PATHIAN HMANGAIHNA ROPUIZIA

Mahmuaka Chhakchhuak

Aug. 10, 2025

ZMC Cabin No-405-a ka pa damlohna avanga zan hnih kan riah hnuah chuan Pathiannia rawn thleng a. Nurse fel tak hian kawngkaa rawn dakin ‘Vawiin chhun dar khatah inkhawm thei in awm chuan X-ray tihna bulah Chapel a awm a, inkhawm hram nise’ a rawn ti a. Kei chuan inchei a ngai em ka ti zui nghal a, a ni chuan ngai lo, tikhan kal tawp rawh, a pawi lo a tih takah chuan tukṭhuan eikham aṭang chuan inkhawm tumin ka inbuatsaih a.

Minute ngaa dar khat ala ri lo tihah chuan hmanhmawh deuh takin Chapel lam chu ka pan a, thleng hmasa pawlah ṭangin mi panga vel hian min lo thlen khalh a, tlar hmasa ber pahnihna ah chuan ṭhuin hmelhriat loh vek an nih avang chuan ka inthlahrung duh lem lo a, hla bu chu keuin thiam lem tak lo chuan ka zai ve bawng bawng a. (Ka zai thiam loh zia hretu awm sela chuan min nuih tet tet mai thei e). 

Ṭanna hla atan Kristian Hla bu no 43-na chu khuangpu chuan rawn sawiin a la nghal deuh mai bawk a, kei pawh chuan keu nghalin khawilai hmun emawa Lalduhsaki lo sak hi ka hriat tawh avangin tlem tlem chuan ka lo hre ve a, rual pawl lem lo takin ka zai ve thei mai a. He hla hi Upa Dr. LN. Tluanga lehlin niin hla ropui tak a ni a, amah Dr. LN. Tluanga ngeiin he hla hi Sap tawng chuan The Love of God tih a ni a; BGEA (Billy Graham Evangelistic Association) Hla Bu, Calcutta/ Kolkata-a B. Sc ka zir lai, kum 1954-a ka lei aṭanga ka lo hriat ve a ni a, he hla bu hi staff notation vek a ni. Zaipawlin an sak te kan ngaithla ṭhin a; keimahni zirlaite pawhin kan tuipuiin Sap ṭawngin kan sa reng reng ṭhin tiin a sawi.  

He hla hi hla ropui tak niin a thute hi a ropuiin sak pawh a nuam em em a, Mizo tawnga letlingtu hian a thiam bawk a, Pathian thlarau hriak thihna hnuaiah ngei a letling tih hai rual lohin a hla thu tin hi Pathianin mal a sawm a, thinlung a khawih em em vek mai. 

He hla hi a bul takah chuan kum zabi sawm pakhatna vela Germany rama an phuah, Juda hla niin an sawi a, chu chu Frederick M. Lehman (1868-1953) hian kum 1948 khan rawn pho lang ṭanin khawvel hriat a rawn ni ta a. He hla innghahna Pathianthu chu ‘Hmangaih tawp loin ka hmangaih chia; chuvangin, lainatnain ka hruai haw che’ (Jer. 31;3) hi a ni nghe nghe. Pu Tluanga hian July 1961-ah Govt. Multi-Purpose Higher Secondary School, Aizawl chhuahsanin Union Christian College, Barapani-a Lecturer in Mathematics & Lushai/ Mizo a zawm a; September thlaah Staff Quarters tharah a nu (tar tawh tak), a nupui Biaki leh a fanu Zawmliani nen an lut a. Kum thar 1962 February thlaah hla pahnih Chhandamna mak tih leh Khawngaihna thuk tih hlate chu a letling a. “The Love of God chu March 10, 1962, a fanu Zawmliani piancham hmasa ber niin lehlin a tum a, harsa a tiin a zo mai thei lo a.  Pathianni March 25, 1962 zânah a chhunzawm leh a; dar 11 pm thleng pawhin a la zo thei chuang lo a, Thawhlehni March 27, 1962-ah chuan châng 3-na ennawnin a let chhuak thei ta a ni.  Pathian Thlarau finchhuahna leh ṭanpuina pawh dawngin a inhria a, a thunawn tlar khatna hi a harsa lai deuh ber a ni a; Sap tawnga ‘how rich and pure, how measureless and strong’ tih hi ‘A va thûk êm! A va na êm!’ tia a han let chhuak hi zawhna a dawn tam berna a ni nghe nghe a, ṭhenkhatte phei chuan a hriat lohvin, ‘A va thûk êm! A va sâng êm!’ tiin an lo thlâk nual nghe nghe.

