pui turte chu chawhmeh siam chungchangah kan be hmasa lo a nih pawhin kan siam dan tur chungchangah keimahni duh dan ang niloa an duh dan tura kan rin zawka kan siam a fuhin a rinawm. Broiler-Ar thau tak mai tui neia han kan li luau ringawt kha a fuh lo mai thei a. Buh nena chhum emaw Antam hring nena tui neia kan emaw te hi mizopa hrawkah chuan alo tui deuh zawk mai thei. A remchang a nih phei chuan Arsa chu hemhmin ni thei sela an ei tui zawk pawhin a rinawm. Tui nena kan hi ka sawisel lam a ni hauh lo a, Arsa siam dan tlanglawn tak a nih avangin kan han sawi mai chauh a ni. A hrim hrimin mi pangngai deuhte hi chuan mawm hi ei tlem hram hram kan duh hlawm thin avangin a mawm lo lam ka han sawi mawi deuh zawk a nih chu.

Mi tam takte hi chuan Sa lam aiin thlai hnah hring hi ei tam an lo duh zawk thin avangin a awm lai a nih chuan Antam hang emaw Maian emaw thlai hring dang siam tel hram pawh a fuh viauin a rinawm a, hel ei chi lam pawh hi thil uar chi tak a niin a rinawm. Taksa hriselna lam ngaihtuah loa ei nghek nghek chi hi mi kan tam tawh loh avangin chungte chu ei siamtu lam pawhin kan hriat reng a tha bawk ang a, an hmeh khat deuh tur chi lam zawn hram hram hi a tha thin viau a ni. Mikhual lam tan pawh ei duh loh neih hi a tha lo viau a, an siam ang ang ei hram a tha thin. Chutih rualin chawhmeh siam tur chungchanga in zawh hmasak thin hi thil chin tha tak a niin a rinawm a, a rem lo a nih pawhin an hmeh duh zawng tur anga lo siam mai pawh a sual chuang lo ang. Kan hriat reng tur erawh SA kher hi mikhual neihna chhan tur a nih loh ang bawkin mikhual zawk tan pawh Sa kher beisei tur a ni chuang lo a, chawei tuina leh tui lohna chu a thlengtu mit meng leh tawngkamahah hian a awm ber zawk.