KOHHRAN HRUAITUTE RAM VEINA

Mahmuaka Chhakchhuak

Jan. 16, 2025

Kum tam tak liam tawh aṭang khan sakhaw rawngbawltute hian ram rawngbawlna hi an lo vei tawhin an theihtawpa lo auchhuakte pawh an lo awm tawh bawk ṭhin a. Martin Luther King Jr, Baptist kohhrana rawngbawltu langsar takte, Jesse Jackson, Baptist kohhrana rawngbawltu chhuanawm takte, Pat Robertson, Christian Broadcasting Network dintute leh Al Sharpton, Pentecost kohhrana rawngbawltu chhuanawm takte leh midang dangte chu America rama langsar taka ram veina lam thu tlangaupuitute an ni. Anni bakah hian Nobel Peace Prize pawh lo dawng hial tawh Desmond Tutu, Anglican Bishop-te, Daniel Ortega, Catholic Puithiamte leh midangte pawh sawi tur an la awm bawk a. 

Anni ang hian kan ramah ngei pawh kohhran huang aṭanga ram veina lama thu leh hla nei sakhaw puithiam chhuanawm tak tak an awm bawk a. Kohhran huangchhung chauh niloa khawtlang leh ram veina avanga pawl anga din; MKHC, MPF leh Synod Social Front kan tihte ngei pawh hi kan ṭhatpui viau ṭhin bawk. Chutianga kan ramin hma alo sawn a, a lo ṭhat phah theihna tura hmalakna an neih avang chuan Politics lam thlirna aṭang ngei pawhin namnul ngawt a theih loh zia leh mipuite ngei pawhin kan ṭangkaipui zia chu hai rual a awm lo a. A bik takin Political Party inepna hmunahte ban phar a ṭul changin ban an phar a, thu leh hla neih a ṭul changin an kuangkuah mai ngai chuang hek lo.

Tu kan sawi bik tihna pawh ni chuang loin kan sakhaw puithiam zingah ram leh hnam alo ṭhat zawkna tura au ring tak takte an lo awm tawh ṭhin a, chung an authawm pawh chuan awmzia a nei em ni tih tur a ni hlawm bawk a. Chung kan sakhaw rawngbawltute zingah chuan mi pathum lek thusawi tawi tetein hetiang hian han tarlang ila;

Revd Chuauṭhuama; A ni khan May 5 – 8, 2022 chhunga Kolasib khawpuia KṬP Khawmpui lianah speaker niin ram veina lam hawi a sawi ring hle. Tunlai Thil awmzia tih thupui hmanga a thusawinaah chuan kan rama hri vei lian tak tak pali – Chiahpuam, khehpuam, leipuam leh kuhva phurhpuam te chuan min eichhe mek a. Tangka sum ngainatnain min eichhe mek bawkin hengah hian kan inthiar fihlim a ngai a ni tiin a sawi a. Heng baka a sawi langsar tak pakhat leh chu – Titia distinction, hna thawha third class. A tak hmuh tur awm si lo ram hruaitu hi thlak a hun tawh a, hna thawk thei mi dik, ram roreltu kan mamawh a ni tih thu a sawite chu a ring ṭha hle.   

Rev. MS. Dawngliana; A ni pawh hian Nov. 22, 2022-ah Vanapa Hall-a MPF Annual General Meeting vawi 15-na neihna hmuna a thusawi chu a ring \ha hle mai. Party ruihchilhnain ram leh mipui a nghawng dan tih chu thupui atan a hmang a. Sam. 22;28 thu ‘Ram chu Lalpa ta a ni a, hnamtin chunga roreltu a ni si a’ tih chu chhiarin thusawina a nei a. Political Party chu ram siamṭhatna turin a ṭul a, kan ramah ngei pawh kum 1972-a UT kan nih aṭangin mahnia rorelna kan neiin MLA term sawm kan lo paltlang tawh a, chung MAL atan chuan mi ṭha leh fel tak tak kan lo thlang chhuak tawh ṭhin a. Mi fel leh ṭha tak tak mah nisela kan duh leh beisei angin ram rorelna an nei ngai chuang lo. 

