Rev. HARRY SCISM KAN CHÃN TA

Mahmuaka Chhakchhuak

Feb. 15, 2025

India rama Pentecost kohhran phuntu Rev. EL. Scism te chhungkaw rawngbawlna hi a ropuiin chhinchhiah tlak tak tak pawh a tam hle. Rev. EL. Scism fapa Harry Scism pawh chuan a pa rawngbawlna chhunzawm zelin India hmarchhaka Pentecost kohhrana hruaitu hmasa ber niin ‘Superintendent’ chanvo chelh hmasa ber a ni a, sulhnu tam tak a nei bawk.  

Rev. EL. Scism hi John Scism leh Grace Eleanor Webb te inkarah kum 1909 khan, Portland, Oregon State, US-ah a lo piang a, Scottish hnam peng khat ‘Chrisholms’ thlah Scism hnam a ni. Kum 15 a nihin baptisma a chang a, Pathian thlarau thianghlim pawh chang zui nghal maiin kum naupang tak a nih lai aṭangin Pathian rawngbawlna nei tura inpek duhna thinlung nei a ni a. Hetianga Pathian thlarauin a nuna thuneihna a neih takah chuan ram hla tak, India rama rawngbawl tura kohna pawh dawngin a inhria a, nimahsela chuti maiin kal dan tur a hre bawk si lo. Kum 1932-ah Marjorie Jean Moyer nen inneiin kum 1934 March 9-ah fapa, Harry Scism neiin fanu Fern Scism an nei leh bawk a, fa hi pahnih chauh an nei a ni.

EL. Scism chuan Pentecostal Ministerial Alliance kohhran-ah rawngbawlna neiin an nupa hian ordained an ni nghe nghe a. Ordained an nih hnu lawkah hian Pastor atana lak a niin EL. Scism chuan Clarkston, Washington State-ah rawngbawlna a nei a, hemi hnuah hian hmun hrang hrangah rawngbawlna a nei ṭhin bawk. Rawngbawlna zau zawk neih a duh avangin leh thurin lama danglamna a awm hran lutuk loh avangin Pentecostal Church Incorporated-ah a rawngbawlna nen lutin reiloteah Western District Superintendent ah thlan a ni a. Kum 1945 September 25-a United Pentecostal Church a lo pian khan kohhran inpumkhatna atana mi ṭangkai ber zingah ṭangin a awmnaah chuan District Superintendent a nih chhunzawm leh bawk.

A tleirawl laia Pathian kohna a dawn chu a theihnghilh thei ngai lo a, a thinlungah riak rengin a reh mai thei hauh lo mai a. Local Pastor leh District Superintendent te nia kohhran tana ṭangkai taka hun a hman reng lai pawh chuan a thinlunga Pathian kohna chu chhang lo a intiin ram hla tak, India rama kal tur chuan a inbuatsaih ru reng tho a. Tichuan, Pathianin remchang a siamsak takin Jan. 30, 1949-ah chuan Portland, Oregon chhuahsanin an chhungkuain an thawmhnaw neih ang angte nen chuan India ram lam pan tur chuan an chhuak ta ngawt mai a ni.

Jan. 31, 1949-ah Portland lawngchawl hmun aṭangin MV. China Mail lawnglian chuan India ram lam an rawn pan a, ni 55 chhung lai tuipui chunga an thang hnuin March 26, 1949-ah Madras lawngchawlh hmun chu dam takin an rawn thleng a. India an rawn thlen hian tumah hmuaktu pawh an nei loin hmelhriat pawh an nei chuang lo a, anmahni chhungkua chuan an rawn thleng ve hlawl a, Adur, Quilon District, Kerala-ah awmhmun bengbel turin bu an khuar a. In luahin anmahni chuan engkim bul an ṭan a, Pathian chauh lo chu ṭanpuitu an nei lo a ni.

