HLIMNA TURA RAHBI PAWIMAWH

Mahmuaka Chhakchhuak

Feb. 26, 2024

 

Mihring tupawh hian lungngaih leh buaina tam tak avangin hlim har kan tih thin a, chungte vang chuan kan nun a nguai a, zan kan lo mu tha thei lo lehzelin kan hmelah ngei pawh alo langchhuak hial thin. A thente phei chuan sual rawng an bawl phah a, thenkhatte lah chuan mahni nunna hlu tak pawh hlut zo loin nunna hlu tak chu an lo tih tawp phah mai bawk a, a pawi hle. Chuvangin nang leh kei hian harsatna leh manganna rapthlak tak thilte kan tawng tawh mai thei a, kan la tawng leh zel mai theih bawk avangin kan tana hriatreng tur thil pawimawh, hlimna tura rahbi pawimawhte hetiang hian han sawi ila a tha ang e.

How to Stop Worrying and Start Living tih lehkhabu Dale Carnagie ziak hi kan chhiar hlawm tawh em ka hre chiah lo nain ala chhiar lo tan kan han sawi thar ni ta mai sela a tha ang e. He lehkhabuah hian lungkham luat avanga thinlung chau leh beidawng hialte tan pawha hmalam pan theihna tur pawimawh tak tak a sawi a, chungte chu hetiang hian han tarlang ila: 

1. Tun hun ngaihtuah rawh: Thil thleng tawh avangin i rilru a buai a ni mai thei a, a nih loh pawhin thil lo la thleng tur avangin i nun ram a chau viau pawh a ni thei. Chungte chu tlansan ngawt theih lah a nih si loh avangin mi tam takte chuan kan chauh phah a, kan dam loh phah a, a thente phei chuan mahni nun hian an lo tih tawp phah bawk a, a pawi hle mai. ‘Hlim rawh’ in tih ngawt theih a ni lo a, chung thilte chu theihnghilh tura intih ngawt lah awmzia a awm thei tak tak thin si lo.    

Chutiang boruakin mihring a chimbuai lai tak tak chuan tawngtaina meuh pawhin awmzia a awm lo em ni tih tur hial a ni thin a, nimahsela engmah hi awmzia awm lo a ni hauh lo a, thil pawimawh deuh pakhat chu tun hun ngaihtuahna hi a ni. Kan vawiin hun, kan hun hman mekah hian ngaihtuahna kan hman hi thil tangkai leh pawimawh tak a ni a, chu chuan kan ngaihtuahna tam tak a hruai kawi theih avangin lungkham neih leh thinlung ipikna tam takte pawh a chhawk zangkhai thei thin. Kan tun hun thilte chu thil pawimawh tak tak erawh an ni kher lo thei; Hmarcha rawt a ngaih chuan rawt mai la, hmunphiah a tul pawhin phiat mai la, chutiang zel chuan i thinlung ngaihtuahna chu i thiltih chuan luah khat hneh tlat rawh se. Chung zawng zawngin ala chhawk zangkhai thei lo che a nih chuan in thenawm hnenah thilpek eng emaw va pe la, chawhmeh va suah emaw thil eng emaw va pek hrim hrim kha midang tan chauh niloin nangma tan ngei khan a that zia i hre ngei ang.

2. I lungkhamte chu sutkian tum rawh: A chunga kan sawi zawh tak chiah hi chu tlansanna kawng a ni a, tunah chuan i lungkhamte chu sutkian tum rawh tih a ni ta thung a. Kan lungkham neih thil tam takte hi chu lo thleng ngai lo tur te pawh an ni ve fo. Hlauhthawnna kan neih tam takte pawh hi a taka thleng ngai lo turte pawh an ni fo thin a, lirthei chuan avanga tawhsual tawk tura inngaih ngawt tur a ni lo a, thinga lawn avanga tlak ngawt tur lah a ni hek lo. Chutianga vanduaina tawkte chu mi tlemte chauh an ni tih hi hriatreng tur a ni a, kan chunga thleng ve kher tura ngaih tur a ni ngai lo.

Thihna ngei pawh hi mihring thil tawnah chuan thil pawi ber pawh a tih theih hial ang a, a pawi em em a ni. Nimahsela mi tam tak chuan thihna avanga nun thar an neih emaw malsawmna an dawng zawk emaw tih turte pawh an awm tho a sin. A chhan chu mitinin kan tawn theuh atana Pathianin a ruahman a ni tlat si a, tawng ve lo tura inngaih kha a dik hauh lo ang a, kan tawn avanga tuar bika inngaih pawh a tha kher lo ang. Chu thihna rapthlak tak ata chu zirlai zir turin kan thinlung kan buatsaih tur a ni a, tawngtaina pawh kan thlahthlam tur a ni hek lo.  

