PENTECOSTAL CHURCH IN 2050

Mahmuaka Chhakchhuak

Aug.15, 2025

United Pentecostal Church, General Headquarter, Aizawl Website: Generalhqtrsnei.Org aṭanga kan rawngbawlna hrang hrangte ka han thlir a, rawngbawlna kawng hrang hranga kan hmasawnnate ka hmuhin lawmawm ka ti hle. 

Chung Kohhran rawngbawlna kawng hrang hrangte chu:

Children Ministries

Youth Ministries

Theological Ministries

Ladies Ministries

Missions Ministries 

Literature Ministries

Media Ministries

Health Ministries

Education Ministries

Elders Ministries

Rehabilitation Ministries

Children Ministries: Kum naupang zawkte tana rawngbawlna hi thil pawimawh tak a ni a, Bible milem hmangte nena inzirtirin Bible-a mi ropuite: Abrahama, Isaka, Jakoba, Mosia, Davida, etc chanchin chu a lem nen an inzirtir ṭhin.

Heng bakah hian Kohhran pawimawhna leh Kohhran dinchhante, Kohhran ropuina leh Thuthlung Thar huna Kohhran rawngbawlna chi hrang hrangte chu naupang hriat tawk lek leka inzirtirna hmun a niin khawvela sual lo luh dante pawh inzirtirna an nei ṭhin. Kum naupang zawkte chu nakin lawka kan mi pawimawhte an la nih mai dawn avangin tuna kum naupang an la nih lai hian zirtirna mumal pek a ṭhatna leh pawimawhzia hriain an kum mil ang zela thu leh hla kalpui dan turte pawh an ruahman bawk ṭhin.   

Youth Ministries: Ṭhalai zinga rawngbawlna hi rawngbawlna pawimawh leh ṭul tak a nih avangin Kohhran pawhin a ngai pawimawh hle. Ṭhalaite’n zirtirna mumal leh ṭha tak an dawn hi chuan an puitlin thlengin an chhawm theiin zirtirna an dawn ṭhat loh thung chuan an puitlin thlengin enkawl an har tawh ṭhin an tih avangin Kohhran pawhin rawngbawlna pawimawh leh ṭul takah a ngai a ni.

Zuk leh hmuam, Zu leh sa, Mipat hmeichhiatna leh Ruihhlo chi hrang hrangte’n mihring taksa a tihchhiat theih dan leh mihring nun a tihkhawloh theih dante chu milem hmanga zirtir an ni ṭhinin video clip hrang hrang pawh hmuh tur a awm bawk. Chutiang bawkin Kohhran chanchin leh a rawngbawlna kawng hrang hrangte chu fiah takin an inzirtir bawk a, nakin lawka kohhran kut leh ke tur an la nih mai dawn avangin anmahni duhthu ngeia kohhran tana mi ṭangkai tak an nih theihna turin Ṭhalai rawngbawlna hi kohhran chuan a dah pawimawh hle. 

Theological Ministries: Aizawl Mualpui-a Calvary Bible College (CBC) kan neih mekah hian B. Th, B.D leh M. Th  bakah Doctorate Degree thlenga pekchhuah theih a niin zirlai mi za tam tak an lo chhuak tawhin kohhran tan ṭangkai takin rawngbawlna an lo nei hlawm tawh bawk.  

Khawvel hmun hrang hrangah CBC aṭanga zir chhuakte’n rawngbawlna an neiin Cambodia, Tanzania, Korea leh Pakistan ramahte pawh helai hmuna kan Bible zir chhuakte’n rawngbawlna an nei hi khawvel lam thil tak pawhin a ropui a, an chhuanawm hle. CBC a nih hmaa CBI (Calvary Bible Institute) a nih laia zir chhuakte kha chuan India ram pawnah rawngbawlna neia chhuak an awm meuh lo a, ram chhungah erawh an ṭangkaiin rawngbawltu pawimawh ber ber an ni thung. Tuna CBC chhuakte erawh chuan ram hla tak takah rawngbawlna an nei tain tualchhung kohhrana an report ngaihthlak pawh a nuam ṭhin hle. 

