PATHIANNI-A TUI SEM TAWH LOH

Mahmuaka Chhakchhuak

Sept. 26, 2025

Tukin RALVENGTU News paper phek hma kil vei lama nimin lama Er. V. Laldanmawia, EE, PHE Lunglei Water Supply Maintenance Division chuan a office chamber-ah MJA member ṭhenkhatte leh Lunglei District Consumer Association hruaitute kawmin Pathianni-a tu sem an tum tawh loh thu a sawi tih a rawn tarlang hi a lawmawm hle mai. 

PHE Department-in mipui tana tui in tur an sem hi khawpuia awm tan chuan a hlu em em a, tui in tur a awm loh chuan kan buai nghal mai ṭhin. Chutih rual chuan Lunglei khawpuia chengte hian tui khawlna ṭha kan nei lo hle mai a, chhungkaw tinte ngei pawh hian tui khawlna kan nei ṭha lo hlawm hle. Hun kal tawhah ti harsat deuh ṭum hnih (ka hre sual lo ang chu maw?) kan tawng tawh a, chuti chung chuan ruahtui khawlna lama ṭan lak tum kan awm pawh ka hre chuang lo a, sintex (leh a dangte) dah thar hmuh tur pawh a tam lo hle. Hei vang hian PHE tui sem hi kan innghahna ber a ni lo thei lo a, a hlu viau a ni.

Pathianni-a tui sem hi khawpui dangah an tih dan a ni ve em tih chiang takin ka sawi ngam chiah lo nain kei erawh chuan an awm lo niin ka hria a. Eng tik aṭanga Lungleiah hian Pathianni a tui sem hi ruahman ṭan nge a ni tih pawh hi sawi mai a harin a rei tawh viau a ni awm e. Ka hriat tirhah chuan Lunglei khawpui chu kan dan a dang bik a nih dawn hi ka ti hman a, hun a hank al deuh takah chuan ngaiah kan nei ve mai bawk a.

Tun Pathianni (Sept. 21) khan tukṭhuan kan ei dawna ka ṭawngṭainaah ‘Aw Lalpa, vawiinah inkhawm turin ka inbuatsaih a, rem i tih chuan harsatna awm loa tluang taka ka inkhawm theihnan min hruai ang che’ tiin ka ṭawngṭai a. Kei hi zan lam inkhawm lem lo a, chhun lamah inkhawm ṭhulh hreh tak ka nih thung avangin Pathianni hi chu inkhawm hram ka tum ṭhin a. Hemi niah ngei pawh hian ka ṭawngṭai aṭanga minute nga emaw lekah kan area-a tuisemtu hian kan nu a rawn phone a, vawiinah tui sem a nih dawn avangin inah awm lo awm rawh u tiin a rawn hrilh a. Kan nu lah duty turin a chhuah a ngai si a, kei lo chu awm tur kan awm si loh avangin ka ṭawngṭaina chu a thlawn dawn ta a ni maw ka ti rilru rauh rauh a. 

Tuisem laia awm loh pawi zia chu sawi ta kher lo ila, in-a awm tur chuan rilru ka siam mai dawn em ni tia ka ngaihtuah lai chuan kan nu hnenah chuan tuisem hun tur chu a darbi a sawi thei em han zawt leh teh ka ti a, a han zawh leh chuan chhun dar 12 vel a ni ang tia a rawn sawi takah chuan ‘E, ka Pathian hnena ṭawngṭaina chu a hun taka chhanin a awm a, inkhawm loh a remti lo a nih chiah hi’ tiin Abrahama’n a fapa, Isaak-a a hlan dawn lai vel te pawh thinlung chuan a hrechhuak rum rum a, hlim takin inkhawm tur chuan ka inbuatsaih ta a, ka lawm hle mai. Hlim taka inkhawmin, inkhawm banah chuan rang taka hawngin tuisemtu ngei pawh thingpui sen tui tak (Darjeeling thingpuife ngat) lumin sintex khat tlatin tui min pe a, a lawmawm hle mai. 

Tui sem hi a semtu lam aṭang chuan hunbi fel tak neih a ngai ngei a, chutih rual chuan zan lam emaw Pathianni emaw pawha sem ṭul thut chang a awm fo ṭhin. Chutiangah chuan a bik takin Lunglei khawpuia tui semtute hi an thawkrim em em a, office hour loah pawh hian tui an sem fo mai ṭhinte han hmuh hi chuan fak leh chawimawi hi an phu hlein ka hria. Chutianga rim taka an thawh lai erawh chuan Pathiannia tui sem a ni tlat erawh anmahni demna lam ni loin keini lam buaia awl hle avangin her rem deuh hleka Pathiannia sem loh theih dan tura tuna hotu (Er. V. Laldanmawia EE) berin ruahmanna a han siam ta hi mipui lam pawhin kan thlawp ngei ka beisei. Kan EE hi rinna lamah a dinhmun chu ka hre hauh lo nain hetia Pathianni bawhchhe lo zawnga ruahmanna a siam hi a lawmawm ka ti hle mai a, ringtu ṭha tak tan chuan thil tih-awm tak pawh a niin ka hria. 

Amaherawchu, anmahni PHE lam zawkte hian engtia rei nge hetianga ruahmanna thar hi an kalpui theih ang tih erawh sawi lawk a har hle thung a. Tui harsat tak tak lo thleng leh sela emaw ṭhal vaekchar tak takah hian tuihal takin Lunglei khawpui hi awm leh ta sela mipui lam hian Pathiannia tui sem lo thei lo tur hian kan nawr mai ang em tihte pawh rilruah a awm nghal bawk a. Engpawh chu nisela, Pathianni bawhchhe lo zawnga tuna ruahmanna a awm hi a lawmawm hrim hrim a, ringtu ṭha kan ni emaw ni lo emaw anmahni tui semtute tan ngei pawh kar khata nikhat tal chawlh a lo awm ve pawh hi a ṭha alawm tih mai bakah Pathianni-a thla ngam taka inkhawm theih pawh a hluin inkhawm thawmhnaw phelh hman loha tui buaipui a ngai tawh lo tur ringawt pawh a lawmawm viau mai.