KRISTIANNA LEH ZU

Mahmuaka Chhakchhuak

Sept. 29, 2024

Kristianna mit aṭanga Zu kan thlir hian kan fak thei lo a, engtiklai mai pawhin sual lian tak ang hiala kan ngaih a ni ber a, A sawimawi lam phei chu kan thei lo hrim hrim a nih bawk hi. Nimahsela Zu hi heti tak hian haw mah ila, sawi chhe mah ila kan zingah a awm reng thoin a in mite chuan in tur pawh an hmu thei reng tho si a, kan do dan leh kan beihlet dan hi a nep deuh ngei a dik tawk lo ni ang tih pawh hi ngaihtuah tham tak a ni awm e.  

Pathianthuah Zu chungchang fiah taka inziahna kan hmu nual a; Gen. 19;32- 35 thuah Lota fate’n Lota chu Zu-a an hrai ruih thu leh a zurui chu an mutpui thu kan hmu a. A fanu upa zawk leh naupang zawkte chuan zanhnih lai an pa Lota chu hrai ruia an mutpui thu kan hmu a ni. Nums. 6;3, Roreltute 13;4, Rom. 14;21, Ephessi 5;18, Thufingte 20;1, Thufingte 23;20 leh Bible chang tam takah Zu ṭhat loh zia kan hmu a. Chutih rual chuan Zu hi ringtu ṭha tak tak awmna ramah hian a rem hauh chuang lo a, kohhran rawngbawltute ngei ngei pawh hi Zu lak ata an filim vek bik chuang hauh loin in ve zauh zauh ṭhin hi kan la awm zel bawk nen hian engtiang chiahin nge Zu hi do tur ni a, engtiang chiaha ngaih tur nge ni ang tih hi ngaihtuah ngai tak a ni.  

Kristian Sakhuain Zu a thlirdàn chi thumte:-

MODERATIONISM: Ringtu hmasate leh Kohhran puipate chuan Zu hi chuti taka haw loin Bibleah ngei pawh kan hmuin a tawka hman theih a ni tih hi an lo pawmdàn tlàngpui a ni a. Kum 1800 chhùng zet kha chu ringtute'n he ngaihdàn hi an lo pawm tawh a ni.

Moderationism-ah chuan, 'Kan nun dàn leh thiltihah, 'tàwk chin neih' hi Bible-in min zirtìr dàn a ni' tih a ni a. He thlirna aṭang chuan Bible-a kan hmuh aṭang leh tradition aṭang paw'n Pathian thilpék zìnga mi a ni a. Lalpa Zànriah leh rilru tizangkhai na'n ṭha taka hman ṭhin a ni a. A ṭhat lohna lai tam tak awm mah se, khap bur emaw, hnawl hmak emaw lovin fing tak leh changkang tak, a tàwktè (moderately)-a hman theih a ni an ti. He ngaihdàn pawmtu Kohhran langsar zual ṭhenkhatte chu – Roman Catholic, Eastern Orthodox, Anglicans, Protestant (Lutherans leh Reformed Church-ho, Presbyterians, adt) an niin anni bakah hian Martin Luther-a leh John Calvin-a te pawhin hetianga ngaihdan hi an pawm bawk.

ABSTENTIONISM: He ngaihdan neitu aṭanga thlirtu chuan, 'Zu hi sual a ni ngawt lo a, Zu in pawh hi sual a ni hran lo; mahse, hman sual theih leh chhiatpui theih a nih avàngin in loh mai hi a himin a finthlàk ber a ni' an ti thung.

Abstentionist zinga a tam berte chuan Zu in loh tawp hi ṭha ti hle mahse, Kohhran member ni tùrin zu in lo hmak kher a ngai lo a, mahse, Kohhran hruaitu leh rawngbàwltu erawh chu fihlim ngei tùrin an duh thung. Bible hian Zu hman sual a duh loh vàngte, ringtu chak lo zawkte hmakhua a ngaih avàngte leh vàntlàng mithmuhah fel leh entawntlàk an nih theihna'n fihlim se an duh zawk a. He ngaihdàn pawmtu Kohhran thenkhatte chu - Baptist Kohhran hrang hrangte, Pentecostal-hote, Methodist te leh Salvation Army te an ni. Tin, Billy Graham-a te, John F. Mc Arthur te, R. Albert Mohler Jr. Te leh John Piper-te hian he ngaihdàn hi an pawm bawk.