ZMC Chapel-a kan inkhawm hi sharing hun a ni nghe nghe a, pa pakhat hian minute nga vel thu a han sawi a, stage aṭanga a chhuk hnuah chuan rang taka ding vatin stage lam chu ka pan nghal a. Lectern bul aṭang chuan “He damdawiina min hruaitu hi Pathian a ni. Natna leh thihna te hi midang chunga thleng tura kan ngaih ṭhin kha kan chungah a rawn thleng ve ta a, vui tur kan ni lo a, engkim hi kan tawk thei a ni tih hi kan pawm theih ngeina turin Pathianin kan chungah ro a rel a ni a. Khawzawl aṭanga ka pa dam loh thu ka hriat tirhah khan hmanhmawh taka Aizawl lam panpui a ngaih thu min hrilh nghal bawk avangin min ṭhawng hle mai a, chumi zanah chuan mitthi ka la hmu zui bawk nen. Ka pa dam lo hi a hun tawpna tur a ni mai dawn em ni tiin Pathian hnenah ka ṭawngṭai a. Engkim tawk thei turin thinlung ka inbuatsaih a” tiin thu tlem ka sawi a.

Zing lam dar sarih velah Lunglei chhuahsanin tluang takin kan tlan a, ZMC&H chu minute nga velin ka thlen khalh a, Casualty-ah ka lo nghakin motor aṭanga ka pa an rawn hlan thlak chuan a hmel hmuh a nuam hlein ka hria a, darkar nga chhung vel chuan test chi hrang hrang an test a, ECG kan ti a, X-ray kan ti bawkin doctor leh nurse te chuan uluk takin an han buaipui nghal zung zung a. A mah ber chu a kal \hat hleihtheih loh avangin buaipui a ngai ve deuh a, a Tai (Pile) harsatna avang erawh chuan inthiar a harsat hle thung a, chu ber chu kan buaipui hmasak ngai tur nia hriat a ni. C.T. Scan leh ECG result te chu hriat vat a chakawm nain hriat a huphurhawm hle thung mai.

A hnu ni nga velah chuan C.T. Scan result chu a lam theih e an tih chuan rang takin kan va kal vat a, duty hnenah kan han entir chuan harsatna lutuk awm loin a Kal lehlam zawk hi a lo sawng te deuh a, a lungah bawk tereuhte a awmin a zun kawngah hnai tlem alo awm bawk a. Chubakah chuan ruh chak tawh lo deuh tih leh kum upat tawh vanga neuh neuh awmte chu kan hriat chhun a ni a, chungte pawh chu thil danglam vak ni loin ngaih pawimawh tham a ni lem lo niin min hrilh bawk a. Kan buaina ber zawk chu kum tam tak kal tawh aṭanga Tai lama harsatna (Pile problem) a neih chu a niin chu pawh chu doctor-te chuan Stapler (Haemorrhoidal Stapler) hmanga an chilh bakah tlem an hlep thla bawk a.   

Pile zai hi mi tam takte chuan na an tih avangin ka pa ngei pawh chuan na a tih ngei ka han ring deuh ngawt nain an zai zanah chuan na a ti miah lo a, a tuka a inthiar erawh chuan thi tlem a rawn chhuah avangin a ngaih a ṭha chiah lo a, doctor rawn kal hunah chuan kan lo sawiin doctor chuan tlem kan zai avangin chuti mai a dam thut chi a nih loh dante a han sawi chuan rilru dam takin kan awm thei ta a. Tuilum ṭhut ṭhat a ngaih thu leh damdawi ei ṭhat a ngaih thute chu min chah ber a ni. 

Pathian hmangaihna ropui zia kan hmu a, thihna hlim kawrruama dinga kan inngaih tawh hnuin ni sawm leh panga hnua dam takin Khawzawl lama kan haw chho leh ta hi mihring theihna piah lamah Pathian a che a ni tih kan hriatin lawmna avangin biangah mittui a luang zawk a.