CHANGKANNA

Mahmuaka Chhakchhuak

June 25, 2025

Changkang kan tih hi a inang lo ang a, changkang kan tehna hmanrua pawh a inang hauh lo mai thei e. Nimahsela changkanna tura kan ngaihdan leh pawm dan erawh chu a danglam tam chuangin ka ring lem lo.

Changkang tih chu kawng hrang hrangin a sawi theih ang a, hetiang hian tawi tetein han sawi ila;

Hun vawng dikte hi mi changkang an ni: Kan pastor pakhat chuan khawmpui nikhuaa langsar taka tlai deuh hleka kal hi changkang deuh riauin a hria a ni awm a, nimahsela chu ngaihdan chu mi tam takin kan tawmpui kher awm lo e. Pu Lalduhoma, kan Chief Minister hi hun vawn dik lamah chuan a hming lam rik fo a ni a, huntiam neihna hmunah chuan a tlai khat viau an ti. Hmanni lawkah khan nilengin hun kan hmang a, zinglam dar 11;30 ah ṭan tur tih chu ṭan hma minute ngaah a rawn thleng a, nghah ngai loa CM a awm kha changkang ka ti hle. 

Ṭumkhat chu Brig. T. Sailo pawh CM a nih laiin Prime Minister hmuh tumin appointment a la fel vek tawh a, min lo nghak lawk rawh se a ti a ni awm a, a ni amah hmuh tumin ni thum hun ka hmang tawh a, tuna a hmuh theih loh chuan ka let mai ang e, tiin kal mai a tum a, chutah zet chuan rang takin an luh tir an ti a. Hotu zawk mah nisela nghah ngaia a awm chu a dik tlat lo a, harsatna a nei a nih chuan a hrilh mai tur zawk a ni. 

Nihna sang leh zahawm tak pawh hi hun an hman dik loh avangin emaw hun bi reng reng nei hleithei loa an awm fo chuan an nihna sang leh ropui tak pawh chu an mualpho phah zawk fo thei thin. Pawl hruaitu kan ni emaw ni lo emaw mahni mimal pawhin hun vawn dik tum hram hram mite hi an zahawmin hun hi an hmang thiam bawk thin.

Dik lohna sawi hreh loh hi mi changkangte tih ngei ngei tur a ni: Lal Isua chauh lo chu mi famkim kan awm loh avangin tihsual palh nei thei vek kan ni a, kan tihsualah pawh insawi fihlim tum zel mi kan nih chuan mi changkang lo zira chhiar tel tur kan ni tihna a ni ang. Thiam lohna leh tihsual palh sawi hi mahni dinhmun tihhniamna tur emaw ti hi mi tam tak an awm a, a ni hauh si lo. 

Thu sawi mi emaw, thu ziak mi emaw Politician tan ngei pawh tihsual palh nei thei vek kan nih avangin kan tihsualte chu miin min hrilh a nih chuan lawm taka pawm thin tur a niin, kan tihsualah chuan kan inzir bawk tur a ni. Sawiselna ngai thei miah lo, sawisel haw tak hi an awm thin a, chutiang mite chuan an tisual nawn fo thin bawk. Politician-te hian a bik takin insawifiahna hi an nei duh bik emaw tih tur a niin sawiselna hi an pawmdam mai thei thin loh avangin reiloteah an insawifiahna thu hi hriat tur a awm lehnghal mai thin a, hetiang hi chin fo loh atan a tha. Politician-te tan chuan sawiselna hi thil awm ngei ngei tura ngaih hi a tha a, mahni nihna bak baka lan tum kher pawh a tha lo. Dik taka nun tum ila, huaisen takin kal ila, nghet taka din tum tlat hi thil tul ve tak bawk a ni. 

Changkanna kawng khat chu ṭawngkam hman danah hian a ni: Mi zahawm tak kianga awma kan tawngkam hman dante, keini aia hnuaihnung zawka ngaihte kianga kan tawngkam hman duh dante hian kan changkan leh changkan loh hi a tarlang fo thin. Hnam dang zingah chuan chi inthliarna alo awm a nih pawhin keini, Mizo zingah chuan chi inthliarna hi a awm lo a, lo awm deuhin hre mah ila a awm tak tak thei chuang lo ang. A chhan pakhat chu mipui huap pawl neuh neuh kan neih thinte, a bik takin kohhran vang ngei pawh hian inthliar chu a har viauin a rinawm. Chutiangah chuan kan tawngkam hman danah hian miin min lo chikin min lo hre reng duh thin a, tawngkam hman fimkhur a ṭha viau. 

Hnam ropui zawkte hi chuan ṭawngkam chhia kan tih, ṭawngkam mawi lo lam hi an hmang hreh hle thinin a hriat a, keini erawh chuan inchhung khurah a ni emaw punkhawmna hmunah emaw pawh hian tawngkam chhe tak tak hi kan hmang fo thin a, chu chu kan changkan lohna pakhat a ni. Mi kan fak a, kan chawimawi thei lo a nih pawhin an chhiatna lai sawi kher hi mi thinlung tihnatna mai mai a niin thil tha aiin thil tha lo a thlen zawk thin. Mizote anga politics platform-a mimal chanchin sawi vak vak ching hi hnam dang an awm ve ka ring lo a, keini chuan kum tam tak liam tawh atanga vawiin thlengin kan la ching fo a, a zia lo thin ngawt mai.

Politics thil pawh nisela mimal chanchin tha lo lai sawi vak vak hian mi a hneh tak tak kher chuang lo a, tihsual palh nei thei vek kan ni tih hi pawm mai a tha. Chutianga kan sawi vak vak chuan hmelma kan insiam mai mai zawk a, Mizo society tha leh nuam taka ngaina lotu kan insiam belh mai mai zawk thin. Changkanna lam kawng kan zawh a hun tawh a, hnam naupang zia anga hun hman reng pawh hi kan kalpelh a hun tawh.