Kerala aṭang chuan Pathian rawngbawlna an nei ṭanin zawi zawiin Pathianin rawngbawlpui tur a pe a, Adur-ah chuan Bible School din bawkin India hmarchhak aṭang pawha kal an awm a, kum nga chhung rawngbawlna an neih meuh chuan member 5000 lai an nei hman a ni. Kum riat rawngbawlna an neihah phei chuan member 10,045 lai an nei hman a, Pathianin an rawngbawlna mal a sawm ṭhin hle. Tichuan, EL. Scism chuan India ramah kum 16 chhung rawngbawlna a neiin India rama kohhran memberte ngei pawh an lo ṭhahnem deuh tawh bawkin leh an mizia a in anloh avangte pawh a ni ang India Unit tih leh North East India Unit tia ṭhenin hmun hnihah an lo awm ta a.     

Rev. EL. Scism chuan a fapa Harry Scism chu a hnung zui tura a chher hriam hnuah chuan kum 1969-a India Unit leh NE Unit in\henah chuan Harry Scism chu NE Unit lam hruaitu atan hmang chhunzawmin amah, EL. Scism chu a hriselna a lo ṭhat tawk tawh loh bawk avangin kum 1966-ah America lamah a hawng a, kum 1994 khan a boral a ni. 

Rev. Harry Scism chuan apa rawngbawlna chhunzawmin India hmarchhaka Pentecost kohhrante tan a theihna zawng zawng hmangin rawngbawlna a nei a, sawi hmaih loh tur chu Harry Scism hian kum 1955-ah nupui neiin a nupui hi Gladys Audrene Hruzo  a ni a, Bible School-a a kalpui a ni nghe nghe. An nupa hian fa pahnih: Stanley Scism leh Loretta Jane Scism te an nei a, Stanley Scism hian a pa rawngbawlna chhunzawmin rawngbawlna a nei ve leh a, Loretta Scism erawh Doctor niin America-ah a awm.

Rev. Harry Scism rawngbawlna hi apa rawngbawlna ang bawkin Pathianin mal a sawm a, kum 1969 aṭanga India hmarchhak kohhran pa a nih angin kum 1973-ah Asia Regional Supervisor ni lehin NEI Superintendent nen hian a kawp a, a ṭul ṭhin hle. Chumi hnuah chuan General Director, Foreign Mission ni lehin khawvel pumah rawngbawlna pawimawh tak a chelh leh a, India ramah pawh awm a remchan tak loh avangin kum 1979-ah India hmarchhaka a rawngbawlna (Superintendent) chu Rev. K. Satinvela hnenah a hlan a ni.

India rama a awmchhungin Bhopal, Mussoorie leh Shillongah Bible School a din hman a, Shillong hmuna Bible School hi Calvary Bible Institute (CBI) tih a niin India hmarchhaka rawngbawltu chherchhuahna hmun pawimawh tak a niin kum 1998 – 2000 chhung khan keimah ngei pawh Pathianthu ka zuk zir ve nghe nghe. Harry Scism hi mi inngaitlawm leh a kianga awm nuam tak a ni a, India rama hmun hrang hrangah rawngbawlna neiin Pathianin a rawngbawlna mal a sawm ṭhin hle. Kum 1976 – 2001 thleng khan, kum 25 chhung General Director, Foreign Missions Division, UPCI niin khawvel ram hrang hrang zahnih chuangah rawngbawltu pawimawh tak a ni a, kohhran din tharna lamah malsawmna a dawng ṭhin hle.

Rev. Harry Scism hian rawngbawlna aṭanga a pension hnuin Columbus, Ohio US ah an chhungkuain an cheng a, hlim taka an awm laiin Jan. 21, 2025 khan vur nalah tluin a thluakah thi a tlingin Mt. Carmel East Hospital ICU-ah enkawl a ni a. Kohhrante pawhin nasa taka ṭawngṭaipui a niin a dam leh thuai pawh beisei a ni nain Feb. 7 zing lam khan chatuan ram min lo pan san ta a, Feb. 13, 2025 (Ningani) ah khan vuina hun hman a niin hetih rual hian NEI Hqtr, Aizawlah leh District Office hrang hrang bakah CBC ah te Rev. Harry Scism vuina hun hi hman a ni bawk.