KUMTHARAH LEHKHABU

Mahmuaka Chhakchhuak

Dec. 27, 2024

Pathian zarah dam takin kumthar chu kan lo chuangkai leh ta. Mi tam tak tan chuan he kumthar hi thil danglam vak pawh a nih loh mai theih laiin ṭhenkhatte tan chuan he kumthar hi beiseina nena thlira hun lawmawm leh hriat reng tlak lo thlenna hun atana ruahmanna an neih hun a nih avangin a nghahhlelh-awm viau thei bawk.

Mi tupawh hian ropui lai leh lansarh lai hun hi kan nei vekin chumi hnuah chuan zawi muangin hnungtawlh lam kan pan zel a, kan lo awngrawp tial tialin a tam berte chuan bawisawm ngai takin an hun hnuhnung lam an lo hmang ṭhin. Chutiang chu nang leh kei ngei pawh hian kan hmabak a nih ve theih avangin kan vanglai hun, kan ṭhatlai hunah hian kum tam tak daih tur thu leh hla kan neih a ṭul a, a bik takin midangin min pawlhsawp theih miah loh keimahni mimal chanchin hi kan tu leh fate tan pawha ro hlu tak tur a nih avangin lehkhabu ngeia dah a ṭha hle.

Mizo zingah ngei pawh mi chhuanawm leh ngaihsanawm tam takin mual min lo liam san tawh. Politician an ni emaw Sakhaw rawngbawltu an ni emaw sumdawng hlawhtling leh ram leh hnam tana mi hlu tak takte pawh an ni ang. Chungte chu vawiinah chuan an chanchin kan hriat theihna ber chu an kutchhuak lehkhabute hi a ni a, an chanchin ziahna lehkhabu hmuh tur awm lote erawh kan hre tawi deuhin a ṭhente phei chu sawizui vak lem lohte pawh an awm. 

Kan mi hmasate zingah anmahni chanchin ziak engemawzat an awm a, chungte chu; Ka ram leh Kei – R. Vanlawma, Ka zin kawng – Ch. Saprawnga, Ka zirna ram – Revd Chuauṭhuama, Hringnun Sulhnu – KL. Chhuanvawra, I ni min pekte hi – Rev. Dr. Zairema, Lo neitu fapa – R. Vanhnuaithanga, Mizoram (The Land of Charm) – J. Lalsangzuala, Thamram lo mitthla – Jimmy L. Chhangte, Ka Rahbi – Chalngura Jahau, Zoram Politics Lumlet Dan – A. Thanglura, Ka damlai ni – Muma, Ka tawnhriat – Dr. Thangchungnunga, Ka khualzin kawng – Rev. HS. Luaia, adt hengte hi a ziaktu kan hnena awm tawh lo a, an mimal chanchin ziahna chhiar tur hnutchhiah tute an ni.

Heng bakah hian anmahni pawh kan hnena la awm a, an chanchin lehkhabu ngeia ziak tawh tute ṭhenkhatte chu; Ka zir kawng bumboh – Rozama Chawngthu, Nghet taka Ding zelin – M. Lalmanzuala, Theihtawp chhuahin – Prof. JV. Hluna, Arkhawthim dai – Dr. LN. Tluanga, Ramhnuai mi – Col. Lalrawnliana, Khuarei Sulhnu – Bualhranga, Vanglai – J. Malsawma, Ka hmaah dawhkan i buatsaih ṭhin a – Rev. Vanlalbela, Ka dai ve chin – PC. Lawmkunga, adt. Hengte pawh hi a hlu hle mai a, anmahni awm tawh loh hnuah phei chuan a hlu zual deuh deuh ngei bawk ang.  

Hetianga an sulhnu chhui theih tura lehkhabu ziak tute hi an fakawm a, an lehkhabute hi an tu leh fa, rawn la awm zel turte tan phei chuan a hlu telh telh dawn bawk a ni. Chutih laiin mi ṭhenkhatte chuan anmahni chanchin hi ziah an tum lem lo a, an tum loh avanga dem ngawt tur erawh a ni chuang lo ang. Amaherawhchu khawvel pian tirh ata vawi khat chauh kan lo piangin kan awm loh hnuah phei chuan kan chanchin hi a reh vang vang dawn tihna a ni a, chutianga kan chanchin reh hlen vang vang lo tura mahni chanchin ziak ngeia hnutchhiahtute chu kum sang tam liam hnuah pawh hriatreng an ni ṭhin. 

Kan chanchin hi a ngaihnawm vek kher lo ang a, midang tana bengvarthlak leh hlu tak pawh a ni kher lo mai thei e. Nimahsela chhungkaw tan erawh a hlu emaw hlu vak lo pawh nisela kan chanchin hi dahṭhata a awm hi a ṭul hrim hrim a, chanchin ngaihnawm lo lai deuh emaw ngaihnawm lai deuhte pawh chu a zavaiin tu leh fate a hlu vek mai. Ram hruaitute politician, a bik takin term khat emaw a aia tam MLA lo ni tawhte tan phei chuan mahni chanchin ziaka dah hi tih ngei ngei turah ngai ila, sorkar lam chuan document pawimawh tak tak kawl ṭha bawk mahsela a kim tak tak theih loh avangin leh kum a lo rei chuan hriatna dik tawh lo te pawh alo awm theih dawn avangin ziak ngeia dah chin hi a ṭha hle. Politician ni lem lo, Sumdawng mi leh sorkar hna thawkte tan ngei pawh mahni chanchin ziaka dah hi ngaih aiin a hlu.

Dr. JV. Hluna hi ka ngaihnat leh zah em em chhan pakhat chu ‘Theihtawp Chhuahin’ tih lehkhabu a ziak vang a ni. He lehkhabuah hian a chanchin tam tak a ziak a, a naupan lai leh an chhungkaw retheih lai zawng zawng a ziakin term khat chiah MLA ni mahsela ram tana a thawh dante a ziakah hian vawiin thlengin amah min ngainat tir phah. Nangni pawh inni ve tho ang. An chanchin hriat chian loh chu inngai vak kher bik lo ang a, an chanchin in hriatte chu inngaina zawk ngei ang. Tun hnai lawkah Pu Lalfak Zuala chuan ama mimal chanchin ziahna lehkhabu a buatsaih a, Pu Faka chu a chanchin kan hriatchian belh leh sauh mai bakah amah kan ngainat phah zual sauh a nih hi. 

Mahni chanchin emaw lehkhabu hrim hrim buatsaih hi mi tam takte chuan kan huphurh viau mai. Thil huphurhawm tak a nihna tam tak a awm rualin tunlaiah chuan engkim hi a awlsam dan a awm zel tawh a, ziak mi ni lem lo tan pawh ziakmi tam tak rawih tur an awm a, a hmanrua ber, Laptop (Computer) lah ken mai theih a nih bawk avangin hmanraw dang mamawh a awm vak lo bawk a, a awlsam ang reng viau. Ṭhangthar ziakmi tam tak zingah hian midang chanchin ziah sak hi an awm thluah tawh a, anmahni chu biak mai tur a ni. Anni chuan khawla chhut dan tur leh thil dangte pawh an buaipui chhunzawm vek nghal thei bawk ang.  

Mi ropui leh langsar tak i ni kher lo mai thei a, khawtlanga hriat lar tak pawh i ni lem lo mai thei e, nimahsela i chanchin chu in chhungkaw tan, i tu leh fa, rawn la awm zel turte tana hnutchhiah chu i tih tur pawimawh tak a ni si a ni. 

Kum thar chu helam hi han ngaihtuah ve teh le.