KEIMAH MI VANNEI

Mahmuaka Chhakchhuak

Nov. 30, 2024

Mizo Academy of Letters (MAL) chuan kum sawm ruk tlin lawmna hun atan Vanapa Hall hulhliapah Lehkhabu Pho Runpui a buatsaih a. Lekhabu Pho Runpui (LPR) buatsaih hi thil namai a ni loin a hautak em em a, midang tan erawh malsawmna nasa tak a ni ṭhin. Lehkhabu ṭha tak takte chu man tlawm zawk, a ṭhente phei chu a man zatve hialte pawha tihtlawm niin lei manhla tak a ni hlawm a, chu hun hlu tak chu tawng ngei turin Lunglei aṭangin Aizawl ka pan a.

Lehkha chhiar hi nuam ka ti a, hlawkthlak ka tiin thil inchhirawm loh tak a nihna hi ka pawh ve tawh laklawh avangin ka chhiar ve fo ṭhin. Lehkhabu chi hrang hrangte hian ngaihtuahna a tihzau ṭhin avangin leh hlawkna tam tak chhar chhuah tur a awm ṭhin avangin lehkhabu chhiar tur hi ka kawl khawm ṭhin a, sum lei paia ka lei tam tak a awmin midangin phal taka min pekte pawh a awm a. Chutiang bakah chuan mi duh loh hnu, an paih tawhte aṭanga ka chharte pawh hi eng emawzat a awm bawk. 

Nov. 25, 2024 (Thawhlehni) ah chuan Lunglei aṭangin Aizawl ka pan a, thlen tlai aṭangin Vanapa Hall hulhliap pan mai pawh ka duh viau nain Chhipphir lama kan kal kual tak avangin kan hman ta ngang lo a, tlai lam dar nga velah Aizawl kan lut ta chauh a. A tuk, Nilainiah chuan phur takin ka pan a, beisei ang ngeia tlawm tak taka lehkhabu lei tur alo awm avang chuan manhla ka ti kher mai.Lehkhabu phona dawhkan hrang hrangte chu hmanhmawh lo takin ka thlir kual a, ka duhzawng lehkhabu awm leh awm lohte thlir zelin man to deuh takte pawh a awm rualin a ṭhente phei chu tlawm uchuak tak takte pawh a awm.  

Ka duhzawng thlan chhuahte chu a man ka han pek chuan ka sum bawm chu a ruak ta hle mai. Sum leh pai hi ka nei lo hrim hrim ve bawk a. Kan ṭhenawm nuin duh hun huna thawmhnaw thar nei thei reng chunga ‘Ka rethei lutuk’ a tih ang loh deuh takin keini ang chuan kan nei lo tih chuan kan nei lo tak tak a nih avangin LPR huna lehkhabu leina man pek pawh hian sum neih zawng zawng zatve hawk a kiam a. Pawi ka ti lo, hetiang aia sum leh pai hman ṭangkaina tur thil dang awmin ka hre lo a, duh leh smart shoe chu nei lo rih mai mah ila pawi ka ti lutuk lem lo e. Ka lawm a, min hau tu tur ber – kan nu ngei pawhin hetiang taka lawmna ka chan hi min hriatthiampui ka ring ru deuh bawkin min hau lo mai thei bawkin ka ring deuh a. Ka lawm thuahhnihna em em awm bawk chu Pu Rawna, Gilzom neitupain Mizo Hla leh A phuahtute – B. Lalthangliana, phek 753 laia chhah chu a thlawnin min pe lehnghal a, vannei hi ka va inti tak em.

Dr. Laltluangliana Khiangte nena LPR neihna hmunah kan inhmuin zan lama inkawm kan sawi a, thil ṭul leh pawimawhte chhun lama ti zung zungin zan dar riat dawnah Pu Tluangtea te in hi ka thleng thei chauh a. Zirtirtu a ni bawka mi kawmhlim dan pawh a thiam viau mai a, midang bula ka sawi duh ngai lohte thlengin min sawi tir thei hial mai. Hlim takin kan inkawm a, a lehkhabu buatsaih pahnih min pe lehnghal a, ka lawm kher mai.