3: Harsatna chingfel turin hma la rawh; Harsatnate i ngaihtuah reng a, a thim lam ringawtin i ngaihtuahnate eiral ai chuan chung thilte chu chinfel tumin hma la zawk rawh. Lungkhamna hneh tura hmalakna leh harsatna chinfel tura inbuatsaihna pawimawhzia hi sawifiah thiam hleihtheih pawh a ni chiah lo a, a taka inbuatsaih tawhte tan erawh a hluin a tangkai hle.

Eng harsatna pawh hian min hneh tur a ni lo a, chu harsatna ai chuan ka chak zawkin thil kan ti thei zawk a ni tih thinlunga nghet taka kan neih a pawimawh. He khawvelah hian thil thar engmah hi alo awm lem lo a, kan tawn ang hi midang pawhin an tawngin an lo paltlang ve vek tawh mai bawk a, nang leh kei ang hian hrehawm ti takin hun an lo hmang ve tawh bawk thin. US President ni tura Lincoln-a beihna kawng thui tak chanchin kha kan tan zir tur tam tak a awm laiin tuipuiral daih ami alawm kan ti a nih pawhin Rev. Vanlalbela hringnun kawng chhukchho chanchin emaw tunhnai lawka MIS tling thar Vava chanchin tal hi chuan min hneh ngei a rinawm. Anni hian harsatna hi a hel lo a, an sutlang a, an paltlang avangin hlawhtlinna tlangchhip an chuangchhuak thei a ni. Keini ai hian an thiltawnte hi a nep bik hauh lo ang.  

4: Ngaihtuahna tha tak nei rawh; Lungkhamna leh harsatna hnehna kawngah hian rilru tha neih a pawimawh hle. Kan lehkhabu sawi mek How to Stop Worrying and Start Living ziaktu Carnegie hian ngaihtuahna thain thil a tih theihzia a sawi uar hle a, ngaihtuahna tha lo chu thil tha hmanga thlak a rawt bawk. I nunah thil tha lama ngaihtuahna fim tak neih a, dinhmun tha lote chu i siam that leh chuan i rilru put hmang i thlak danglam thei a, lungkhamna i ti tlem thei bawk a ti a. He thu hi a dik hle mai a, ngaihtuahna tha kan neih loh avanga harsatnain min hneh emaw harsatna avanga nghawng tha lo zawk kan tawn hi a awm fo thin.

5: I taksa hmangaih rawh; Mahni taksa hmangaiha enkawl that hian harsatna leh lungkhamna lak ata hlimna hmunah min hruai thleng fo thin. Taksa enkawl that hi a pawimawh hle mai a, chutah chuan chawlh hahdamte, chaw ei thatte, exercise neih thatte leh hlimna leh hahdamna thlen thei thil tihte a tel a. Mahni taksa enkawl that hian chhelna a siam a, harsatnain nunah nghawng a neih pawh a ti tlem thei. Hrisel that loh chuan thinlung a hlim tak tak thei lo a, harsatna phei chuan chutianga taksa chaklo chu a hneh awlsam em em thin avangin kan taksa hmangaiha enkawl that hi a pawimawh hle.

6: I thunun theih loh chu thlahthlam mai rawh; I tihdanglam theih loh leh i thlak danglam theih loh thilte ngaihtuah hian i nunah ṭul lo takin harsatna leh lungkhamna a belhchhah zawk thin em? Chu ai chuan chutianga harsatna i thunun theih loh thilte chu ngaihtuah tum lo lui turin i thinlung buatsaih la, i thunun theih tur thilte chu ngaihtuah theih hram tum zâwkin chutiang tur chuan hma la rawh. I thlak danglam theih loh thilte i thlahthlam theih chuan thlamuanna i hmu theiin, harsatna leh lungkhamna a ti tlem thei bawk a ni. Entirna atan ruihtheihthil timi ngaihzawng i nei a, sim se i duh laiin a sim theih bawk si lo a, nangin i hmangaih tlat bawk si avangin a thil tih chuan nangmahah hrehawmna nasa tak a thlen reng ai chuan hmangaih loh rih mai tumin i thinlung chu hneh tum ang che. 

Mihringin harsatna kan tawh leh lungkham kan neih thil tam takte hi a inang vek kher lo ang. Nimahsela chung harsatnate paltlang a, hneh tur chuan kan sawi tak thilte hi a pawimawh hlawm hle a, chu chu hlimna tura rahbi pawimawh tak pawh a ni. Nunna hi a hlu a, nunna pakhat chauh kan neih avangin kan ngai hlu bawk tur a niin nun beidawnga kan awm a, harsatna chhum thim chah takin min tuam a nih pawhin minute reilote tal thinlung fim kan put hram a pawimawh a, chu hun reilote emaw pawh chu damna atan leh hlawhtlinna atan kan hmang thei dawn a ni. Keimah ngei pawh hian tukverha zuanthlak tuma ka din uai tawha ka zuanthlakna tur chu engtia sang nge tih pawh ngaihtuahna ka neih miah loh laia minute reilote thinlung fima ka awm kha vawiin thleng hian ka lawm zia ka sawi bang thei ngai lo.