Ladies Ministries: Hmeichhe rawngbawlna hi a zau em em a, inchhung khawsaknaah ngei pawh hmeichhe fel leh fel lo kar a zau theih em avangin kohhran hmeichhe rawngbawlna hi kohhran chhungah ngei pawh rawngbawlna pawimawh tak a ni.

Inchhung khura hmeichhe khawsak ṭha chuan a pasal a chawimawi mai bakah an fanaute tan ngei pawh hlimna nasa tak a thlen ṭhin a, chutiang chuan kohhranah leh khawtlangah ngei pawh hmeichhe rawngbawlna hi thlahthlam theih a ni ngai hek lo. Mihring hmasa ber Adama aṭang tawh khan hmeichhiate hi mipa kianga awm reng tur leh mipate fellohna leh mawi lohna lo chulmam zung zung tura Pathianin a din a nih avangin kohhranah ngei pawh an dinhmun hi a pawimawh em em. Ṭhenkhatte chuan mipa tluka awm a, mipa aia dinhmun sanga ding ve thei emaw an inti ṭhin tak nain atir aṭang renga Pathianin mipa nakruh aṭanga a siam a nih angin mipa aia sang lo, mipain an rahbeh tur ni bawk si loa awm tur an ni tihte chu fiah taka hriat theih turin an inzirtir ṭhin.

Kohhran ngei pawh kan hmeichhiate avangin a mawi a, Kohhran tana an hnathawh hi sawi tur tam tak a awm: Children Ministry, Youth Ministry, Missions leh Rehabilitation lamah phei chuan an ni telloin Kohhran hi a kal thei lo hial awm e. 

Missions Ministries: Missions rawngbawlna hi Kohhran dinchhan ber pakhat a niin a pawimawh em em a, Kohhran nun leh nun loh pawh Missions chak leh chak lohah a innghat. Thuthlung hrilhdarhna kawng a ni emaw Kohhran tihchakna lamah leh Kohhran sawhnghehna lamah Missions hian dinhmun pawimawh tak a chan avangin kohhran kut leh ke ber an ni a. Tualchhung aṭanga ram pawn thlenga rawngbawlna pawh Missions mawhphurhna a nih avangin khawvel huap pawhin Kohhranah Missions hian dinhmun pawimawh tak a luah. 

Thuthlung Hlui huna rawngbawltu ropui leh chhuanawm tak takte mai bakah Thuthlung Thara rawngbawltu pawimawh tak takte rawngbawlna chanchin aṭangin Kohhran pawhin kawng hrang hrangah rawngbawlna a nei ṭhin a. Bible rama Juda hnamin hrehawmna a lo tawrh dan hrang hrang: Persia hnuaiah BC 537 – 332 chhung an awmin chumi hnuah Alexander the Great chuan rawn hneh ve lehin Aristotle hnuaia lehkha zir a ni bawkin a zirtirna chu a ram hneh apiangah chuan pu lut zelin Judai ramah ngei pawh chuan Grik ṭawng leh nunphung a phun zel a. Amaherawhchu kum naupangte a nihlaia a boral thut avangin a lalna ram zau takah chuan lalram pali an rawn chhuak ta a, an zinga pahnih Ptolemai Dynasty (Aigupta ram zawng zawng chunga thuneitu) hnuaiah chuan kum 122 teh meuh (BC. 320 -198) an awm lehin chumi hnuah Seleucid Dynasty (Syria ram zawng zawng awptu) te hnuaiah chuan Judate chu an lo awm ta a.  Seleucid Dynasty (BC. 198 – 142) hnuaia an awmlai phei hi chuan an sakhuana thlengin tihbawrhban sak an ni a, sakhaw lehkhabu thianghlimte ngei chu hal sak an niin an hal ral thil hlanna maichamahte chuan Judate huat em em vawkte hial an hlan luih sak ṭhin. Hemi hnuah hian Political Independence an hmuin ram zalen, mahni sorkar ngei, mahni hnam inawpna neiin Simon-a kaihhruaina hnuaiah an lo hmuh tak dante chu tun huna kohhran tan ala pawimawh avangin missions rawngbawlna chuan a theihnghilh ngai lo. 