MAL Golden Jubilee lawmna hmun pui ber pawh Pi Zaii Hall, Synod Conference Center-ah hmang turin inpuahchahna a kal mup mup a. Hma taka thlen tumin ka thlenna hmun Mualpui a\ang chuan hma takah ka chho a. Dr. LN. Tluanga inah kal hmasain darkar khat vel inkawmna hun kan nei thei a, vannei ka intiin ka lawm hle mai. Pu Tluanga hi tunah kum 92 hmang mekin amah zawk hian min rawn be hmasa zawk lehnghal a, zahawm ka tiin a chanchin ka han hriatchian zel phei chuan mi chhuanawm tak a nihna ka hriatin a kianga darkar khat vel emaw lek hun ka hmang thei kha ka lawm hle.

Keimah ang bawka Dr. LN. Tluanga chanchin hi la hre lo in awm ka rin avangin tawitein a chanchin hi han sawi ila; Mizo zinga M.Sc (Maths) hmasa ber a ni a, Post-Graduate-a Mathematics Lecturer hmasa ber ni bawkin Mizo Subject College-a zirtirtu (Lecturer) hmasa ber a ni a. Mizorama Education Department Director (Mizo) hmasa ber ni bawkin kum 44 a nihin Edu. Director hi a ni a. Sorkar hna a\anga bangin Pathian rawngbawlna lamah a kal a, sorkar aṭang hian pension leh eng ilo engmah hmuh a nei lo nain kohhran lamah hian malsawmna tam tak a dawng thung. Interserve-a Mizo missionary hmasa ber a ni a, Overseas-a Mizo missionary hmasa ber ni bawkin a thiamna leh theihnate hi vawiin thlengin kohhran tan a hmang chawl lo. 

Dr. LN. Tluanga hian kum 2023 khan Mizo Literary Award dawngin chawimawina chi hrang hrang pawh eng emaw zat a dawng tawh bawk. Ph.D degree hi kum 1974 khan lo dawng tawh bawkin a thesis hi ‘Examination as a mode of Measurement tih a ni a, Education Department-a Joint Director a nih laiin a dawng nghe nghe. Hetiang taka mi thiam leh chhuanawm nena inkawmna hun kan nei thei kha lawmawm ka ti a, a lehkhabu ziah; Kawlkil Thleng pawhin, Hlimna Thuruk, Pelendo, Thuchah leh Thuziak tih leh ama chanchin ziahna Ar Khawthim Dai tihte chu min pe bawk a, lawmawm ka ti hle.  

Hetiang taka kei anga vannei hi mi an tam kher awm lo mange aw ka ti hial a. Duhsakna kan dawn leh hmangaih thilpek ka dawnte hi sum leh pai zawnga chhut chuan cheng sang tam man a ni a, ka tan chuan lawmna avanga nuih ver ver rengna tur a ni hial. MAL Golden Jubilee lawmna atana hun buatsaih pawh a nuam hle mai a, hun hman dan chi hrang hrangte pawh a khamawm loh hlawm hle. Tun hma deuha a thuziak ka chhiar nasat em em C. Lalhmingmawia (Mus-a) pawh a hmel ka hmuh vawikhatna niin thlalakpui ka tum viau nain a pilbo hman (?) a, pawi ka ti hle. Samson Thanruma erawh ka selfie-pui hman hlauh a. Ka pu em em, Pu B. Lalthangliana pawh tunhnaiah vawi hnih ngawt lo tlusual palhin a ban awrh chungin a rawn kal hrang hram hram a, lukhum khum a ngai ta tlat bawk nain a lukhum khum chu a inhmeh hle.  Ka ngaihsan leh zah em em Rev. Zaihmingthanga nen pawh chhun thingpui kan intlang thei bawk a, zaithiam pahnih Lalduhsaki leh Sangtei Khuptong-te pawh thla ka lakpui thei hlauh bawk a, Pu TC. Jonunsanga ai chuan ka chang sang hret e.