ZAWLNEITE SIKUL

Mahmuaka Chhakchhuak

I Samuel 19:20 thu kan chhiar chuan Zawlnei pawlho awm thu leh Samuela chuan a lo zirtir ngei thu kan hmu a, Samuela hi zirtirtu a ni a, Puithiam leh zawlnei a ni bawk.

He an inzirtirna khua hi Rama khua a ni a, Rama tih hi ‘Hmun sang’ tihna a ni a, Ramathaim – Zophim tiin an sawi bawk thin a ni. Bible-ah hian Rama tih hi hmun thum laiah kan hmu bawk a (Jos 19:36), (3) Asera ram ri bul khua (Jos. 19:29). Tichuan, kan sawi Rama khua erawh hi chu Ephraim tlang rama awm a ni thung a, zawlnei Samuela pianna khua leh a hun tam tak hmanna hmun a ni (I Sam. 1:1, 19, 2:11, 7:17). He khuaah hian Samuela awmna khua leh kan sawi ‘Zawlnei Sikul’ awmna bik tak erawh chu Naioth an ti bik a ni.

I Samuel 10:5,10 thu kan chhiar chuan Saula nunah Gibea hmuna Pathian tlang, Philistia sipaiho hmun an tihah zawlnei hi perhkhuang te, khuangte te, phenglawng te, tingtangte kenga thu sawi dual dualna hmun kan hmu bawk a. Rama hmuna mi nen hi chuan a inang lo va, ngaih fin loh tur  a ni.

Zawlneite sikul hi eng tik lai atanga lo awm nge?  Tu din nge? A tawp hun thleng pwh hriat chianna a awm hauh lo mai a, a awm ngei a ni tih erawh chu Bible-ah kan hmu bawk si a. Pathian thu kan chhiar chuan Samuela din pawh a ni maithei a ni. A hun laia din pawh a ang viau bawk a ni.

Zawlnei sikula kalte hi an zir lai naupangte chu ‘Zawlnei fapate’ tih an ni thin a, heng hmunahte hian kan hmu thei thin bawk a ni.

Naioth-ah - I Samu 19:20

Bethel-ah - II Lalte 2:3

Jeriko-ah - II Lalte 2:5,7,15; 9:1

Gilgal-ah - II Lalte 4:38

Heng zir laihote hi khual bukah an cheng khawm a, nupui neite erawh chu mahni in lam atangin an kal thin thung a ni.

Hetianga zawlnei sikul a cheng khawm hote hi sakhuana avanga inla hrang, mahni in leh lo pawh chhuahsan a, nupui pawh nei duh lo ho, monk ang hi an ni lova, zawlneiho reng reng chuan in chhung khawsak pangngai a khawsa chungin, nun thianghlim tak an vawng mai a ni.

A hun laia mite hneh (influence) theihna atan rilru leh thlarau lam thilah zirtirna an nei thin a, zawlnei Samuela chuan Pathian hnen atanga finna a dawn hmangin a lo zirtir thin a ni. Ziak leh chhiar inzirtirna hmun ang chauh a ngaih chi a ni lo va, Pathian hnen atanga thu hril tur leh an hriat lawk chu engtin nge dik taka an puan ang tih te, Pathian nena indawr tlak nun engtin nge an neih ang tih chu rilru leh thlarau lamah an training thin a ni.

Zawlnei hna erawh chu zir chi a ni lova, Pathian thil thlawn pek a niin Pathianin a hman apiangten an nei a, a thu dik tak leh huai taka puan dan tur erawh chu an training thin a ni.

Tin, zawlnei hna an thawhin Mosia Dan an hriat a tul a, an zir tel zel bawk a, heng bakah hian Israel hnam chanchin te, ri mawi leh hla thianghlim leh serh leh sang (Sacred music and poems) te an zir tel thin bawk a ni.

Tirhkoh Paula hunah pawh hetiang anga zirna hmun hi kan hmu bawk a, Tirh. 19:9- thuah chuan Turanna zirtirna in tiin kan hmu a, he Turanna hi mi fing (Philosopher) a ni. He hmun hi Ephesi khuaah a ni a, Pathian Thu inzirtirna hmunah an hmang thin a ni. Turanna hian zirtirna a pe thin a, he hmunah hian Paula hian mi a hnial thin a ni. Tirh. 22:3- thuah pawh Paula’n Gamaliel-a ke bula sei lian a nih thu a sawi a, ani erawh hi chuan ‘Dan’ bik chauh a zirtir thin a ni awm e. Gamaliela hian Turanna zirtirna inah hian zirtirna a pe thin ni awm tak a ni a, he hmunah hian Paula pawh hian Pathian Thu a zirtir thin ni ngei tur a ni.