Party ruih chilhna hian kan ram a eichhia a, hman aṭanga tun thleng hian min la eichhetu ber pakhat pawh a ni. Party ruih chilhna chuan Politician-te rilru tipiangsualin mipui tam takte at min so tir bawk avangin ram ṭhan a ti ṭhu ṭhin. Politics hrim hrim chu ram tana thil ṭha leh ṭangkai tak pawh a ni a, nimahsela party bil ruih chilha hleih nei taka rorelna hi Pathian pawi sawina a nih thu sawiin Kristian ramah hian Bible pela ram rorelna kalpui a nih chuan Pathian malsawmna kan dawng lo ang tiin thu ṭha tak a sawi a.    

Rev. R. Lalbiakliana; Ani pawh hian Feb. 12, 2023 niin Mizoram Baptist Mipa Pawl (MBMP) khawmpui lian, Hnathial hmuna neihah chuan ‘Ram leh hnam tan min tiharh leh rawh’ tih thupui hmangin thu ṭha tak a sawi a. Kan ram siamṭha tur hian Nehemia anga mi rinawm leh eirukna laka fihlim kan mamawh a ni tiin a sawi a. Chu mai bakah chuan kan ramah hian ram hmasawnna tur sum leh paite hi ṭhahnemtham tak a nih laiin a hmanna tura hman a nih loh avangin kan ram hian a nih tur ang a ni phak lo ṭhin a ni tia sawiin kohhrana a nihna tur taka sum leh pai kan hman ṭhin angin hman ni sela chuan kum khat chhung lek pawhin Mizoram hi dinhmun sang taka an din theih ngei tur thu a sawi a. 

Kohhran chuan thawktute hlawh a hun takah kan pe ṭhin a, kan sorkar hian ram enkawl a thiam lo a nih chuan Baptist Church of Mizoram hi term khat min enkawl tir rawh u tia sawiin kan rama roeltute leh sorkar miliante vang hian kan ram hi tihchhiata a awm laiin Juda ho zinga kum 12 zet roreltu Nehemia chuan ram a siamṭhain mipuite tan Pathian ṭihna avangin rorelna ṭha tak a kalpui thei a ni. Chutianga Pathian ṭihmi roreltu chu kan ram hian a mamawh a, Pathian ṭihna avanga sual kalsan ngam a, rinawm taka nung ngamtute hi kan ram hian a mamawh a ni tiin ṭhahnemngai takin a sawi a.   

Vawiinah ngei pawh hian kan sakhaw rawngbawltute ram veina hi la chawl mai lo sela a duhawm hle mai. Bible rama zawlnei leh sakhaw puithiamte au ang khan keini zingah ngei pawh hian ram veina thu sawi a, la au reng tur hian kan rawngbawltute hi ngawi reng lo sela a duhawm a, kan la mamawh reng a ni tih hi hre reng ila a ṭha ang. Politics leh kohhran hi kal hrang tak tak thei lo leh kal kawp rem lohna chin awm bawk a nih vang hian a bik takin kristian ramah hi chuan indo thei miah lo a niin a tam thei ang bera kal kawp tur a ni tiin sawi ila a dik mai awm e.  

Engkim, khawvel thil zawng zawng pawh hi Pathian thua awm a niin kan nunna thleng hian a kuta awm a ni a, ram rawngbawlna ngei pawh Pathian remruatna a tel loh chuan a tluang thei ngai hek lo. Chuvangin ram rawngbawltute ngei pawhin Pathianthu hi an ngai pawimawh tur a nih angin Pathian rawngbawltute thu leh hla an ngaithla fo ṭhin tur a ni a, chumiah chuan malsawmna pawh a awm bawk a ni.  

Kohhran hruaitute u, au zel ula, ram leh hnam tana in authawm hi reh suh se.