PROHIBITIONISM: Khap bur duhna neitute thlirna aṭang chuan, 'Zu in chu sawi loh, Zu hrim hrim hi sual a ni' an ti tawp thung. Zu khap burna leh Dàn hmanga khap beh hi an duhthusam a ni a. He ngaihdan pawmtute zinga a filawr zualte phei chuan Bible-a Zu lannate pawh thai bo hial duh te pawh an awm.

Prohibitionist zinga ṭhenkhatte chuan, 'Zu a awm loh chuan tan in pawh a awm a ṭul kher lo ang' an ti hial a! Prohibitionist hi USA leh ram ṭhenkhatte'n Prohibition an hlawhchhampui hnu khan thlawptu an tlem phah hle a ni. He ngaihdàn thlawptu Kohhran thenkhatte chu – Evangelical kohhran ṭhenkhatte leh Fundamentalist kohhran ṭhenkhatte bakah Southern Baptist, Seventh Day Adventist, The Church of Jesus, Christ of Latter - day Saints (Mormon) te an ni.

Hetiang a nih vang hian keini Mizo Kristiante zingah pawh ngaihdan a phir thei bawkin a rinawm nain kohhran lian ber Presbyterian Kohhran erawh chuan a doin an do a, Zu hrim hrim hi sualah an ngai a ni ber awm e. Hei vang hian kohhran dangte pawh chuan ngaihdan dang neiin thawm hran lo nei mahsela Kohhran lian ber ngaihdan chu kaltlangpui a ni thoa hriat a ni. Mizoram Liquor Prohibition and Control Bill 2014 chu July 10, 2014 (Thursday)-a Sorkarin a han pass lehah pawh khan Kohhran lam chuan thawm neiin an dodal nasa hle mai a, kawngpui dung leh khawpui chhung hmun hrang hrangahte pawh thuziak chi hrang hrang an tar a nih kha.

Nimahsela Kohhran hian heti takin Zu hi ngaina lo mahsela kan khawtlangah leh chhungkaw tin deuhthawhah hian Zu avanga harsatna hi a thleng awl chuang si loin Zu avanga buaipui ngai hi a awm reng tho si avang hian Zu hi kan duhloin haw hle mah ila kan do na tawk lo em ni ang a tih theih. Kan sorkar thar hi chuan ngaihdan ala siam lo nain Zu khap burna dan hi ennawn an tum ni awm takin thawm a awm a, Zu khap burna hi thlahdul deuh emaw hlih emaw pawh a ni mai thei e. 

Kohhran ngei pawh hian heti taka Zu kan duh lo nachungin a inte chunga hremna leh thununna lekkawh hi a awm pawh hriat a ni loin a ruite chungah chauh hremna kan thlen em ni tih tur hi a ni a, hei vang hian Zu in ringawt chu sualah kan ngai loin a ruih tak hi sual alo ni ber awm e. Social media lamah phei chuan Wine Shop awmlai ai khan a awm loh hnuah hian Zu zuar an tam zawk lawng maw? Tih thute an sawi rik avang hian kohhrante ngei pawh hi kan inngaihtuah nawn a ngai awm e. Heti taka Zu a zalena hmuntina in tur a awm reng a, Zu vanga kan khawtlanga harsatna a awm reng fo hi thlir liam mai mai loa a tihremna tur leh a bo theihna tura theihtawp chhuah tlan hi a hun viauin a hriat a ni. 

Nge ni chutiang niloin Zu in mite pawhin zalen taka an in theihna turin kan thlah zalen law law zawk ang a, Zu in dan thiam a, khawtlangah harsatna leh buaina a thlen lohna turin tihdan ṭha zawk kan kawhhmuhin zirtirna kan pe dawn ni ang? Ngawi renga thlir ringawt chu a hun tawh lo viauin a hriat a, heti taka hmun tin maia Zu a zalen leh ta viau mai hi Kohhran lamte pawh hian kan thlir liam mai chu a ṭha loin a hriat a. Kristianna nena inhne rem theiin kan hre lo a, sawi pawlh theia kan ngaih lohna avangin leh heti taka kan do chu a ni bawk si avang hian Pulpit tlang aṭang ringawt lo deuha ruahmanna dang deuh kan ngaihtuah chhuah chu a hun viau tawhin a lang a ni.