Heng bakah hian ringlotute hnena rawngbawl dan chi hrang hrang an ruahmannate chu tarlan ṭhin a ni bawk a: Thuthlung Thar huna kohhran lo indin chhoh dante, Tirhkohte rawngbawlna hrang hrangte leh tunlai huna Pathian pakhat thu leh Isua hming ngeia baptisma channa hi Zirtirte min hrilh dan leh min hnutchhiah dan a nih dante chu pamphlet leh brochure hmangtein midang hnenah an sem ṭhin a, chu chuan kohhran a tinung em em ṭhin. Tuna NEI Kohhranin South India lama hmalakna tur a ruahmante leh Asia ram bung hrang hranga rawngbawlna tur a ruahmante hi a hlawhtlin hunah phei chuan a lawmawm ngawt ang.

Literature Ministries: Thu leh hla lama rawngbawlna hi rawngbawlna pawimawh tak a niin rawngbawlna zau leh ṭangkai tak a nih avangin kohhran pawhin a ngai pawimawh hle. Lal Isua hunlai ngei pawhin lehkha ziaktute chuan mipui thinlung a hneh theihzia kan hre tawh a, vawiin hun thleng pawhin thu leh hla rawngbawlna hian hmun pawimawh taka la luah reng a ni. 

Kan Pathianthu ngei pawh hi engtik huna ziak nge a nih tih chu chiang taka hriat theih ni kher tawh lo mahsela BC 621 vela Josia lal laia Temple-a dan bu an hmuh chhuah kha Deuteronomy bu nia ngaih a ni a. Heng hun aṭang tawh hian Mosia lehkhabu dang pawh phuahkhawm chhoh zel a niin, BC 445 vel khan saltang kir lehte zingah Ezra’n Torah chu a chhiar tih kan hre thei a, chuti a nih chuan Torah chu Pathian thu-ah an lo pawm tawh tih kan hre thei a. Samari mite phei chuan Torah chauh hi Pathian Lehkhabu atan an pawm a, chu chu 'Samaritan Pentateuch' an ti ṭhin a, hei hian BC 400 vel daih tawh khan an lo pawm tawh tih a tilang. Chutiang chuan finna neih belh zelin tuna Kristiante’n kan Bible neih Thuthlung Hlui bu 39-te hi 90 AD-a Jamnia Council ah khan thlan fel a ni a. Chutiang bawkin Thuthlung Thar bu 27 pawm hmasa bertu chu Alexandria khaw Bishop Athanasius a niin 367 AD khan a pawm thu a tarlang a, 397 AD khan Carthage Council-ah pawm ngheh alo ni ta a, tunah chuan Bible hi khawvela lehkhabu lehlin tam ber a niin lehkhabu hralh kal ber ala ni reng bawk. 

Nimahsela heng kan Pathianthute hi Juda ho chuan Thuthlung Hlui chiah pawmin Thuthlung Thar chu a fir zualte phei chuan an haw em em thung a. Chutiang bawkin Communist ho Bible - DAS KAPITAL an tih, Karl Marx a’n kum 1867 a a ziah pawh hi Kristian leh Muslim zinga a firfiak pawlte chuan Setana dawi burah an puh sak ve tho bawk. SATANIC VERSES tih Salman Rushdie ziah pawh chu Muslim ho chuan huat tak tein an haw bawk a, nimahsela sakhaw dang betute tan chuan engtihna mah a ni chuang lo. Hetiang anih vang hian kan Pathianthu ngei pawh ram lakna hmanraw ṭangkai ber a nih rualin hawtu a ngah em em reng a, mihring thlen bak pawh a thlen theih ṭhin avangin thu leh hlaa rawngbawlna hi vawiin hunah ngei pawh ala pawimawhin ala ṭangkai em em reng a ni.  

 Lehkha chhiar avanga thil danglam lo thleng tawh ṭhenkhatte:  

• Mi thianghlim Augustine (354 – 430 AD) kha Tirhkoh Paula hnua Theologian ropui ber tih hial a ni a, Pathian rawngbawl tura a inpekna chhan pawh Athanasius ziak ‘Life of Antony’ a chhiar aṭangin a ni.

• Kristian Vanram Kawngzawh lehkhabu ziaktu John Bunyan pawh kha Pathian ngaihsakna thinlung a neihna bul ber chu a nupuiin lehkhabu pahnih – The Plain Man’s Pathway to Heaven leh The Practice of Piety tih lehkhabute a rawn chhawm vang tiin an sawi.

