VAWIIN CHU

Mahmuaka Chhakchhuak

April 19, 2024

 

Vawiin chu hranghlui zinga ka ngainat zualte biakna hun neiin ral hla a\angin kan inkawm a, manhla ka ti hle mai.

A hmasa berin F. Lalremsiama IPS (Rtd) ka bia a, a ni hi tunah kum 93 ni tawhin Chaltlangah an chhungkuain an awm a. A taksa a chak vak tawh loh avangin pawn a chhuak tam peih tawh lo a, nitin chhuak chanchinbu erawh ala chhiar reng peih thung. Pu F.LR. Siama ka fakna em em chu Indian Police Services a nih angin Sorkar hnathawkin India ram hmun hrang hrangah hun a hmang a, rambuai lai pawh khan Aizawl SP a niin sorkar hna a thawh chhung chanchin hi sawi tur tam tak a awm. Term khat emaw chauh MLA a ni hman a, kum 1993-ah khan Aizawl East II bial aṭanga thlantlin a ni.

Term khat chauh MLA nimahsela a bial enkawl danah leh bial tana hna a thawh danah hian vawiin thlenga fak leh chawimawi a hlawh a, ama ṭawngkam ngei ka hriat danah phei chuan a MLA chhung khan vawikhat chiah ‘Khuallian’ a ni. Khuallian kan buaipui dan leh ram hruaitu tan ngei pawh khualliana ṭan kan uar ṭhin hi a ni hi chuan a duh ngai lo a, bial mipui tana hnathawh hi kan MLA nih chhan niin chulamah chuan theihtawp i chhuah zawk ang u tiin khuallian tura an sawm ṭhinna zawng zawng pawh a hnawlin ṭumkhat erawh lotheihloha a ṭan thu min hrilh. Vawiin thleng pawh hian MLA/ Minister te hi chuan khuallian nih hi chak vak lo sela a duh a, khuallian an nihna aiin mipui tana an hnathawh ṭhat leh ṭhat loh hi hriatreng a ni ṭhin zawk a ti. 

Heti zat a kum a nih tawh hnuah pawh ram ala vei hle mai a, tun sorkar tharah hian chhim lamah eng hmasawnna nge awm tawh tihte min zawt a, ram hmasawnna tura a ngaihtuahna hi ala chawl thei lo a ni. Ram veimi a ni tih hi midang pawhin an haiin a rinawm loh a, kumin kum tir lamah ngei pawh khan kan CM thar hian a hranpa ngatin a han tlawh kha a ni a, eng thu nge an sawi phei chu hre lem lo mah ila titi satliah mai mai chu an niin a rinawm loh. Pathian zarah lo dam reng rawh se.

Pu F.LR. Siama ka biak zawhah hian kum 81 val, Pu Vanlalngaia ka be lehin a ni nen phei hi chuan kan inbe awl lo a. Pathian zarah a ni pawh ala hrisel ṭha ang reng viauin mitthi inah leh thil pawimawhah chuan ala chhuak reng peih a. Pu Vanlawma ang bawka zofate inpumkhat duhtu niin chulamah chuan a thinlung pawh a pe nasa hle mai a, a titi duh zawng ber pawh a tihtheih hial ang. Sulhnu tam tak nei tawhin ṭhangtharte tan hmahruaitu a ni takmeuh a, tunah pawh lehkhabu pakhat tal chu tihchhuah leh ala tum fanin a ngaihtuahna ala chawl tak tak thei lo.

Anni pahnih ka biak zawha hian Leitlangpui aṭanga Padma Shree dawngte zinga min la dampuitu awmchhun Pu RK. Lalhluna ka be leh a. A ni phei hi chuan kan inah ngei pawh min rawn tlawh leh zauh ṭhinin kan inlungrual viau. Amaherawhchu tlem lai aṭang khan ka be tlang thei ngai lo a, a cell phone a ṭha lo nge eng nge a chhan ka hrethiam chiah lo a, vawiinah ngei pawh hian ka be tlang thei lo leh ngei mai. Nimahsela inbiak a khat emai tiin an inah ka kal zawk teh ang ka ti a, ka insiam sawk sawk a, Chanmari a\angin Lunglawn lamah ka tlanchho nghal a, an inah chuan alo awm lo a. Khawnge pu Hluna ka tih chuan Damdawiinah a awm thu min hrilhin a awmpuitu, a fanu Telawmi number min pe bawk a. Damlo inkan hun a nih chiah bawk avangin rang takin a awmna hmun Serkawn Hospital lamah chuan ka tlan chho leh a.  

A Bp sang vanga damlo niin a taksa dangah erawh natna hran a nei lem lo a, a kianga ka han thlen chuan khumah ṭhuin pangngai takin kan inkawm thei a. A natna chanchin tawite min hrilh bak chu a lehkhabu ziah lai chanchin hlir kan sawi a, kan titi tui hle mai. Lehkhabu 35 lai tichhuak tawhin tunah pawh hian pakhat tihchhuah mai tur a nei bawk a, hei bak chu ka buaipui peih tawh lo ang tiin min hrilh nghe nghe a, fakawm ka ti hle mai. Pu RK. Lalhluna hi talent nei ṭha tak a niin History lam lehkhabu engemawzat a ziak tawhin Pathianthu lam pawh lehkhabu a ziak tawh bawk a. Chung bakah chuan Latin Dictionary te pawh a siam tawh bawkin hla lamah pawh kutchhuak a nei tawh bawk a. Pasalṭha Zampuimanga Thlan awmna zawngchhuaktu niin kum 1997-ah khan Chawngtui ramah alo zawngchhuak tawh a. Pasalṭha bawk Chawngbawla thlan pawh ama hmuhchhuah bawk hi a ni. Senglawn Zo, Fam Lalzova, Mizo History Kamkeuna, Mizo ṭawng Dictionary, Music Zirna, Rothangpuia leh Thangliana, Darlenglehi, Latin English Mizo Dictionary, Kan Bible hmanlai an sawiselnate Bihchianna, Darleng Lei, Seipuia Pasalṭhate, Apollo Monubi, Chhailai Di, Keimi, Mizo pi pute Arsi hriatdan, Open Air Evangelism, Staff, Tonic Solfa Zirna, Lawhlei te hi a Lehkhabu ziah kan han hriat mai theih an ni.

Hetianga nikhata mi pawimawh tak tak ka han be thei hi vannei pawh ka inti a, biak remchang lo ber Pu RK. Lalhluna lah a damlo chungin kan inkawm thei bawk a ka lawm hle. Kan zinga kum upa zawkte hi biak zauh zauh an lo ṭha hle mai tihte pawh ka ngaihtuahnaah a awm reng phah a, natna avangin emaw vanduaina avanga thih thut thut pawh thleng fo ṭhin a nih vangte hian kan biak duh ngawih ngawihte pawh biak remchang tawh lote hi a awm thei bawk avangin ṭhalai zawkte hi chuan kan remchan dan ang angin kum upa zawkte hian biak zauh zauh ching ṭhin ila a ṭha awm e.

Kan ram angah hi chuan kum upa zawkte tan hmun bik buatsaihna hi mumal taka ala awm chiah loh avangin kum upa zawkte hi anmahni inah khawhar takin an awm fo ṭhin a. An chenpuite chuan ṭha takin enkawl bawk mahsela an tuizawng leh nuam an tihzawnga titipuitu hi an mamawh ṭhin avangin ṭhalai zawkte hian kum upa zawkte kawm hi intihhmuh ṭhin ila a ṭha viauin a rinawm a ni.