MST BUS

Mahmuaka Chhakchhuak

April 10, 2024

 

Tunhma deuhah kha chuan MST Bus-a chuang tur chuan Vanapa Hall kiang hnaih lawk building hnuai aṭangin ticket kan la a, ticket pawh kha zing karah lain kan lak zawh ruala motor-ah lawn nghal kha ni mai zel bawk a. Ṭumkhat chu keimahin MST Bus-a khawzawl lama haw chhoh tumin ticket chu ka thawmhnaw nena bawr takin ka va ngaihven a, Aizawl aṭanga champhai kha cheng 80 vel niin ka nei daih lo a. Chuan man tur ka neih daih loh avang chuan hehawm ti takin ka let leh hna hna a, a piah lawka Pu F. Kapsanga te building kawtah chuan ka hmelhriat Awitea (Lalawithanga) hi alo awm a, a ni chuan ‘khawnge i kal a’ a tih chuan ‘Hei khawzawl haw ka tum a, ticket man ka lo nei daih lo a, ka let leh mai a nih hi’ ka tih chuan kha tih pahin cheng 50/- hi min pe a, ka lawm kher mai. Tichuan, let lehin ticket pawh chu ka la a, khawzawl thleng chuan cheng 65 vel emaw hi a lo ni a, a tirah khan champhai thleng tur khan ka nei daih lo a, khawzawl thleng tura cheng 65 vel a ni dawn tih kha ka hre lo hrim hrim a, ka lo ngaihfin vang pawh a ni ang e. Tun hnu, kum 27 hnu thleng pawh hian khami ṭuma ka lawmna kha ka la theihnghilh thei lo a, Awitea hi lawmthu hrilh nawn fo ka la duh.

MST Bus khalhtute hian an khal chak thei bik niin kan hre bawk a, chuvang chuan kan thleng hma bika kan inhriat avangin Bus dang aiin kan thlang zawk thin. Amaherawhchu khualzinna atan Sumo kan lo uar tak hnuah erawh hi chuan MST Bus ngei pawh chu a hnawng sawt ta hle mai a, Aizawl leh Champhai inkara tlan thin pawh alo tlan tawh loin Mizoram puma tlan pawh a tlem sawt ta hle mai. Heti chuan an senso pawh an hmuchhuak lo mai palh ang tih pawh hlauhawm tak a ni thei.  

MST Bus-a chuan kan duh chhan ber kha a chuanman tlawm vang tih kha a ni deuh mai tak nain vawiin thleng hian MST Bus chuan man tlawm zawkin mipui rawngbawlna ala nei chhunzawm char char thei zel hi fakawm tak a ni. MST Bus rawngbawl ṭanna hi a rei tawh ang reng hle a, Feb. 21, 1972-a UT kan nih ṭantirh rual khan Mizoram State Transport (MST) pawh din a ni nghal a. He a bul ṭantirhnaah hian Mizo District Council aṭanga chhawm Bus hlui pakhat leh Bus body leh chawp Truck pahnih chauh chu an lirthei neih a ni mai a. Sawi hmaih hauh loh tur chu hetih hunlai hian Transport leh Supply hi Directorate pakhata awmin ‘Directorate of Supply and Transport’ tih a ni a, June 4, 1987 ah khan ṭhenhran a niin Directorate of Transport hnuaiah chuan hengte hi a awm a;

General Transport (DC Transport tia hriat)

Motor Vehicle Wing

Mizoram State Transport

Railway Out Agency

Tichuan, Aizawl aṭanga khaw dang danga a tlan dan pawh hetiang hi a ni a;

Aizawl aṭangin Lunglei,

Aizawl aṭangin Rajiv Nagar

Aizawl aṭangin Marpara

Aizawl aṭangin Khuangthing

Aizawl aṭangin Saipum/ North Hlimen

Aizawl aṭangin Mimbung

Heng bakah hian hnam inpumkhatna Bus, Phuldungsei (Tripura) inkarah tlan tir a ni bawk a.

Henga zinnaah hian sorkar lamin MST Bus-a chuangte zingah ngaihhnathiamna hengte hi a nei bawk a; Cancer vei mekte, HIV kai te, Mitdel te, Taksa piangsual leh rualban lote tan a thlawna chuan theihna turin a ruahman a, kum 65 tling chin tan pawh chuan man chanve chauh ala ṭhin bawk a. Hmeichhia, kum 60 chin chunglam tan Mizoram chhungah a thlawna a chuan theih bakah Mizoram pawnah pawh chuan man chanve chauh ala ṭhin bawk a ni.

Hetianga mipui tan rawngbawlna an nei reng chungin mipui lam zawk chuan lirthei chuan man to zawk chu kan chuan tamna a han ni tlat mai hi a chhan hriat chian ni chiah lo mahsela MST Bus hi chu a chhuak hma thei tih leh dawr an buaithlak tih emaw chauh a ni mai thei e. Chhuah hma leh chhuah hma loh chungchang erawh a chuang turte duhthlanna ni ta mai se. MST Bus rawngbawlna erawh chuan mipui ngainat a hlawh ta lo sawt hi chu a veiawm kan ti dawn nge ngaihtuah chian a ṭha mang e. Ngaihhnathiamna nei chung pawha chuan man to zawk leh an thlen chin pawh inang reng chung sia sorkar motor zawk a han hnawng ta deuh fo mai hi kan rilru puthmang lam dik lo zawk em ni tih tur a ni thei ang. Sorkar enkawl a nih vanga nuam lo leh ṭha lo zawkah kan ngai a nih chuan sorkar leh mipui lam pawh kan inenfiah ve ve chu a ngai ni mai awm tak a ni.  

Khaw kar kawng zinna atana Sumo kan hman uar chhan hi atir lamah kha chuan kan kawtkaia min rawn lam a, kan duhna hmun taka min thlen ṭhin vang kha niin ka hria a. Chutiang thlap thlap chu tunah erawh chuan a ni tawh hauh lo a, MST Bus-te nen an thlen chin a inang reng tawh a, an counter thleng bak an tlan tawh ngai bik lo. Bus leh Sumo hrim hrimah duh kan thlang a nih chu thuhran a ni a, rethei inti hlawm viau chung si a, a chuanman tam zawk mipui lamin kan han bawh ta tlat mai hi chu kan lo rethei vak lo em ni tih tur a ni thei bawk a. Chutiang zelin, kan sum leh pai lakluh mila nun kan thiam lo a, neih baka inchei kan duh a, neih baka khawsak kan duhin neih ang tawka nun kan thiam lo a, neih baka nun duhna thinlung kan nei tlat ṭhin hi piansualna chi khata ngaih chi a ni hial bawk awm e. Chutihrualin khualzinna atana MST Bus aia Sumo kan hmang uar ta zawk hi sorkar lam pawh thiam lohna chen a nei ve ngei mai chuan a rinawm. Ticket lak dan aṭang ringawt pawhin Sumo ticket lak dan nen a inang lo lutuk a, tun ai hian mipui tana dawr nuam zawk turin ruahmanna nei sela a duhawm.