• John Wesley ngei pawh a nun tidanglamtu leh a nun chhungril nghawr nghing dawttu chu ‘Imitation of Christ’ tih lehkhabu a chhiar vang a ni. 

• Karl Mark-a lehkhabu ‘Das Capital’ phek 96 chauha chhah ngei pawh chu Communist thinlung sawh nghettu leh Communism vaw liantu ber pawh a ni.

• Harriet Beecher Stowe-a lehkhabu ziak ‘Uncle Tom’s Cabin (Pu Tawma In)’ pawh America rama bawih chhuah tir tu a ni an tih hial bawk kha.

• English singer Adele Laurie Blue Adkins (Born May 5, 1988) hi kan hre ṭheuhin a rinawm. Hmelṭha tak a ni nain a taksa erawh duh aiin a lian a, a thau mah mah ṭhin a nih kha. A ni pawh hian ‘Untamed, Stop pleasing, start living’ tih lehkhabu Glennon Doyle ziak a chhiar aṭangin a nih kha amah a inthunun theih a, a rihna ngei pawh Kg. 45 zeta a tlakhniam phah ni.  

Heng bakah hian American hoin British ho laka zalenna an sual laia huaisenna leh tumruhna pe thar leh theitu pawh lehkhabu pakhat, Thomas Paine-a ziak, phek 47 chauha chhah ‘Common Sense’ a ni. British sipaite’n an nawr tawm a, Deloware tuipui kamah tlawm mai hmabakin an thi phung tawh tihah chuan Common Sense lehkhabu hi mipuite leh sipaite hnenah an sem a, chumi an han chhiar aṭang chuan huaisenna an nei thar lehin zalenna kumhlun an lo sual chhuah theih phah ta a ni. Hetiang bawk hian French Revolution leh Indian Independent Movement-te pawh kha mithiam thuziak aṭanga lo awm an ni.  

Kum 1945-a Indopui Pahnihnaah khan Japan chu mei khup zul zulin an tlawm a, ding chhuak leh thei lo tur hial khawpa sawp an ni. Chutianga chau taka an awm hnu kum 20 lekah chuan khawvel ram dangte hriat tham khawpin an rawn tho chhuak leh ta a, chu an rawn thawhchhuahlehna chhan bulpui ber leh pawimawh ber chu an ṭhalaite’n lehkhabu an chhiar nasain an lehkhabu chhiar ang zela an thawh vang a ni. 

Media Ministries: Vawiin huna rawngbawlna hmanraw pawimawh tak pakhat chu Media hi a ni. Social media platform hrang hrang: Facebook, WhatsApp, Instagram, Tiktok leh Youtube-te hi keini pawhin kan hman lar zualte a ni a, hengte hi rawngbawlna hmun pawimawh tak a ni. 

Heng hmanraw pawimawh tak takahte hian Kohhran chuan thu leh hla mai bakah video clip hmangtein rawngbawlna a nei ṭhin a, a ṭangkaiin a sawt em em ṭhin. Mitinte’n kan hunawl hmanna ber leh kan hunawl hnawhkhahna ber pakhat a nih avangin kawng hrang hranga Kohhran rawngbawlna chu a ṭangkai em em a, kan rawngbawltute thusawi leh thupui neia an thu sawihonate chu an ngaihthlak tam pawl a ni a. Kohhran office-ah ngei pawh pindan lian tak an luahin Kohhran pawhin a ngai pawimawh em em a, khawvel thil tak pawha Kohhran hmel lanna pawimawh tak a ni.  

Health Ministries: Hriselna lama kohhran rawngbawlna hi a pawimawh hle mai. Kohhranin Mualpui, Aizawla “Scism Hospital” kan neih mek hi khum 150 awm thei chauh ala ni nain khum awl lai hi a awm mang lo hial awm e. Lungleia nau neihna damdawiin kan neih “Pentecostal Maternity Hospital” kan neih ngei pawh khum 50 chauh a ni nain chhun leh zanah pantu a nei reng hian Kohhran rawngbawlna ṭangkai zia lanna pakhat a ni. 

Heng baka Khawzawl leh Kolasib-a Lynden Shalm Nursing Training Center (LSNTC) kan neihte pawh chu seat 30 chauh a ni nain seat a full reng bawk chuan Kohhran rawngbawl pawimawh tak a nih zia a hriat theih a, a lawmawm hle. Kohhran chhungkua a\anga Doctor chhiar tham tehmeuh kan neihte leh Specialist kan neihte chuan Kohhran hmel an timawiin Kohhran tan ngei pawh an ṭangkai em em a, a lawmawm hle.  

Education Ministries: Zirna lama kohhran rawngbawlna hi thui tak sawi tur a awm a. Tuna  Pentecostal Education Ministries hnuaia High School panga, Middle School sawm leh Primary School sawm hnih leh pathum kan neihte hi anmahni an lo inenkawl thei ta a, a lawmawm hle. 

Heng bakah hian College pawh hei din turin kan ruahman mek a ni bawk a, kohhranin hma a sawn ta hle. Khawvel thil tak pawhin kohhran enkawl school te hi school ṭha pawla an ṭang thei zel ṭhin hi thil lawmawm tak a ni a, kumina an result ngei pawh school dang aiin a chungnung thei zel pawh hi Pathian malsawmna ropui tak a ni. Hetiang zela hmasawnna kan neih chuan sum leh pai lamah pawh kan intodelh zelin kohhran sum hnar ṭha tak pawh ala rawn ni chho zel mai thei a ni.  

Elder Ministries: Kum upa zawkte tana rawngbawlna hi thil pawimawh tak a niin tuna kan kalpui mek: EL. Scism’s Home, Mualpui Aizawl leh Dover’s Old Age Home, Lunglei te pahnih chauh pawh hi rawngbawlna ṭangkai tak a ni. Kum upa zawkte tana rawngbawlna kan kalpui dan hi Home ang deuha kalpui niin fee tlemte chawiin kum upa zawkte chu a thlabi-a awm tir an ni a, a ṭhente phei chuan kum khat chuang awm tawhte an awm bawk.

India rama kum upa zawkte enkawlna an kalpui dan hrang hrang zingah Fatima Old Age Home, Hyderabad te, Shantivan Old Age Home, Maharashtra te, Mokto Bihongo Old Age Home, West Bengal te phei chu India ram pum huap pawha lang tham an ni. Tuna kan home pahnih neih mekte ngei pawh hi heng home ṭha zawk leh changtlung zawkte ang hi pha chiah lo mah ila a zahpuiawm loh hle a, Mizoramah phei chuan mite fak a hlawh ve ṭhin a, thawktute pawh an awm chikimin Medical, Education, Archive, Sports leh Mental lamte pawh an awm.

Rehabilitation Ministries: Nun beidawng leh ruihhlo ngaite tana chhanchhuahna hmun hi Kohhran rawngbawlna pawimawh tak a ni a, tuna kan neih mek Elpida Rehabilitation Center; Serchhip-ah hian mi 150 enkawl mek an awmin thawktu mi 20 an awm mek bawk. 

He Center-ah hian kawng hrang hranga harsatna neite enkawl theih turin Chapel pawh hmun thum a awm bawk a, Psychiatrists pahnih an awmin Doctor pangngai pawh panga an awm a, thawktu dang sawm pahnihte nen a thlamuanthlak hle. A hmun lah chu a thawveng ṭha a, khawpui thawm hriat phak lohna hmun a niin sava hram ri leh thereng hram ri chauh chu thawm bengchheng awmchhun a ni mai. 

Report lama kan hmuh danin Elpida Rehabilitation Center aṭang hian Mahni nunna lak tum mi 40 chhanchhuah tawh an ni a, ruihhlo ngai mi 1367 chhanchhuah tawh an niin chhungkaw kehchhia vanga nun beidawng leh eizawnna tlakchhiat vanga nun beidawng mi engemawzat chhanchhuah an ni tawh bawk. 

Hetiang hian Kohhran rawngbawlna hrang hrangte chu chipchiar lo takin a tlangpui chauh kan han sawi a, Kohhran hmasawnna kan hmuhin a lawmawm a, Kohhran mipuite ngei pawhin Kohhran tan ṭhahnemngai takin i thawk zel ang u.